Blog number 1059. ಸ್ವಾಮಿ ಶಿವಾನಂದರ ಬ್ರಹ್ಮಚರ್ಯವೇ ಜೀವನ ವೀರ್ಯ ನಾಶವೇ ಮೃತ್ಯು ಎಂಬ ಪುಸ್ತಕ ಯೌವನ ಪೂರ್ವದಲ್ಲಿ ಓದಿದರೆ ಜೀವನವೇ ಬದಲಾಗುವುದು ಶಥ ಸಿದ್ದ.

#ಈ_ಪುಸ್ತಕ_ಓದಿದ್ದೀರಾ ?

#ಕನ್ನಡದಲ್ಲಿ_ಹನ್ನೊಂದು_ಸಾರಿ_ಮರುಮುದ್ರಣಗೊಂಡಿದೆ

#ಈ_ಪುಸ್ತಕ_ಪ್ರಭಾವದಿಂದ_ನಾನೂ_ನನ್ನ_ಗೆಳೆಯ_ಸಂನ್ಯಾಸಿ_ಆಗಲು_ಹೊರಟಿದ್ದೆವು

#ಕುಂದಾಪುರಕ್ಕೆ_ಹೋಗಿ_ಅಲ್ಲಿಂದ_ಅರಬ್ಬೀ_ಸಮುದ್ರದ_ತಟದಲ್ಲೇ_ನಡೆಯುತ್ತಾ_ಕನ್ಯಾಕುಮಾರಿ_ತಲುಪುವುದು

#ಬ್ರಹ್ಮಚರ್ಯವೇ_ಜೀವನ_ವೀಯ೯_ನಾಶವೇ_ಮೃತ್ಯು_ಪುಸ್ತಕದ_ಪ್ರಭಾವ.

#ಸ್ವಾಮಿ_ಶಿವಾನಂದರ_ಈ_ಪುಸ್ತಕ_ಓದಿದವರ_ಜೀವನ_ಕ್ರಮವೇ_ಬೇರೆ.

     ಐದನೇ ತರಗತಿಯಿಂದಲೇ ಯೋಗಾಸನ, ಈಜು, ಸೈಕಲ್ ಜೊತೆಗೆ ಸೂಯೋ೯ದಯಕ್ಕಿಂತ ಮೊದಲೇ ರನ್ನಿಂಗ್ ಶುರುವಾಗಿತ್ತು ಜೊತೆಗೆ ಸಮಾನ ಮನಸ್ಕ ನನಗಿಂತ ನಾಲ್ಕೈದು ವರ್ಷ ದೊಡ್ಡವನಾದ ಬಾಲ್ಯ ಗೆಳೆಯ ಪುಪ್ಪಾ ಆಲಿಯಾಸ್ ಸಿಲ್ವೆಸ್ಟರ್ ಡಿಕಾಸ್ಟ್.

    ಅವನೋ ಪುಸ್ತಕದ ಹುಳು, ಯಾವುದೇ ಪುಸ್ತಕ ಸಿಕ್ಕರೂ ಅದರ ಕೊನೆಯವರೆಗೆ ಓದದೇ ಕೈಬಿಡದವ, ಊಟ ತಿಂಡಿ ಕೂಡ ಅವನಿಗೆ ಪುಸ್ತಕದ ನಂತರದ ಅಧ್ಯತೆ.

   ನಾನು ಏಳನೆ ತರಗತಿಗೆ ಬರುವುದರಲ್ಲಿ ರಾಮಾಯಣ, ಮಹಾಭಾರತ ನಮ್ಮ ತಂದೆ ವೇದನಾರಾಯಣ ಭಟ್ಟರಿಂದ (ದ್ವಾರಕಾ ಸಂಶೋದಿಸಿದ S.R. ರಾವ್ ಇವರ ಮನೆಯಲ್ಲೆ ಜನಿಸಿದ್ದು) ತಂದು ಕೊಟ್ಟಿದ್ದರಿಂದ ಓದಿದ್ದೆ.

  ಇದರ ಮದ್ಯದಲ್ಲಿ ಈ ಪುಸ್ತಕ ಅದು ಹೇಗೋ ನಮಗೆ ಸಿಕ್ಕಿತ್ತು, ಇದನ್ನು ಎಷ್ಟು ಸಾರಿ ಓದಿದೆವು ಗೊತ್ತಿಲ್ಲ ಆದರೆ ಈ ಪುಸ್ತಕದ ಪ್ರಭಾವ ಇವತ್ತಿಗೂ ನನ್ನ ಜೀವನ ಮಾರ್ಗದ ಮಾರ್ಗದರ್ಶಿ ಆಗಿದೆ.

  ತಣ್ಣೀರು ಸ್ನಾನ, ಬರೀ ಚಾಪೆ ಮೇಲೆ ಮಲಗುವುದು, ಒದ್ದೆ ಮಾಡಿದ ಹನುಮಾನ್ ಕೌಪೀನ ದರಿಸುವುದು, ಮರದ ಪಾದುಕೆ ದರಿಸಿ ಓಡಾಡುವುದು, ಮೂತ್ರ ಮಾಡಿದಾಗ ನೀರು ಬಳಸಿ ತೊಳೆದುಕೊಳ್ಳುವುದು ಈ ಮೂಲಕ ಬ್ರಹ್ಮಚರ್ಯವೇ ಜೀವನ ಎಂಬ ತೀರ್ಮಾನಕ್ಕೆ ಬಂದಾಗಿತ್ತು.

  ಇಬ್ಬರೂ ಒಂದು ನಿರ್ದಾರಕ್ಕೆ ಬಂದಾಗಿತ್ತು ಅದೇನೆಂದರೆ ಕನ್ಯಾಕುಮಾರಿಗೆ ತಲುಪಿ ಅಲ್ಲಿನ ರಾಮಕೃಷ್ಣಾಶ್ರಮದಲ್ಲಿ ಸನ್ಯಾಸಿ ಆಗಿ ಬಿಡುವುದು ಇದು ಈಗ ನೆನಪಿಸಿಕೊಂಡರೆ ತಮಾಷೆ ಅನ್ನಿಸಿದರು ಅವತ್ತಿಗೆ ನಮ್ಮ ಜೀವನದ ಬಹುದೊಡ್ಡ ಗುರಿ ಆಗಿತ್ತು.

   ಗೆಳೆಯ ಇದಕ್ಕಾಗಿ ಕನ್ಯಾಕುಮಾರಿ ತಲುಪಲು ಶಾಲೆಯ ಭೂಪಟ ಅಭ್ಯಯಿಸಿ ನಕ್ಷೆ ತಯಾರಿಸಿದ್ದ, ನಮ್ಮ ಆನಂದಪುರಂನಿಂದ ಮಧ್ಯಾಹ್ನ ಒಂದು ಗಂಟೆಗೆ ಶಿಕಾರಿಪುರದಿಂದ ಹೊಸನಗರ ಹೋಗುವ ಗಜಾನನ ಬಸ್ಸಿನಲ್ಲಿ ಹೊಸನಗರ ತಲುಪುವುದು ಅಲ್ಲಿಂದ ಬೇರೆ ಬಸ್ಸಲ್ಲಿ ಕುಂದಾಪುರ ತಲುಪಿ ಅಲ್ಲಿನ ಸಮುದ್ರ ದಂಡೆಯಲ್ಲೇ ನಡೆಯುತ್ತಾ ಕನ್ಯಾಕುಮಾರಿ ತಲುಪುವುದು!.

  ದಾರಿಯ ಮೇಲೆ ಒ0ದೊತ್ತು ಮಾತ್ರ ಗಂಜಿ ಸೇವಿಸುವುದು, ಸ್ನಾನ ನಿದ್ದೆ ಕಡಲ ತೀರದಲ್ಲೇ ಅಂತ ತೀರ್ಮಾನಿಸಿ ಒಂದು ಗೋಣಿ ಚೀಲದಲ್ಲಿ ಅಕ್ಕಿ ಉಪ್ಪು ಮತ್ತು ಗಂಜಿ ಮಾಡಲು ಒಂದು ಪಾತ್ರೆ, ಗಂಜಿ ಬಡಿಸಿಕೊಳ್ಳುವ ಚಮಚ, ಎರೆಡು ತಟ್ಟೆ, ನೀರಿನ ಲೋಟ, ಚಾಪೆ ಮತ್ತು ನಮ್ಮಿಬ್ಬರ ಬಟ್ಟೆ ಮತ್ತು ಕೆಲವು ಪುಸ್ತಕ ಗೋಣಿ ಚೀಲದಲ್ಲಿ ಹಾಕಿ ಊರಿನ ಮುಸ್ಲಿಂ ಸ್ಮಶಾನದಲ್ಲಿ ಅಡಿಗಿಸಿಟ್ಟಿದ್ದೆವು.

   ಕುಂದಾಪುರ ತಲುಪಲು ಬೇಕಾದ 20 ರೂಪಾಯಿ ಒಟ್ಟು ಮಾಡಿಕೊಂಡು ನಿಶ್ಚಿತ ಜಾಗದಲ್ಲಿ ಕಾದು ನಿಂತರೆ ಅಲ್ಲಿಗೆ ಗೋಣಿ ಚೀಲದ ಜೊತೆ ಬರಬೇಕಾದ ಪುಪ್ಪಾ ಬರಲೇ ಇಲ್ಲ... ಗಜಾನನ ಬಸ್ಸು ಹೋದ ನಂತರ ಬಂದವ ತನ್ನ ತಾಯಿ ಬಿಟ್ಟು ಬರಲಾರದ ಅಸಹಾಯಕತೆ ಹೇಳಿಕೊಂಡ ನನಗೋ ನನ್ನ ಬಾಲ್ಯದಲ್ಲೇ ತಾಯಿ ಕಳೆದುಕೊಂಡಿದ್ದೆ.

  ನಂತರ ಗೋಣಿ ಚೀಲ ಸ್ವಸ್ಥಾನ ತಲುಪಿತು ಹೀಗೆ ಪ್ರಭಾವ ಬೀರಿದ ಪುಸ್ತಕವೆ ಸ್ವಾಮಿ ಶಿವಾನಂದರು ಬರೆದ #ಬ್ರಹ್ಮಚಾರ್ಯವೇ_ಜೀವನ_ವೀರ್ಯ_ನಾಶವೇ_ಮೃತ್ಯು ಎಂಬ ಪುಸ್ತಕ ಇದನ್ನು ಕನ್ನಡಕ್ಕೆ ಅನುವಾದಿಸಿದವರು ಈಶ್ವರ ಸಣಕಲ್ಲ ರಬಕವಿ, ಇದನ್ನು ಪ್ರಕಟಿಸಿದವರು ಸಮಾಜ ಪುಸ್ತಕಾಲಯ ಶಿವಾಜಿ ಬೀದಿ ದಾರವಾಡ.

  ಇಂಗ್ಲೀಷ್ ನಲ್ಲಿ Chastity is life, sensuality is death ಮತ್ತು ಹಿಂದಿಯಲ್ಲಿ ಬ್ರಹ್ಮಚರ್ಯ ಹೈ ಜೀವನ್ - ವೀರ್ಯನಾಶಿಸೆ ಮೃತ್ಯು ಹೈ ಎಂಬ ಪುಸ್ತಕಗಳು ಪ್ರಸಿದ್ದಿ ಪಡೆದಿದೆ.

  177 ಪುಟಗಳ ಈ ಪುಸ್ತಕ ಕನ್ನಡದಲ್ಲಿ 1931 ರಲ್ಲಿ ಮೊದಲ ಮುದ್ರಣವಾಗಿ 2003ರ ವರೆಗೆ ಹನ್ನೊಂದು ಮುದ್ರಣವಾಗಿದೆ.

   ಈ ಪುಸ್ತಕದ ರೀತಿ ಸನ್ಯಾಸ ಜೀವನ ನಿಜವಾಗಿ ಆಚರಿಸುವವರು ಜೈನ ಮುನಿಗಳು ಮಾತ್ರ, ಈ ಪುಸ್ತಕ ಒಮ್ಮೆ ಓದಿದ ಹದಿಹರೆಯದ ಬಾಲಕ ತುಂಬಾ ಬದಲಾವಣೆ ಕಂಡುಕೊಳ್ಳುತ್ತಾನೆ, ಕನಿಷ್ಟ ಏಕ ಪತ್ನಿ ವೃತಸ್ಥ ಆಗೇ ಆಗುತ್ತಾನೆ, ರೋಡ್ ರೋಮಿಯೋ ಅತ್ಯಾಚಾರಿ ಆಗಲು ಸಾಧ್ಯವೇ ಇಲ್ಲ.

    ಈ ಪುಸ್ತಕ ಸನ್ಯಾಸದ ಹೆಸರಲ್ಲಿ ಮಠಾದೀಶರಾಗಿ ಅತ್ಯಾಚಾರ ಅನಾಚಾರದಿಂದ ಜೈಲು ಸೇರುವ ಸ್ವಾಮಿಗಳಿಗೆ ಸನ್ಯಾಸಾಶ್ರಮ ಸ್ವೀಕಾರಕ್ಕೆ ಮೊದಲೇ ಓದಲು ಕೊಟ್ಟಿದ್ದರೆ ಖಂಡಿತಾ ಅವರು ಸಚ್ಚಾರಿತ್ಯದಲ್ಲಿ ಇರುತ್ತಿದ್ದರೆಂದು ನನ್ನ ಅನಿಸಿಕೆ.

   ಈ ಪುಸ್ತಕದ ಪ್ರಭಾವ ಹೊಂದಿದ ಅನೇಕರು ಅವರ ಜೀವನ ಶೈಲಿ ಮಾದರಿಯಾಗಿ ಇರುವುದು ನಾನು ನೋಡಿದ್ದೇನೆ.