4126.ಕಾಳುಮೆಣಸಿನರಾಣಿ #ಯುದ್ಧದಲ್ಲಿ_ಸೋತು ಬಂದನಕ್ಕೊಳಗಾದಾಗ ... ನಾನು ಬರೆದಿರುವ ರಾಣಿ ಚೆನ್ನ ಬೈರಾದೇವಿ ಪುಸ್ತಕದ ಒಂದು ಅದ್ಯಾಯ ಇಲ್ಲಿದೆ ಒಮ್ಮೆ ಓದಿ ನಿಮ್ಮ ಅಭಿಪ್ರಾಯಗಳನ್ನ ತಿಳಿಸಿ.
ಕಾಳುಮೆಣಸಿನರಾಣಿ #ಯುದ್ಧದಲ್ಲಿ_ಸೋತು ಬಂದನಕ್ಕೊಳಗಾದಾಗ ...
ನಾನು ಬರೆದಿರುವ ರಾಣಿ ಚೆನ್ನ ಬೈರಾದೇವಿ ಪುಸ್ತಕದ ಒಂದು ಅದ್ಯಾಯ ಇಲ್ಲಿದೆ ಒಮ್ಮೆ ಓದಿ ನಿಮ್ಮ ಅಭಿಪ್ರಾಯಗಳನ್ನ ತಿಳಿಸಿ.
ಈ ಪುಸ್ತಕಕ್ಕೆ ಸೂಕ್ತ ಶಿರ್ಷಿಕೆ ಇನ್ನೂ ಇಟ್ಟಿಲ್ಲ ಮುಂದಿನ ವರ್ಷ ಮುದ್ರಿಸಬೇಕು, ಈ ಪುಸ್ತಕದಲ್ಲಿ ಇಂತಹ ಅನೇಕ ವಿಶೇಷ ಘಟನೆಗಳ ದಾಖಲಿಸಿದ್ದೇನೆ ಮುಂದೆ ಓದಿ...
ತನ್ನೆರೆಡು ಕೈಗಗಳನ್ನ ತನ್ನ ಸೊಂಟದ ಮೇಲೆ ದೃಢವಾಗಿ ಇರಿಸಿ ಯುದ್ಧದಲ್ಲಿ ಪರಾಭವಗೊಂಡು ಶರಣಾದ ಮಹಾ ಮಂಡಲೇಶ್ವರಿ ರಾಣಿ ಚೆನ್ನ ಬೈರಾದೇವಿ ಚಿತ್ರವೇ ಅಂಕೋಲ ತಾಲ್ಲೂಕಿನ ಬಾವಿಕೆರೆಯ ಸಾನದಮನೆಯಲ್ಲಿ ಅವ್ವಿಯರಸಿ ಪ್ರತಿಮೆ ಆಗಿ ಪೂಜಿಸಲ್ಪಡುತ್ತಿದೆ.
ಯುದ್ಧಾನಂತರ ಚೆನ್ನ ಬೈರಾದೇವಿ ಅವರ ಮೇಲಿನ ಅಭಿಮಾನದಿಂದ ಅವರ ಅಭಿಮಾನಿಗಳು ಚಿಕ್ಕ ಚಿಕ್ಕ ಎರಕದ ಮೂರ್ತಿ ಮಾಡಿ ಗುಪ್ತವಾಗಿ ಹಂಚುತ್ತಿದ್ದರಂತೆ.
ರಾಣಿ ಆಡಳಿತ ಮುಗಿದು ಶತಮಾನಗಳಾದರೂ ಈ ರೀತಿ ಎರಕದಲ್ಲಿ ಮೂರ್ತಿ ತಯಾರಿಸಿ ಜನ ವಸತಿ ಪ್ರದೇಶದಲ್ಲಿ ಯಾರೋ ಗುಪ್ತವಾಗಿ ಹಾಕಿ ಹೋಗುತ್ತಿದ್ದರಂತೆ, ಅದನ್ನು ಪ್ರಜೆಗಳು ಜೋಪಾನವಾಗಿ ಕಾಪಾಡಿಕೊಂಡು ತಮ್ಮ ತಮ್ಮ ಮನೆಯಲ್ಲಿ ಅವ್ವಿಯರಸಿ ಎಂದು ಪೂಜಿಸುತ್ತಿದ್ದರಂತೆ.
ಈ ರೀತಿ ರಾಣಿ ಚೆನ್ನ ಬೈರಾದೇವಿ ವಿಗ್ರಹ ಎರಕದಿಂದ ತಯಾರಿಸುವ ಕೆಲಸ ಮಾಡುವವರು ಸಿಕ್ಕಿ ಬಿದ್ದರೆ ಕೆಳದಿ ಸಂಸ್ಥಾನದಲ್ಲಿ ಅವರಿಗೆ ದೊಡ್ಡ ಶಿಕ್ಷೆ ವಿಧಿಸುತ್ತಿದ್ದರಂತೆ ಆದ್ದರಿಂದ ಅಲ್ಲಿ ಭಯ ಇತ್ತು.
ಭಟ್ಕಳ- ಹೊನ್ನಾವರ ಮತ್ತು ಅಂಕೋಲ ಭಾಗದ ಕೊಂಕಣಿ ಆಚಾರ್ ಗಳಾಗಿದ್ದ #ಮೆಸ್ತಾ ಸಮೂದಾಯದವರು ಮತ್ತು ಈ ಭಾಗದ #ದೈೆವಜ್ಞ_ಬ್ರಾಹಣರು ಗುಪ್ತವಾಗಿ ಈ ಎರಕದ ವಿಗ್ರಹ ಗುಪ್ತವಾಗಿ ತಯಾರು ಮಾಡಿ ಕೊಡುತ್ತಿದ್ದರಂತೆ.
ರಾಣಿ ಚೆನ್ನಭೈರಾದೇವಿ ಸೋತ ಆ ಅಂತಿಮ ಯುದ್ಧವು ನಿರ್ದಿಷ್ಟವಾಗಿ ಕ್ರಿ.ಶ. 1606 ರ ಅವಧಿಯಲ್ಲಿ ನಡೆಯಿತು.
ಆ ಕಾಲದ ಯುದ್ಧಗಳು ಕೇವಲ ಒಂದೇ ದಿನದಲ್ಲಿ ಮುಗಿಯದೆ, ಹಲವು ತಿಂಗಳುಗಳ ಕಾಲ ದಿಗ್ಬಂಧನ ಮತ್ತು ಸಣ್ಣಪುಟ್ಟ ಚಕಮಕಿಗಳ ರೂಪದಲ್ಲಿ ನಡೆದಿತ್ತು.
ಕೆಳದಿಯ ವೆಂಕಟಪ್ಪ ನಾಯಕ ಮತ್ತು ಬಿಳಗಿಯ ಸೋಮಶೇಖರ ನಾಯಕ ಜಂಟಿಯಾಗಿ ಗೇರುಸೊಪ್ಪೆಯ ರಾಜಧಾನಿ ಮತ್ತು ಕೋಟೆಯ ಮೇಲೆ ದಾಳಿ ಮಾಡಿದರು.
ಇವರು ಗೇರುಸೊಪ್ಪೆ ಕೋಟೆಗೆ ಹೊರಗಿನಿಂದ ಬರುವ ಆಹಾರ, ಧಾನ್ಯ ಮತ್ತು ರಸದಸ್ತುಗಳ ಪೂರೈಕೆಯನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಯಿತು.
ಪಶ್ಚಿಮ ಘಟ್ಟಗಳ ಅಂಚಿನಲ್ಲಿದ್ದ ಕೋಟೆಗೆ ಪ್ರವೇಶಿಸುವ ಎಲ್ಲಾ ದಾರಿಗಳನ್ನು ವೆಂಕಟಪ್ಪ ನಾಯಕನ ಬೃಹತ್ ಪಡೆ ಸುತ್ತುವರಿಯಿತು.
ರಾಣಿಗೆ ಆಗ ವಯಸ್ಸಾಗಿದ್ದರೂ (ಸುಮಾರು 7೦ ವರ್ಷಕ್ಕೂ ಹೆಚ್ಚು) ತಮ್ಮ ಉಳಿದಿದ್ದ ಸೈನ್ಯದೊಂದಿಗೆ ಸ್ವತಃ ಅಂಗಳಕ್ಕೆ ಇಳಿದು ಧೀರಾವೇಶದಿಂದ ಹೋರಾಡಿದರು.
ತಿಂಗಳುಗಟ್ಟಲೆ ನಡೆದ ದಿಗ್ಬಂಧನದಿಂದಾಗಿ ಕೋಟೆಯ ಒಳಗಿದ್ದ ಸೈನಿಕರಿಗೆ ಆಹಾರ ಮತ್ತು ಕುಡಿಯುವ ನೀರಿನ ತೀವ್ರ ಅಭಾವ ಉಂಟಾಯಿತು.
ಬಿಳಗಿ ಮತ್ತು ಕೆಳದಿಯ ಜಂಟಿ ಪಡೆಗಳು ಸಂಖ್ಯೆಯಲ್ಲಿ ಗೇರುಸೊಪ್ಪೆಯ ಪಡೆಗಿಂತ ಮೂರ್ನಾಲ್ಕು ಪಟ್ಟು ದೊಡ್ಡದಾಗಿದ್ದವು.
ಗೇರುಸೊಪ್ಪೆಯ ವಿಶ್ವಾಸಾರ್ಹ ಸೈನಿಕರು ಅಂತಿಮ ಕ್ಷಣದವರೆಗೂ ಪ್ರಾಣಪಣವಾಗಿ ಹೋರಾಡಿದರೂ, ಶತ್ರುಗಳ ಭಾರಿ ಫಿರಂಗಿ ಹಾಗೂ ಕಾಲಾಳುಗಳ ದಾಳಿಗೆ ಕೋಟೆಯ ಬಾಗಿಲುಗಳು ಮುರಿದುಬಿದ್ದವು.
ಆ ಅಂತಿಮ ದಿನದ ಯುದ್ಧದಲ್ಲಿ ಚೆನ್ನಭೈರಾದೇವಿ ಸೋಲಲು ಅತ್ಯಂತ ಪ್ರಮುಖ ಕಾರಣ ಪೋರ್ಚುಗೀಸರ ದ್ರೋಹ.
ರಾಣಿಯು ಪೋರ್ಚುಗೀಸರೊಂದಿಗೆ ಹಲವು ಒಪ್ಪಂದಗಳನ್ನು ಮಾಡಿಕೊಂಡಿದ್ದರು ಮತ್ತು ತುರ್ತು ಸಂದರ್ಭದಲ್ಲಿ ಶಸ್ತ್ರಾಸ್ತ್ರ ಹಾಗೂ ಜಲಸೇನೆಯ ಸಹಾಯ ಪಡೆಯುವ ನಿರೀಕ್ಷೆಯಲ್ಲಿದ್ದರು.
ಆದರೆ ಯುದ್ಧದ ನಿರ್ಣಾಯಕ ದಿನದಂದು ಪೋರ್ಚುಗೀಸರು ಕೆಳದಿಯ ವೆಂಕಟಪ್ಪ ನಾಯಕನ ಜೊತೆ ಒಳಒಪ್ಪಂದ ಮತ್ತು ಕೆಳದಿ ಸೈನ್ಯದ ಬಲವನ್ನು ಕಂಡು ಹೆದರಿ ರಾಣಿಯ ನೆರವಿಗೆ ಬರದೆ ತಟಸ್ಥವಾಗಿ ಉಳಿದರು.
ಕೋಟೆಯ ಕಾವಲುಗಾರರು ಮತ್ತು ಸೇನಾಪತಿಗಳು ವೀರಮರಣ ಅಪ್ಪಿದ ನಂತರ, ಕೆಳದಿಯ ಪಡೆಗಳು ಅರಮನೆಯನ್ನು ಪ್ರವೇಶಿಸಿದವು.
ಸೋಲನ್ನು ಒಪ್ಪಿಕೊಂಡರೂ ಆತ್ಮಗೌರವದಿಂದ ದೃಡವಾಗಿ ತನ್ನೆರೆಡು ಕೈಗಳನ್ನ ಸೊಂಟದ ಮೇಲೆ ಇರಿಸಿ ನಿಂತಿದ್ದ ರಾಣಿ ಚೆನ್ನಭೈರಾದೇವಿಯವರನ್ನು ವೆಂಕಟಪ್ಪ ನಾಯಕನ ಸೈನ್ಯವು ಗೌರವಯುತವಾಗಿಯೇ ಆದರೆ ಬಂಧಿತೆಯಾಗಿ ವಶಕ್ಕೆ ಪಡೆಯಿತು.
ತನ್ನ 54 ವರ್ಷದ ಗೇರುಸೊಪ್ಪೆಯ ಆಡಳಿತದಲ್ಲಿ ಇದೇ ತನ್ನ ಅಂತ್ಯದ ಕ್ಷಣವಾಗಿತ್ತು ರಾಣಿ ಚೆನ್ನ ಬೈರಾದೇವಿಯದ್ದು... ಇದೇ ತನ್ನೆರೆಡು ಕೈಗಳನ್ನ ದೃಡವಾಗಿ ತನ್ನ ಸೊಂಟದ ಮೇಲಿರಿಸಿ ಶತೃಗಳಿಗೆ ಶರಣಾದ ಚಿತ್ರವೇ ಅಂಕೋಲ ತಾಲ್ಲೂಕಿನ ಬಾವಿ ಕೆರೆಯ ಸಾನದಮನೆಯಲ್ಲಿ ರಾಣಿ ಚೆನ್ನ ಬೈರಾದೇವಿಯ #ಅವ್ವರಸಿ ದೇಗುಲ ನಿರ್ಮಿಸಿ ಅಲ್ಲಿ ಇದೇ ಪ್ರತಿಮೆ ಆಗಿ ಪ್ರತಿಷ್ಟಾಪಿಸಿ ಈಗಲೂ ಪೂಜಿಸಲಾಗುತ್ತಿದೆ.
ಕರಾವಳಿ ಕರ್ನಾಟಕದ ವಿಶೇಷವಾಗಿ ಉತ್ತರ ಕನ್ನಡದ ಗೇರುಸೊಪ್ಪೆ, ಮಿರ್ಜಾನ್ ಹಾಗೂ ಭಟ್ಕಳ ನಾಡವರು, ಹಾಲಕ್ಕಿ ಗೌಡ ಸಮೂದಾಯ ಹಾಗೂ ಖಾರ್ವಿ ಸಮುದಾಯಗಳ ಜನರು ರಾಣಿಚೆನ್ನಬೈರಾದೇವಿಯವರನ್ನು "#ಅವ್ವರಸಿ" ಮಾತೃ ಸ್ವರೂಪಿ ರಾಣಿ) ಎಂದು ಗೌರವದಿಂದ ಕಾಣುತ್ತಾರೆ ಹಾಗೂ ಕೆಲವು ಸ್ಥಳೀಯ ಸನ್ನಿಧಿಗಳಲ್ಲಿ ಪೂಜೆ ಸಲ್ಲಿಸುತ್ತಾರೆ.
ರಾಣಿ ಚೆನ್ನಬೈರಾದೇವಿಯವರ ಐತಿಹಾಸಿಕ ನೆನಪಿಗಾಗಿ ಅವರ ಕಂಚಿನ/ಲೋಹದ ಪ್ರತಿಮೆ ಮತ್ತು ಚಿತ್ರಗಳನ್ನು ನಿರ್ಮಿಸಿ ಗೌರವಿಸಲಾಗಿದೆ.
ಇಲ್ಲಿ ಪ್ರತಿವರ್ಷ ರಾಣಿ ಚೆನ್ನಬೈರಾದೇವಿಯ (ಅವ್ವರಸಿ) ನೆನಪಿನಲ್ಲಿ ವಿಶೇಷ ಪೂಜೆ, ಹಬ್ಬ ಮತ್ತು ಜಾತ್ರೆಗಳು ನಡೆಯುತ್ತವೆ.
ಹೀಗಾಗಿ ಇಡೀ ಕರಾವಳಿ ಭಾಗದಲ್ಲೇ ರಾಣಿ ಚೆನ್ನಬೈರಾದೇವಿಯವರನ್ನು "ಅವ್ವರಸಿ" ಎಂದು ದೈವೀಕರಿಸಿ ಪೂಜಿಸುವ ಪ್ರಮುಖ ಸಾಂಸ್ಕೃತಿಕ ಕೇಂದ್ರ ಅಂಕೋಲಾದ ಬಾವಿಕೇರಿಯ ಸಾನದಮನೆ ಆಗಿದೆ.
ಸ್ಥಳೀಯ ಕುಟುಂಬಗಳು ಮತ್ತು ಸಮುದಾಯದವರು ತಮ್ಮ ಪೀಳಿಗೆಯಿಂದ ನಡೆದುಬಂದ ಸಂಪ್ರದಾಯದಂತೆ ಅವ್ವರಸಿಯ ಸನ್ನಿಧಾನದಲ್ಲಿ ಹಬ್ಬ, ಜಾತ್ರೆ ಮತ್ತು ವಿಶೇಷ ಧಾರ್ಮಿಕ ಕಾರ್ಯಕ್ರಮಗಳನ್ನು ನೆರವೇರಿಸುತ್ತಾರೆ.
ಭಾವಿಕೇರಿಯ ಇತರ ಪ್ರಮುಖ ಆರಾಧನಾ ಸ್ಥಳಗಳು
ಗ್ರಾಮದಲ್ಲಿ ಶ್ರೀ ಕಾನಬೀರ ದೇವರು, ಈಶ್ವರ (ಕಾಮನಾಥೇಶ್ವರ) ಹಾಗೂ ಗ್ರಾಮದೈವಗಳಾದ ಬೊಮ್ಮಯ್ಯ-ಹುಲಿರಾಯ ದೇವಸ್ಥಾನಗಳಿದ್ದು ಇವುಗಳೊಂದಿಗೆ ಅವ್ವರಸಿಯ ಆರಾಧನೆಯು ಈ ಭಾಗದ ಸಂಸ್ಕೃತಿಯ ಭಾಗವಾಗಿದೆ.
ಭಟ್ಕಳದ ನವಾಯಿತರು, ಜೈನರು, ಸಾರಸ್ವತರು, ದೈವಜ್ಞರು, ಬೆಸ್ತರು, ಮಡಿವಾಳರು, ಬ್ರಾಹ್ಮಣರು, ಹಾಲಕ್ಕಿಗಳು, ಗೊಂಡರು, ಕುಣುಬಿ, ಮುಕ್ರಿಗಳು, ಖಾರ್ವಿ ಮುಂತಾಗಿ ಹತ್ತು ಹಲವು ಜಾತಿಗಳವರು ಧರ್ಮಗಳ ಜತೆ ಸಾಮರಸ್ಯ ಕಾಪಾಡಿಕೊಂಡು, ಸಮಾನ ಪ್ರೀತಿ ವಿಶ್ವಾಸದಿಂದ ಎಲ್ಲರನ್ನೂ ಒಳಗೊಂಡು ಐವತ್ನಾಲ್ಕು ವರ್ಷಗಳಿಗೂ ಹೆಚ್ಚುಕಾಲ ಪ್ರಜಾವತ್ಸಲಳಾಗಿ ಆಕೆ ರಾಜ್ಯಭಾರ ನಡೆಸಿದಳೆಂದರೆ ಅವಳ ಸರ್ವಧರ್ಮ ಸಮಭಾವ ಎಷ್ಟು ಗಟ್ಟಿ ಮತ್ತು ಪ್ರಭಾವಶಾಲಿಯಾಗಿದ್ದಿರಬೇಡ?!.
ಉತ್ತರ ಕನ್ನಡ ಜಿಲ್ಲೆಯ ಅಂಕೋಲಾ ತಾಲ್ಲೂಕಿನ ಭಾವಿಕೇರಿಯ ಸಾನದಮನೆಯ ಅವ್ವರಸಿ ಸನ್ನಿಧಿ/ಗುಡಿಯ ತಲುಪುವ ಮಾರ್ಗ
ಅಂಕೋಲಾದಿಂದ ಕಾರವಾರ ಕಡೆಗೆ ಹೋಗುವ ರಾಷ್ಟ್ರೀಯ ಹೆದ್ದಾರಿ 66ರಲ್ಲಿ ಸುಮಾರು 10-12 ಕಿ.ಮೀ. ಕ್ರಮಿಸಿದರೆ ಭಾವಿಕೇರಿ ಸಿಗುತ್ತದೆ ಅಲ್ಲಿಂದ ಒಳರಸ್ತೆಯ ಮೂಲಕ ಸಾನದಮನೆ ಗ್ರಾಮಕ್ಕೆ ತೆರಳಬಹುದು.
ಯುದ್ಧದಲ್ಲಿ ರಾಣಿ ಚೆನ್ನ ಬೈರಾದೇವಿಯ ಗೇರುಸೊಪ್ಪೆಯ ಸುಂದರ ಅರಮನೆ ಹಾಗೂ ರಾಜಧಾನಿಯನ್ನು ಶತ್ರುಪಡೆಗಳ ವಶವಾದಾಗ.
ಕರಾವಳಿಯ ಮೆಣಸಿನ ವ್ಯಾಪಾರದ ಪ್ರಮುಖ ಕೇಂದ್ರವಾಗಿದ್ದ ಗೇರುಸೊಪ್ಪೆಯ ವೈಭವ ಅಂದೇ ಅಸ್ತಮಿಸಿತು.
ಗೇರುಸೊಪ್ಪೆಯ ಪತನದ ನಂತರ ವೃದ್ಧರಾಗಿದ್ದ ರಾಣಿ ಚೆನ್ನಭೈರಾದೇವಿಯವರನ್ನು ಕೆಳದಿ ನಾಯಕರ ರಾಜಧಾನಿಯಾಗಿದ್ದ ಇಕ್ಕೇರಿಗೆ ಕಟ್ಟುನಿಟ್ಟಿನ ಭದ್ರತೆಯಲ್ಲಿ ಬಂಧಿಸಿ ಕರೆತರಲಾಯಿತು.
ಗೇರುಸೊಪ್ಪೆಯು ಕರಾವಳಿ ತೀರದ (ಉತ್ತರ ಕನ್ನಡ) ತಗ್ಗು ಪ್ರದೇಶದಲ್ಲಿದ್ದರೆ, ಇಕ್ಕೇರಿಯು (ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕು) ಪಶ್ಚಿಮ ಘಟ್ಟಗಳ ಮೇಲಿನ ಮಲೆನಾಡು ಭಾಗದಲ್ಲಿದೆ.
ಯುದ್ಧ ಮುಗಿದ ತಕ್ಷಣ ಕೆಳದಿಯ ವೆಂಕಟಪ್ಪ ನಾಯಕನ ಸಶಸ್ತ್ರ ಕಾಲಾಳುಗಳು ಹಾಗೂ ಕುದುರೆ ಪಡೆಗಳು ರಾಣಿಯನ್ನು ಗೇರುಸೊಪ್ಪೆಯಿಂದ ಘಟ್ಟದ ದಾರಿಯ ಮೂಲಕ ಕರೆದೊಯ್ದವು.
ಆ ಕಾಲದಲ್ಲಿ ಮಲೆನಾಡಿನ ಕಡಿದಾದ ಘಟ್ಟಗಳನ್ನು ಹತ್ತುವುದು ಅತ್ಯಂತ ಕಠಿಣ ಪ್ರಯಾಣವಾಗಿತ್ತು.
ರಾಣಿ ಚೆನ್ನಭೈರಾದೇವಿ ಶತ್ರು ರಾಜನಿಗೆ ಸೋತಿದ್ದರೂ ಆಕೆಯ ಸುದೀರ್ಘ ಆಡಳಿತ, ವಯಸ್ಸು ಮತ್ತು ಅಂತಾರಾಷ್ಟ್ರೀಯ ಖ್ಯಾತಿಯನ್ನು ಗೌರವಿಸಲಾಯಿತು.
ಸಾಮಾನ್ಯ ಖೈದಿಗಳಂತೆ ಕಾಲ್ನಡಿಗೆಯಲ್ಲಾಗಲಿ ಅಥವಾ ಸರಪಳಿಯಿಂದ ಬಂಧಿಸಿ ಕರೆದೊಯ್ಯಲಿಲ್ಲ ಬದಲಿಗೆ ಮುಚ್ಚಿದ ಪಲ್ಲಕ್ಕಿಯಲ್ಲಿ ಕಟ್ಟುನಿಟ್ಟಿನ ಕಾವಲಿನಲ್ಲಿ ಕರೆತರಲಾಯಿತು.
ಮಾರ್ಗ ಮಧ್ಯದಲ್ಲಿ ದಾರಿ ಬದಲಿಸಿ ರಾಣಿಯನ್ನ ಆನಂದಪುರಂನ ಕೋಟೆಗೆ ಸ್ಥಳಾಂತರಿಸಲಾಯಿತು ಇದಕ್ಕೆ ಕಾರಣ ಸುರಕ್ಷತೆ ಮತ್ತು ಗೂಡಚಾರ ವರದಿಗಳು.
ಸಾರ್ವಜನಿಕವಾಗಿ ಅಥವಾ ಸ್ಥಳೀಯ ಪ್ರಜೆಗಳಲ್ಲಿ ಆಕೆಯ ಬಗ್ಗೆ ಯಾವುದೇ ದಂಗೆ/ಪ್ರತಿಭಟನೆ ಏಳದಂತೆ ರಹಸ್ಯವಾಗಿ ಮತ್ತು ವೇಗವಾಗಿ ಪ್ರಯಾಣವನ್ನು ಪೂರ್ಣಗೊಳಿಸಲಾಯಿತು.
ಕೆಲವು ದಿನದ ನಂತರ ರಾಣಿಯವರನ್ನು ಅಂದಿನ ಕೆಳದಿ ರಾಜ್ಯದ ರಾಜಧಾನಿಯಾಗಿದ್ದ ಇಕ್ಕೇರಿ ಕೋಟೆಯ ಆವರಣದಲ್ಲಿದ್ದ ಸುರಕ್ಷಿತ ಬಂದೀಖಾನೆಯಲ್ಲಿ (ಕೋಟೆಯ ಅಂತಃಪುರದ ಬಂಧನ ಗೃಹ) ಇರಿಸಲಾಯಿತು.
ಅಲ್ಲಿ ಆಕೆಗೆ ಬೇಕಾದ ಮೂಲಭೂತ ಸೌಕರ್ಯಗಳನ್ನು ನೀಡಲಾಯಿತಾದರೂ ಹೊರಗಿನವರನ್ನು ಭೇಟಿಯಾಗಲು ಅಥವಾ ರಾಜಕೀಯವಾಗಿ ಯಾವುದೇ ಸಂದೇಶ ರವಾನಿಸಲು ಸಂಪೂರ್ಣ ನಿಷೇಧ ಹೇರಲಾಗಿತ್ತು.
ತಮ್ಮ ಆಡಳಿತಾವಧಿಯಲ್ಲಿ ಇಡೀ ಯುರೋಪಿಯನ್ ವ್ಯಾಪಾರಿಗಳನ್ನು ಬೆರಳ ತುದಿಯಲ್ಲಿ ಕುಣಿಸಿದ್ದ ಮಹಾನ್ ಚಕ್ರವರ್ತಿನಿ ತಮ್ಮ ಅಂತಿಮ ದಿನಗಳನ್ನು ಇದೇ ಇಕ್ಕೇರಿಯ ಕಾವಲು ನಿಗಾದಲ್ಲಿಯೇ ಕಳೆದು ಸ್ವಯಂ ಮರಣದ ತೀರ್ಮಾನ ಕೈಗೊಂಡು ತನ್ನ ಜೈನ ಧರ್ಮದ ಸಲ್ಲೇಖನ ವೃತ್ತದಿಂದ ಕೊನೆಯುಸಿರೆಳೆದರು.
#chennabyradevi #gerusoppe #jainism #ikkeri #anandapuram #keladi #venkatappanayaka.
Comments
Post a Comment