ಶಿವಮೊಗ್ಗ ಜಿಲ್ಲೆಯಲ್ಲಿ ದಾಖಲೆ ಪ್ರಮಾಣದಲ್ಲಿ Rowdy list ಪರಿಷ್ಕರಣೆ 1420 ಜನರನ್ನು ಪಟ್ಟಿಯಿಂದ ವಿಮುಕ್ತಿ ಮಾಡಿದ ಜಿಲ್ಲಾ ರಕ್ಷಣಾಧಿಕಾರಿ ಲಕ್ಷ್ಮೀ ಪ್ರಸಾದರ ಅಭಿನಂದನೀಯ ಕಾಯ೯

#ಬಹು_ದಶಕದ_ಬೇಡಿಕೆ

#ಜಿಲ್ಲೆಯ_ROWDY_ಲಿಸ್ಟ್_ಪರಿಷ್ಕರಣೆ.

#ಅಭಿನಂದನೆಗಳು_ಜಿಲ್ಲಾ_ಕ್ಷಣಾಧಿಕಾರಿಗಳಿಗೆ_ಗೃಹ_ಸಚಿವರಾದ_ಆರಗಜ್ಞಾನೇಂದ್ರರಿಗೆ

#ಪರಿಷ್ಕರಣೆಯಲ್ಲಿ_ಪಟ್ಟಿಯಿಂದ_ಒಂದು_ಸಾವಿರದ_ನಾಲ್ಕುನೂರ_ಇಪ್ಪತ್ತು_ಜನ_ಹೊರಗೆ.

   ROWDY LIST ಅನ್ನೋದು ಸಮಾಜವನ್ನು ಕ್ರಿಮಿನಲ್ ಗಳ ಕಿರುಕುಳದಿಂದ ತಪ್ಪಿಸಲು ಮತ್ತು ಕ್ರಿಮಿನಲ್ ಗಳ ಮೇಲೆ ಕಣ್ಣಿಡಲು ಪೋಲಿಸ್ ಇಲಾಖೆಯ ಕಾನೂನು ಸುವ್ಯವಸ್ಥೆಯ ಆಚರಣೆಯ ಅಂಗವಾಗಿದೆ.

  ಸಂವಿದಾನದಲ್ಲಿ ನ್ಯಾಯಾಂಗ ವ್ಯವಸ್ಥೆ ಇರುವಾಗ ಕಾರ್ಯಾಂಗದಲ್ಲಿ ಈ ವ್ಯವಸ್ಥೆ ಬೇಕಾ ಅಥವ ಬೇಡವೇ ಅನ್ನುವ ಚರ್ಚೆ ಇದೆ ಆದರೆ ಪೋಲಿಸರಿಗಿಂತ ಇದನ್ನು ದುರ್ಬಳಕೆ ಮಾಡುತ್ತಿರುವುದು ಮಾತ್ರ ಆಡಳಿತರೂಢ ರಾಜಕಾರಣಿಗಳು.

  ನಿನ್ನೆ ಶಿವಮೊಗ್ಗ ಜಿಲ್ಲಾ ರಕ್ಷಣಾಧಿಕಾರಿಗಳು ಶಿವಮೊಗ್ಗ ಜಿಲ್ಲೆ ಯ Rowdy list ಪರಿಷ್ಕರಣೆ ಮಾಡಿ 1420 ಜನರನ್ನು ಈ ಪಟ್ಟಿಯಿಂದ ಹೊರ ಹಾಕಲಾಗಿದೆ ಎಂದಿದ್ದಾರೆ ಬಹುಶಃ ರಾಜ್ಯದ ಪೋಲಿಸ್ ಇಲಾಖೆಯಲ್ಲಿಯೇ ಇಷ್ಟು ಪ್ರಮಾಣದ ಪಟ್ಟಿ ಪರಿಷ್ಕರಣೆ ಇದೆ ಮೊದಲಾಗಿರಬಹುದು ಮತ್ತು ಜಿಲ್ಲಾ ರಕ್ಷಣಾಧಿಕಾರಿಗಳಾದ ಬಿ.ಎಂ.ಲಕ್ಷ್ಮೀ ಪ್ರಸಾದರ ಸರ್ವಿಸ್ ನಲ್ಲಿ ಸರ್ವಕಾಲಿಕ ದಾಖಲೆ ಆಗಿ ಉಳಿಯಲಿದೆ.

  ಪೋಲಿಸ್ ಇಲಾಖೆಯಲ್ಲಿರುವವರಿಗೆ ಗೊತ್ತೇ ಇದೆ ನಿಜ ಕ್ರಿಮಿನಲ್ ಗಳು ಯಾವಾಗಲೂ ಈ ಪಟ್ಟಿಯಲ್ಲಿರುವುದಿಲ್ಲ ಮತ್ತು ರಾಜಕೀಯ ದ್ವೇಷಕ್ಕಾಗಿ ಸೇರಿಸಿದವರು, ಸಣ್ಣ ಕ್ರೈಂ ಗಳಾದ ಮಟಕ ಕಳ್ಳಬಟ್ಟಿಯವರು ಹೆಚ್ಚು ಇದ್ದಾರೆ ಮತ್ತು ಸುಮಾರು 15-20 ವರ್ಷದಿಂದ ಈ ಪಟ್ಟಿ ಪರಿಷ್ಕರಣೆ ಆಗಿಲ್ಲ ಅಂತ.

  ಪ್ರತಿ ವರ್ಷ ಎಲ್ಲಾ ಠಾಣೆಗಳು ಈ ಪಟ್ಟಿಯಿಂದ ಕೈ ಬಿಡಬಹುದಾದ ದೀರ್ಘ ಕಾಲದಿಂದ ಇರುವ ಹಾಲಿ ಯಾವುದೇ ಕ್ರಿಮಿನಲ್ ಚಟುವಟಿಕೆ ಇಲ್ಲದವರ ಹೆಸರು ಮೇಲಾಧಿಕಾರಿಗಳಿಗೆ ಕಳಿಸುತ್ತಾರಾದರು ಅವರಾರು ರಿಸ್ಕ್ ಯಾಕೆ ಅಂತ ಕೈ ಬಿಡುವುದಿಲ್ಲ.

   ಠಾಣೆಗೆ ಹೊಸ ಅಧಿಕಾರಿ ಬಂದಾಗ, ಚುನಾವಣೆ ಬಂದಾಗೆಲ್ಲ Rowdy ಪೆರೇಡ್ ನಡೆಸುತ್ತಾರೆ ಅಲ್ಲಿ ಸಾರ್ವಜನಿಕವಾಗಿ ಅವಮಾನಿಸುವ ನಿರಪರಾದಿಗಳ ಆತ್ಮವಿಶ್ವಾಸ ಕುಂದಿಸುವ ಕೆಲಸ ಮಾತ್ರ ಆಗುತ್ತದೆ ಇದಕ್ಕಾಗಿ ಇಲಾಖಾ ಸಿಬ್ಬಂದಿಗಳಿಗೆ ಅನಾವಶ್ಯಕ ಹೆಚ್ಚುವರಿ ಕೆಲಸ ಬೇರೆ.

 

ಆರು ತಿಂಗಳ ಹಿಂದೆ ಗೃಹ ಸಚಿವರಾದ ಆರಗ ಜ್ಞಾನೇ೦ದ್ರರಿಗೆ ಅಭಿನಂದನೆ ಜೊತೆ Rowdy ಪಟ್ಟಿ ಪರಿಷ್ಕರಣೆಗೆ ಒತ್ತಾಯಿಸಿದ್ದೆ.

https://arunprasadhombuja.blogspot.com/2022/01/roudy.html

 ಮಲೆನಾಡಿನ ಒಂಟಿ ಮನೆಗಳ ರಕ್ಷಣೆಗೆ ಸರಳವಾಗಿ ಬಂದೂಕು ಲೈಸೆನ್ಸ್, ಗ್ರಾಮೀಣ ಬಾಗದ ರಸ್ತೆ ವೃತ್ತಗಳಲ್ಲಿ ಸಿಸಿಟಿವಿ ಅಳವಡಿಕೆ, ಪ್ರತಿ ಮನೆಗಳಲ್ಲೂ ಸಿಸಿ ಟೀವಿ ಮತ್ತು ಸಾಕು ನಾಯಿ ಸಾಕುವಂತೆ ಜನಜಾಗೃತಿ ಮಾಡುವುದು, ಪೋಲಿಸ್ ಇಲಾಖೆ ಆಂತರಿಕ ಮಾಹಿತಿಗಾಗಿ ಸ್ಥಳಿಯರ ಬಳಸಿಕೊಳ್ಳುವ ಬಗ್ಗೆ ಸಾರ್ವಜನಿಕವಾಗಿ ವಿನಂತಿ ಕೂಡ ಮಾಡಿದ್ದೆ.

  ಹಾಗಾಗಿ ಜಿಲ್ಲಾ ರಕ್ಷಣಾಧಿಕಾರಿಗಳಿಗೆ ಮತ್ತು ಗೃಹ ಮಂತ್ರಿಗಳಿಗೆ ಅಭಿನಂದಿಸುತ್ತೇನೆ.

  ಈ ಸಂದರ್ಭದಲ್ಲಿ 1999 ನೇ ಇಸವಿಯಿಂದ 2017ರ ವರೆಗೆ ಸುಮಾರು 18 ವರ್ಷ ನಾನು Rowdy list ನಲ್ಲಿದ್ದೆ ಇದೇ ರೀತಿ ಶಿವಮೊಗ್ಗದ ಜಿಲ್ಲಾ ಕಾಂಗ್ರೇಸ್ ಅಧ್ಯಕ್ಷರಾಗಿದ್ದ ತೀ.ನಾ. ಶ್ರೀನಿವಾಸ್ ರ ಹೆಸರು ಇತ್ತು, ಈಗಿನ ಬಿಜೆಪಿ ಜಿಲ್ಲಾ ಅಧ್ಯಕ್ಷರಾದ ಟಿ.ಡಿ.ಮೇಘರಾಜರ ಹೆಸರು ಇತ್ತು.

  ಶಿವಮೊಗ್ಗ ಜಿಲ್ಲೆಯಲ್ಲಿ ಮುಖ್ಯ ಮಂತ್ರಿ ಆಗಿದ್ದ ಬಂಗಾರಪ್ಪರ ಹೊರತು ಪಡಿಸಿ ಎಲ್ಲಾ ರಾಜಕಾರಣಿಗಳು ತಮ್ಮ ರಾಜಕಾರಣದ ವಿರೋದಿಗಳನ್ನು ಬಗ್ಗು ಬಡಿಯಲು ಈ ಅಸ್ತ್ರ ಬಳಸಿಕೊಂಡವರೆ!

  ನನ್ನನ್ನು ಈ ಪಟ್ಟಿಯಲ್ಲಿ ಸೇರಿಸಲು ಕಾರಣ ನಮ್ಮ ತಾಲ್ಲೂಕಿನಲ್ಲಿ ನಾನು ವಿಧಾನ ಸಭಾ ಚುನಾವಣೆಗೆ ಸ್ಪರ್ದಿಸಿದ್ದು, ಸಂಘಟನೆ ಮತ್ತು ಭಾಷಣದಲ್ಲಿ ಯಾರೇ ಮುಂದಾಗಿದ್ದರೆ ಅವರ ಕಾಲು ಎಳೆಯುವ ಕೆಲಸ ಈ ಅರ್ಹತೆ ಇಲ್ಲದವರು ಸದಾ ಮಾಡುತ್ತಿರುತ್ತಾರೆ, ಕಾಲ ಬೆರಳಿಂದ ತಲೆ ಕೂದಲವರೆಗೆ ಅಪ್ಪಟ ಚಿನ್ನ ಆಗಿರುತ್ತಿದ್ದ ನಾಯಕರ ಕಿವಿ ಮಾತ್ರ ಹಿತ್ತಾಳೆ ಎಂಬ ಗಾದೆಯಂತೆ ಅವರ ವಿರುದ್ಧ ಚುನಾವಣೆಗೆ ಸ್ಪರ್ದಿಸಿದ್ದರಿಂದ ಅಧಿಕಾರ ಉಳ್ಳ ಮಂತ್ರಿಗಳಾಗಿದ್ದ ನಾಯಕರ ಒಂದು ಇಷಾರೆ ಸಾಕು ಇಂತಹ ಪಟ್ಟಿಗೆ ಸೇರಿಸಲು ಇದಕ್ಕೆ ತಾಂತ್ರಿಕವಾಗಿ ಒ0ದಿಷ್ಟು ಕೇಸಿನಲ್ಲಿ ಹೆಸರು ಸೇರಿಸುತ್ತಾರೆ.

  ನನ್ನ ಮೇಲೆ ಪಟ ಪಟಾಂತ 1999 ರಲ್ಲಿ 23 ಕೇಸುಗಳು ದಾಖಲಾಯಿತು, ಠಾಣೆಯ ಸಜ್ಜನ ಅಧಿಕಾರಿಗಳು ಹೇಳಿದ್ದರು ನಿಮ್ಮ ಮೇಲೆ ಇಂತಹ ಪ್ರಯತ್ನಗಳು ನಡೆಯುತ್ತಿದೆ ನಾಯಕರಿಗೆ ಶರಣಾಗಿ ಅಂತ ಆಗಿನ ಜಿಲ್ಲಾಧಿಕಾರಿಗಳು ಕೂಡ ನನಗೆ ಅವರೊಡನೆ ರಾಜಿ ಆಗಿ ಅಂದಿದ್ದರು ಆದರೆ ನಾನು ಬಂದದ್ದೆಲ್ಲ ಬರಲಿ ಅಂತ ಅಚಲನಾಗಿ ನಿಂತಿದ್ದು ಮುಂದಿನ 17 ವರ್ಷ ನರಕಯಾತನೆಗೆ ಕಾರಣ ಆಯಿತು.

  ಶರಣಪ್ಪ ಎಂಬ ಐಪಿಎಸ್ ಅಧಿಕಾರಿ ಸಾಗರದ ಎಸಿಪಿ ಆಗಿ ಬಂದಾಗ ಇಂತಹ Rowdy ಪೆರೇಡ್ ನಲ್ಲಿ ನನ್ನ ಕೇಸಿನ ಬಗ್ಗೆ ಕೇಳಿದಾಗ ರಾಜಕೀಯ ದ್ವೇಷದಿಂದ ಮತ್ತು  ವಿದಾನ ಸಭಾ ಚುನಾವಣೆಗೆ ಸ್ಪರ್ದಿಸಿದ್ದರಿಂದ ಸೇಡು ತೀರಿಸಿಕೊಳ್ಳಲು ನನ್ನನ್ನು 1999ರಿಂದ ಸೇರಿಸಿದ್ದಾರೆ ಎಂದಾಗ ಅವರು ನಂಬಲಿಲ್ಲ,Rowdy ಗಳೆಲ್ಲ ಕ್ರಿಮಿನಲ್ ಗಳೆಂಬ ನಂಬಿಕೆ ಚಾಲ್ತಿಯಲ್ಲಿತ್ತು ಆಗ ಅಲ್ಲಿದ್ದ ಸರ್ಕಲ್ ಇನ್ಸ್ಪೆಕ್ಟರ್ ಗೆ ವಿಚಾರಿಸಿದರು ಅವರು 1999ರ ನಂತರ ಸೇರಿಸಿದ ಬಗ್ಗೆ ಮತ್ತು ನನ್ನ ರಾಜಕೀಯ ಜನಪರ ಹೋರಾಟದ ಬಗ್ಗೆ ವಿವರಿಸಿದರು ಆಗ ಶರಣಪ್ಪನವರು ಪಟ್ಟಿಯಿಂದ ಹೆಸರು ಕೈಬಿಡಲು ಶಿಪಾರಸ್ಸು ಮಾಡುವುದಾಗಿ ತಿಳಿಸಿ ಮುಂದಿನ ಕ್ರಮಕ್ಕಾಗಿ ಕಡತ ಶಿವಮೊಗ್ಗ ರಕ್ಷಣಾಧಿಕಾರಿಗಳ ಕಛೇರಿ ತಲುಪಿತು ಅಲ್ಲಿಯೂ ಪರಿಷ್ಕರಣೆ ನಿರಾಕರಿಸಲ್ಪಟ್ಟಿತಂತೆ ಆದರೆ ನನಗೆ ಗೊತ್ತಿಲ್ಲದಂತೆ ನನ್ನ ಕೆಲ ಗೆಳೆಯರು, ಪೋಲಿಸ್ ಅಧಿಕಾರಿಗಳು ಮತ್ತು ಶಿವಮೊಗ್ಗದ ಆಗಿನ ಶಾಸಕರಾಗಿದ್ದ ಪ್ರಸನ್ನ ಕುಮಾರರಿಂದ ನನ್ನ ಹೆಸರನ್ನು ಮಾತ್ರ ಕೈ ಬಿಟ್ಟು ಹಿಂಬರಹ ನೀಡಿದ್ದರು.

  ಆಗ ಸಾಗರದಲ್ಲಿ ಪೆರೇಡ್ ನಲ್ಲಿ ಇರುತ್ತಿದ್ದವರೆಲ್ಲ ಸಮಾಜ ಘಾತುಕರಾಗಿರಲಿಲ್ಲ, ಮಟಕ ಚೀಟಿ ಬರೆದವರು, ಕಳ್ಳಬಟ್ಟಿ ಮಾರಾಟ ಮಾಡಿದವರು, ಗ್ರಾಮ ಪಂಚಾಯತನ ಸದಸ್ಯರಾಗಿದ್ದವರ ಜೊತೆ ನಾನು ಇದ್ದೆ, ನಿಜವಾದ ಸಮಾಜಘಾತುಕರು ಗರಿ ಗರಿ ಖಾಧಿದಾರಿಗಳಾಗಿ ಮಂತ್ರಿ ಮಹೋದಯರ ಸುತ್ತಲೂ ಠೇಂಕರಿಸುತ್ತಿದ್ದರು ಈಗಲೂ ಏನೂ ಬದಲಾಗಿಲ್ಲ ಆದರೆ ಶಿವಮೊಗ್ಗ ಪೋಲಿಸ್ ಇಲಾಖೆ ಅಪರಾದ ಮಾಡಿದವರ ಸುಧಾರಣೆ ಮಾಡಲು ಅವರನ್ನು ಸಮಾಜದ ಮುಖ್ಯವಾಹಿನಿಗೆ ತರಲು ಮುಂದಾಗಿರುವುದು ನಮ್ಮ ಸಂವಿದಾನದ ಆಶಯ ಕೂಡ ಆಗಿದೆ.