ಭಾಗ_9_ಘಟ್ಟಕ್ಕೆ_ಕರಾವಳಿ_ಭಾಗದ_ಜನರ_ವಲಸೆ.
#ಘಟ್ಟಕ್ಕೆ_ವಲಸಿಗರು_ತಂದ_ಕರಾವಳಿ_ದೈವಗಳು.
ನಿಮ್ಮ ಕುಟುಂಬ ಕರಾವಳಿಯಿಂದ ಘಟ್ಟಕ್ಕೆ ಬಂದು ನೆಲೆಸಿದ್ದಾ ?...
ನಿಮ್ಮ ಕುಟುಂಬದ ಆರಾದನೆಯ ದೈವಗಳ ಬಗ್ಗೆ ನಿಮಗೆ ಯಾವುದಾದರೂ ಮಾಹಿತಿ ಗೊತ್ತಿದೆಯಾ....
ನನ್ನ ಈ ಸರಣಿ ಲೇಖನ 1850 ರಿಂದ 1950 ರ ವರೆಗೆ ಕರಾವಳಿಗರು ಘಟ್ಟಕ್ಕೆ ಕೂಲಿ ಕಾರ್ಮಿಕರರಾಗಿ ಸತತ ಒಂದು ನೂರು ವರ್ಷದ ಇತಿಹಾಸದ ಮೇಲೆ ಹೆಚ್ಚು ಕೇಂದ್ರಿಕೃತವಾಗಿದ್ದರೂ ಅದಕ್ಕೂ ಹಿಂದಿನ ಶತಮಾನಗಳ ವಲಸೆ ಮತ್ತು ನಂತರದ ವಲಸೆ ವಿವರ ನೀಡದಿದ್ದರೆ ಈ ಲೇಖನ ಪೂರ್ಣ ಆಗುವುದಿಲ್ಲ.
ಆದ್ದರಿಂದ ಹಿಂದಿನ ಭಾಗ -8 ರಲ್ಲಿ
8ನೇ ಶತಮಾನದಲ್ಲಿ ಆದಿ ಶಂಕರಾಚಾರ್ಯರ ಕಾಲದಿಂದ ಆದ್ಯಾತ್ಮಿಕವಾಗಿ ಪ್ರಾರಂಭವಾಗಿ ನಂತರ ಅರಸರ ಆಶ್ರಯ, ಕೃಷಿ ವಿಸ್ತರಣೆ, ರಾಜತಾಂತ್ರಿಕತೆ ಮತ್ತು ಮಸಾಲೆ ಪದಾರ್ಥಗಳ ಶ್ರೀಮಂತ ವ್ಯಾಪಾರಕ್ಕಾಗಿ ನಡೆದ ವಲಸೆ ಉಲ್ಲೇಖ ಮಾಡಿದ್ದೇನೆ.
ಮುಂದಿನ ಭಾಗಗಳಲ್ಲಿ ಇನ್ನೂ ಹೆಚ್ಚಿನ ಬೇರೆ ಬೇರೆ ವಲಸೆಗಳ ಮಾಹಿತಿಯೊಂದಿಗೆ ಈ ಲೇಖನ ಸರಣಿ ಮುಂದುವರಿಯಲಿದೆ.
ಈ ಲೇಖನ ಸರಣಿ ಓದಿ ಅನೇಕರು ಮಾಡಿರುವ ಪ್ರತಿಕ್ರಿಯೆಗಳನ್ನು ಮುಂದೆ ಪುಸ್ತಕ ರೂಪಕ್ಕೆ ತರುವಾಗ ಬಳಸಿಕೊಳ್ಳಲು ಸಂಗ್ರಹಿಸಿ ಇಟ್ಟುಕೊಂಡಿದ್ದೇನೆ.
ಘಟ್ಟ ಪ್ರದೇಶದಲ್ಲಿ ಈಗ ಖಾಯಂ ವಾಸಿಗಳಾಗಿ ನೆಲೆಸಿದ ಸಾವಿರಾರು ಕುಟುಂಬಗಳಿಗೆ ತಮ್ಮ ಪೂರ್ವಜರು ಎಲ್ಲಿಂದ ಬಂದರು? ಏಕೆ ಬಂದರು? ಅವರ ಕಷ್ಟ ನಷ್ಟಗಳು ಎಷ್ಟು ಎಂದು ತಿಳಿಯಲು ಈ ಲೇಖನಗಳು ಉಪಯೋಗಕ್ಕೆ ಬಂದರೆ ನಾನು ಧನ್ಯ.
#ಘಟ್ಟಕ್ಕೆ_ವಲಸಿಗರ_ಜೊತೆ_ಬಂದ_ದೈವಗಳು.
ಕರಾವಳಿ ಜನರ ವಲಸೆಯ ಇತಿಹಾಸದಲ್ಲಿ ದೈವಗಳು ಕೇವಲ ಧಾರ್ಮಿಕ ನಂಬಿಕೆಯಾಗಿ ಉಳಿಯಲಿಲ್ಲ ಅವು ವಲಸಿಗರ ಒಂಟಿತನಕ್ಕೆ ಆಸರೆಯಾಗಿ, ಜಮೀನ್ದಾರರ ಶೋಷಣೆಯ ವಿರುದ್ಧ ಆಂತರಿಕ ಶಕ್ತಿಯಾಗಿ ಮತ್ತು ಮಲೆನಾಡಿನ ಮಣ್ಣಿನಲ್ಲಿ ಅವರ ಅಸ್ತಿತ್ವವನ್ನು ಗಟ್ಟಿಗೊಳಿಸಿದ 'ಆತ್ಮರಕ್ಷಕ ಕಾವಲುಗಾರರು' ಆಗಿ ಜೊತೆನಡೆದವು.
ಕರಾವಳಿಯ ತುಳುನಾಡ ಜನರು ಉದ್ಯೋಗ, ಕೃಷಿ ಮತ್ತು ಬದುಕಿನ ಅನಿವಾರ್ಯತೆಗಾಗಿ ಮಲೆನಾಡು ಹಾಗೂ ಒಳನಾಡಿಗೆ ವಲಸೆ ಹೋದಾಗ ಅವರು ಕೇವಲ ತಮ್ಮ ಬಟ್ಟೆಬರೆಗಳನ್ನು ಮಾತ್ರ ಮೂಟೆ ಕಟ್ಟಿಕೊಳ್ಳಲಿಲ್ಲ ತಮ್ಮ ಜೊತೆಗೆ ತಾಯ್ನಾಡಿನ ಅತ್ಯಂತ ಗಟ್ಟಿಯಾದ ಸಾಂಸ್ಕೃತಿಕ ಬೇರಾದ 'ದೈವಾರಾಧನೆ'ಯನ್ನು ಹೊತ್ತು ತಂದರು.
ಮಲೆನಾಡಿನ ದಟ್ಟ ಕಾಡುಗಳು ಮತ್ತು ಅಡಿಕೆ ತೋಟಗಳಲ್ಲಿ ನೆಲೆನಿಂತ ಕರಾವಳಿಯ ಶ್ರಮಜೀವಿಗಳಿಗೆ ಬಿಲ್ಲವರು, ಪೂಜಾರರು, ಕೊರಗರು, ಕೂಸಾಳರು, ದೇವಾಡಿಗರು, ಬಂಟರು,ಮೊಗೇರರು, ಗೊಲ್ಲರು ಇತ್ಯಾದಿ ಜನರಿಗೆ ಧೈರ್ಯ ಮತ್ತು ಆತ್ಮವಿಶ್ವಾಸ ನೀಡಿದ್ದು ಅವರ ಜೊತೆಯಲ್ಲೇ ವಲಸೆ ಬಂದ ಕರಾವಳಿ ದೈವಗಳು.
ಕರಾವಳಿಗರ ವಲಸೆಯ ಜೊತೆಜೊತೆಗೇ ಸಾಗಿ ಇಂದು ಮಲೆನಾಡಿನಲ್ಲೂ ನೆಲೆನಿಂತಿರುವ ಪ್ರಮುಖ ದೈವಗಳಾದ
ಕರಾವಳಿಯಲ್ಲಿ ಅತ್ಯಂತ ಶಕ್ತಿಶಾಲಿ ಮತ್ತು ಜನಪ್ರಿಯ ದೈವವಾದ ಪಂಜುರ್ಲಿ ಇದು ಕಾಡುಹಂದಿಯ ಸಂಕೇತವಾದ ಈ ದೈವ ವಲಸೆಗಾರರ ಜೊತೆಗೆ ಮಲೆನಾಡಿಗೆ ಸಾಗಿಬಂದ ಮೊದಲ ದೈವ ಎನ್ನುತ್ತಾರೆ.
ಮಲೆನಾಡಿನ ಅಡಿಕೆ ತೋಟಗಳು ಮತ್ತು ಗದ್ದೆಗಳನ್ನು ಕಾಡುಹಂದಿಗಳ ಕಾಟದಿಂದ ಹಾಗೂ ಪ್ರಕೃತಿ ವಿಕೋಪದಿಂದ ರಕ್ಷಿಸಲು ಕರಾವಳಿಯ ಕಾರ್ಮಿಕರು ಪಂಜುರ್ಲಿಯನ್ನು ಕೃಷಿ ರಕ್ಷಕ ಎಂದು ನಂಬಿ ಪ್ರಾರ್ಥಿಸುತ್ತಿದ್ದರು.
ಕುವೆಂಪು ಅವರ ಮಲೆಗಳಲ್ಲಿ ಮದುಮಗಳು ಕಾದಂಬರಿಯಲ್ಲಿ ತುಳುವ ಐತ ಮತ್ತು ಅವನ ಸಂಗಡಿಗರು ಕಾಡಿನ ಬೇಟೆಗೆ ಹೊರಡುವಾಗ ಪಂಜುರ್ಲಿಯನ್ನು ನೆನೆಯುವ ಪ್ರಸಂಗಗಳು ಈ ದೈವ ವಲಸಿಗರ ಬದುಕಿಗೆ ಎಷ್ಟು ಹತ್ತಿರವಾಗಿತ್ತು ಎಂಬುದನ್ನು ತೋರಿಸುತ್ತವೆ.
ಅಣ್ಣ-ತಂಗಿಯರಾದ ಕಲ್ಕುಡ ಮತ್ತು ಕಲ್ಲುರ್ಟಿ ದೈವಗಳು ಕರಾವಳಿಯ ಜನರ ಕಷ್ಟಸಹಿಷ್ಣುತೆ ಹಾಗೂ ಶ್ರಮ ಸಂಸ್ಕೃತಿಯ ಪ್ರತೀಕಗಳು.
ಕರಾವಳಿಯ ಶಿಲ್ಪಿಗಳು, ಮೇಸ್ತ್ರಿಗಳು ಮತ್ತು ಕಠಿಣ ದೈಹಿಕ ಶ್ರಮದ ಕೆಲಸಗಾರರು ಮಲೆನಾಡಿಗೆ ವಲಸೆ ಬಂದಾಗ ತಮಗೆ ಯಾವುದೇ ಅಪಘಾತಗಳಾಗದಂತೆ ರಕ್ಷಿಸಲು ಈ ದೈವಗಳನ್ನು ಕರೆತಂದರು.
ಮಲೆನಾಡಿನ ಜಮೀನ್ದಾರರಿಂದ ವಲಸೆ ಕಾರ್ಮಿಕರ ಮೇಲೆ ನಡೆಯುತ್ತಿದ್ದ ಶೋಷಣೆ ಮತ್ತು ಅನ್ಯಾಯದ ಸಂದರ್ಭಗಳಲ್ಲಿ ಈ ದೈವಗಳು ತಮಗೆ ನ್ಯಾಯ ಒದಗಿಸುತ್ತವೆ ಎಂಬ ದೃಢ ನಂಬಿಕೆ ವಲಸಿಗರಲ್ಲಿತ್ತು.
ತುಳುನಾಡಿನ ವೀರ ಪುರುಷರಾದ ಅವಳಿ ಸೋದರರು ಕೋಟಿ-ಚೆನ್ನಯ್ಯ ಮುಖ್ಯವಾಗಿ ಬಿಲ್ಲವ ಮತ್ತು ಇತರ ಶ್ರಮಜೀವಿ ಸಮುದಾಯಗಳ ಆರಾಧ್ಯ ದೈವಗಳು.
ಕರಾವಳಿಯಿಂದ ಮಲೆನಾಡಿಗೆ ವಲಸೆ ಬಂದು ಗೇಣಿದಾರರಾಗಿ ದುಡಿಯುತ್ತಿದ್ದ ಜನರಿಗೆ ಕೋಟಿ-ಚೆನ್ನಯ್ಯರ ಕಥೆಗಳು ಪಾಡ್ದನಗಳು ಸ್ವಾಭಿಮಾನದಿಂದ ಬದುಕಲು ಪ್ರೇರಣೆ ನೀಡುತ್ತಿದ್ದವು.
ಗೇಣಿ ಚಳವಳಿ ಅಥವಾ ಕಾಗೋಡು ಸತ್ಯಾಗ್ರಹದಂತಹ ಹೋರಾಟಗಳ ಕಾಲದಲ್ಲಿ ಶೋಷಣೆಯ ವಿರುದ್ಧ ಧ್ವನಿ ಎತ್ತಲು ಕರಾವಳಿಯ ರೈತರಿಗೆ ಈ ವೀರ ದೈವಗಳ ನಂಬಿಕೆಯೇ ಬೆನ್ನೆಲುಬಾಗಿತ್ತು.
ಕರಾವಳಿಯಿಂದ ಒಳನಾಡಿಗೆ ಕೇವಲ ಕೂಲಿಯಾಳುಗಳಷ್ಟೇ ಅಲ್ಲದೆ ಕೆಳದಿ ಅರಸರ ಕಾಲದಲ್ಲಿ ಕೃಷಿ ಮತ್ತು ಉದ್ಯಮ ನಡೆಸಲು ಗೌಡರು, ಬಂಟರು ಹಾಗೂ ಸಾರಸ್ವತರು ವಲಸೆ ಬಂದರು.
ಇವರ ಜೊತೆಗೆ ಜುಮಾದಿ ಸಾರಾಳ ಜುಮಾದಿ ಮತ್ತು ಅವರ ರಕ್ಷಕ ಬಂಟ ದೈವಗಳು ಘಟ್ಟ ಹತ್ತಿ ಮಲೆನಾಡಿಗೆ ಬಂದವು.
ಇಂದಿಗೂ ಶಿವಮೊಗ್ಗ, ಚಿಕ್ಕಮಗಳೂರು ಮತ್ತು ತೀರ್ಥಹಳ್ಳಿಯ ಹಳ್ಳಿಗಳಲ್ಲಿ ಕರಾವಳಿ ಮೂಲದ ಕುಟುಂಬಗಳು ಸ್ಥಾಪಿಸಿರುವ ಸಣ್ಣ ಸಣ್ಣ ಗುಡಿಗಳಲ್ಲಿ ಈ ದೈವಗಳ ಆರಾಧನೆ ನಡೆಯುತ್ತದೆ.
ಇತ್ತೀಚಿನ ದಶಕಗಳಲ್ಲಿ ಕರಾವಳಿಯಿಂದ ಒಳನಾಡಿಗೆ ಉದ್ಯೋಗ, ಶಿಕ್ಷಣ ಮತ್ತು ವ್ಯಾಪಾರಕ್ಕಾಗಿ ವಲಸೆ ಬಂದ ಯುವ ಪೀಳಿಗೆಯ ಮೂಲಕ ಕೊರಗಜ್ಜ ದೈವದ ನಂಬಿಕೆ ಮಲೆನಾಡು ಹಾಗೂ ಹಳೇ ಮೈಸೂರು ಭಾಗದ ನಗರಗಳಿಗೂ ಅತ್ಯಂತ ವೇಗವಾಗಿ ವಲಸೆ ಬಂದಿದೆ.
ಕಳೆದುಹೋದ ವಸ್ತುಗಳನ್ನು ಹುಡುಕಿಕೊಡುವ ಕಷ್ಟಕಾಲದಲ್ಲಿ ತಕ್ಷಣ ಕೈಹಿಡಿಯುವ ದೈವವಾಗಿ ಕೊರಗಜ್ಜ ಇಂದು ಒಳನಾಡಿನ ಜನರ ನಂಬಿಕೆಯೂ ಆಗಿದೆ.
ಕರಾವಳಿಯ ದೈವಗಳು ಮಲೆನಾಡಿಗೆ ಬಂದಾಗ ಅವು ಸ್ಥಳೀಯ ಮಲೆನಾಡಿನ ದೇವತೆಗಳಾದ ಗುತ್ಯಮ್ಮ, ಚೌಡಿ, ಮತ್ತು ಕಾಡಿನ ಭೂತಗಳ ಜೊತೆಗೆ ಸಂಘರ್ಷಕ್ಕಿಳಿಯದೆ ಸಹಬಾಳ್ವೆ ನಡೆಸಿದವು "ನಮ್ಮ ದೈವ ನಿಮ್ಮ ಭೂತ ಒಂದೇ" ಎಂಬ ಭಾವನೆ ಮೂಡಿತು.
ಒಳನಾಡಿನ ತೋಟದ ಸಾಲುಗಳಲ್ಲಿ ರಾತ್ರಿ ಹೊತ್ತು ಕರಾವಳಿಯ ವಲಸಿಗರು ಹಾಡುತ್ತಿದ್ದ 'ಪಾಡ್ದನಗಳು' ತುಳು ಮೌಖಿಕ ಮಹಾಕಾವ್ಯಗಳು ಮಲೆನಾಡಿನ ಕಣಿವೆಗಳಲ್ಲಿ ಪ್ರತಿಧ್ವನಿಸಿ ಅಲ್ಲಿನ ಜನರಿಗೂ ಕರಾವಳಿಯ ವೀರರ ಕಥೆಗಳನ್ನು ತಲುಪಿಸಿದವು.
ಕರಾವಳಿ ಜನರ ವಲಸೆಯ ಇತಿಹಾಸದಲ್ಲಿ ದೈವಗಳು ಕೇವಲ ಧಾರ್ಮಿಕ ನಂಬಿಕೆಯಾಗಿ ಉಳಿಯಲಿಲ್ಲ ಅವು ವಲಸಿಗರ ಒಂಟಿತನಕ್ಕೆ ಆಸರೆಯಾಗಿ, ಜಮೀನ್ದಾರರ ಶೋಷಣೆಯ ವಿರುದ್ಧ ಆಂತರಿಕ ಶಕ್ತಿಯಾಗಿ ಮತ್ತು ಮಲೆನಾಡಿನ ಮಣ್ಣಿನಲ್ಲಿ ಅವರ ಅಸ್ತಿತ್ವವನ್ನು ಗಟ್ಟಿಗೊಳಿಸಿದ 'ಆತ್ಮರಕ್ಷಕ ಕಾವಲುಗಾರರು' ಆಗಿ ಜೊತೆನಡೆದವು.
#coastal #karavali #migration #dieties #westernghats.
Comments
Post a Comment