BLOG NUMBER 982. ವರದಳ್ಳಿ ಶ್ರೀದರ ಸ್ವಾಮಿ ಆಶ್ರಮದ ನೂತನ ಅಧ್ಯಕ್ಷರಾಗಿರುವ ನನ್ನ ಆತ್ಮೀಯ ಮಿತ್ರ ಸಜ್ಜನ ಎಂ.ಜಿ.ಕೃಷ್ಣಮೂರ್ತಿ ಅವರಿಗೆ ಅಭಿನಂದನೆಗಳು

#ಹಿರಿಯ_ಸಜ್ಜನ_ಮಾಜಿ_ಜಿಲ್ಲಾಪಂಚಾಯತ್_ಸದಸ್ಯ_ಎಂ_ಜಿ_ಕೃಷ್ಣಮೂರ್ತಿ

#ವರದಳ್ಳಿ_ಶ್ರೀದರಾಶ್ರಮದ_ನೂತನ_ಅಧ್ಯಕ್ಷರು.

#ಜಿಲ್ಲಾಪಂಚಾಯತ್_ಸಭೆಯಲ್ಲಿ_ನನ್ನ_ಜೊತೆಗಾರರು.

#ಮಹಾರಾಜ_ಕಾಲೇಜಿನಲ್ಲಿ_ಉನ್ನತ_ವ್ಯಾಸಂಗ_ಮಾಡಿದವರು

#ವರದಳ್ಳಿಯಲ್ಲಿ_2011ರಲ್ಲಿ_ನನ್ನ_ಎತ್ತಿನಗಾಡಿ_ಯಾತ್ರೆ_ಸಂದರ್ಭದಲ್ಲಿ

#ಶೂದ್ರ_ದಲಿತರ_ಜೊತೆ_ಸಾಮೂಹಿಕ_ಬೋಜನ_ಮಾಡಿದ್ದರು.

#ಶ್ರೀಧರ_ಸ್ವಾಮಿಗಳು_ಶೂದ್ರರಿಗೆ_ಪ್ರತ್ಯೇಕ_ಪಂಕ್ತಿ_ಊಟ_ಬಡಿಸಲು_ಹೇಳಿದ್ದಾರೆಂಬುದು_ಸತ್ಯವಾ?

 #ನೂತನ_ಅಧ್ಯಕ್ಷರು_ಈ_ತಾರತಮ್ಯ_ಬದಲಿಸ_ಬಹುದಾ?

   

1995-2000 ಇಸವಿಯಲ್ಲಿ ಎಂ.ಜಿ. ಕೃಷ್ಣಮೂರ್ತಿ ಯಡಜಿಗಳೆಮನೆ ಕ್ಷೇತ್ರದಿಂದ ಜಿಲ್ಲಾ ಪಂಚಾಯತ್ ಸದಸ್ಯರು ನಾನು ಆನಂದಪುರಂ ಕ್ಷೇತ್ರದಿಂದ ಇಬ್ಬರೂ 5 ವರ್ಷ ಜಿಲ್ಲಾ ಪಂಚಾಯತ್ ಸಭೆಯಲ್ಲಿ ಒಟ್ಟಿಗೆ ಕುಳಿತು ಕಲಾಪ ನಡೆಸಿದ್ದೆವು.

   ಈಗ ಎಂ.ಜಿ. ಕೃಷ್ಣಮೂರ್ತಿ ಸಾಗರ ತಾಲ್ಲೂಕಿನ ವರದಳ್ಳಿಯ ಶ್ರೀದರ ಸ್ವಾಮಿಗಳ ಆಶ್ರಮದ ನೂತನ ಅಧ್ಯಕ್ಷರಾಗಿ ಆಯ್ಕೆ ಆಗಿದ್ದಾರೆ ಅವರಿಗೆ ಅಭಿನಂದಿಸುತ್ತೇನೆ.

   

ವರದಳ್ಳಿ ಶ್ರೀಧರ ಸ್ವಾಮಿಗಳ ಬಗ್ಗೆ ಕೇಳಿದ್ದು, ಓದಿದ್ದು ಮತ್ತು ಅವರ ಒಡನಾಡಿಗಳನ್ನ ಭೇಟಿ ಮಾಡಿದ್ದು ಬಿಟ್ಟರೆ ಅವರನ್ನ ಪ್ರತ್ಯಕ್ಷವಾಗಿ ನೋಡಿಲ್ಲ ನಾನು ತಪಸ್ವಿಯಾದ ಶ್ರೀದರ ಸ್ವಾಮಿಗಳ ಭಕ್ತನೂ ಹೌದು.

    ನಾವು ಚಿಕ್ಕವರಿದ್ದಾಗ ಪ್ರಾಥಮಿಕ ಶಾಲೆಯಲ್ಲಿ ವ್ಯಾಸಂಗ ಮಾಡುವಾಗ ಆಗಿನ ಕಾಲದ ಖ್ಯಾತ ಚಲನಚಿತ್ರ ನಟ ಉದಯ ಕುಮಾರ್ ಅರಳಿ ಮರದ ಗ್ಯಾರೇಜ್ ಹತ್ತಿರ ಬಂದಿದ್ದಾರೆ ಅಂತ ಊರಿನ ಜನರೆಲ್ಲ ಗುಂಪು ಗುಂಪಾಗಿ ಓಡುತ್ತಿದ್ದರು, ನಾವು ಚಿಕ್ಕ ಮಕ್ಕಳೆಲ್ಲ ಅವರನ್ನ ಹಿಂಬಾಲಿಸಿದೆವು.

      ಅಲ್ಲಿ ಒಂದು ಬಿಳಿ ಅಂಬಾಸಡರ್ ಕಾರು ನಿಂತಿದ್ದು ಅದರ ಅಡಿಯಲ್ಲಿ ಮಲಗಿ ಮೆಕ್ಯಾನಿಕ್ ದುರಸ್ತಿ ಮಾಡುತ್ತಿದ್ದರೆ ಎತ್ತರದ ಮಣ್ಣು ದಿಬ್ಬದ ಮೇಲೆ ನಮ್ಮ ನಟ ಉದಯ ಕುಮಾರ್ ಸಿಗರೇಟು ಸೇದಿ ಹೊಗೆ ಬಿಡುತ್ತಿದ್ದರು. ಯಾರೂ ಅವರ ಹತ್ತಿರ ಮಾತಾಡುವ ದೈಯ೯ ವಹಿಸಲಿಲ್ಲ ಆದರೆ ನೆರೆದ ಜನ ಮಾತಾಡಿಕೊಳ್ಳುತ್ತಿದ್ದ ಮಾತಿನ ಸಾರಾಂಶವೆಂದರೆ ವರದಳ್ಳಿಯಲ್ಲಿ ತಪಸ್ಸು ಮಾಡುತ್ತಿದ್ದ ಶ್ರೀಧರ ಸ್ವಾಮಿಗಳು ದೇಹತ್ಯಾಗ ಮಾಡಿದ್ದಾರೆ ಅದನ್ನ ಕೇಳಿ ಅವರ ಭಕ್ತ ಮತ್ತು ಶಿಷ್ಯರಾದ ಖ್ಯಾತ ಚಿತ್ರ ನಟ ಉದಯ ಕುಮಾರ್ ಬರುವಾಗ ಕಾರು ಹಾಳಾಗಿ ದುರಸ್ತಿಗಾಗಿ ನಿಂತಿದ್ದಾರೆ, ದುಃಖದಲ್ಲಿ ಇರೋದರಿಂದ ಆ ರೀತಿ ಸಿಗರೇಟು ಸೇದಿ ಬೂದಿ ಮಾಡುತ್ತಿದ್ದಾರೆ, ಅವರ ಹತ್ತಿರ ಯಾರೂ ಮಾತಾಡ ಬೇಡಿ ಅಂತ ಸೀನಿಯರ್ ಗಳು ಹೇಳುತ್ತಿದ್ದರು, ಬಹುಶಃ ಆಗಿನ ಸಿನಿಮಾದಲ್ಲಿ ವಿಲನ್ ಪಾತ್ರ ಮಾಡುತ್ತಿದ್ದ ಉದಯ ಕುಮಾರ್ ನೋಡಿ ಜನರಿಗೆ ಭಯವಿತ್ತು ಕಾಣುತ್ತೆ.

     ನಮ್ಮಮ್ಮ ಮತ್ತು ಅವರ ಪರಿವಾರಕ್ಕೆ  ಬಂದ ಮಾಹಿತಿ ''ಶ್ರೀದರ ಸ್ವಾಮಿಗಳು ತಪಸ್ಸಿಗೆ ಕುಳಿತುಕೊಂಡವರು ಅವರ ಶಿಷ್ಯರಿಗೆ ಯಾವುದೇ ಕಾರಣಕ್ಕೂ ತಮ್ಮನ್ನ ಸ್ಪಶ೯ ಮಾಡದಂತೆ ಹೇಳಿದ್ದರಂತೆ,ಎರಡು ದಿನದಿಂದ ಹಾಗೇ ತಪಸ್ಸಿಗೆ ಕುಳಿತದ್ದು ನೋಡಿ ಶಿಷ್ಯರು ಅವರನ್ನ ಮುಟ್ಟಿದ್ದರಿಂದ ಹೀಗಾಯಿತು, ದೇಹ ತ್ಯಾಗ ಮಾಡಿದ ಮೇಲೂ ಅವರ ಕಣ್ಣಲ್ಲಿ ನಿರಂತರ ನೀರು ಬರುತ್ತಿದೆ" ಇತ್ಯಾದಿ ಸುದ್ದಿಗಳು. (ಅನೇಕ ವದಂತಿಗಳು ಆಗ ಹರಡಿತ್ತು.)

     ಅವರ ಶಿಷ್ಯರು ಬೇಕಂತಲೆ ಸ್ವಾಮಿಗಳನ್ನ ಸಾಯಿಸಿದರೂ ಅಂತೆಲ್ಲ ಜನ ಮಾತಾಡುತ್ತಿದ್ದರು, ಅವತ್ತಿನ ಕಾಲದ ಏಕೈಕ ದಿನ ಪತ್ರಿಕೆ ಪ್ರಜಾವಾಣಿಯಲ್ಲಿ ಸ್ವಾಮಿಗಳ ಸಮಾದಿ ಮಾಡಿದ ವರದಿ, ಅಸಂಖ್ಯ ಜನ ಸೇರಿದ ಬಗ್ಗೆ ವಿವರವಾದ ವರದಿ ಬಂದಿತ್ತು.

     

 1978ರಲ್ಲಿ ಆನಂದಪುರದಿಂದ ನಿತ್ಯ ಸಾಗರಕ್ಕೆ ಹೆಚ್ಚಿನ ವ್ಯಾಸಂಗಕ್ಕೆ ಅನೇಕರು ರೈಲಿನಲ್ಲಿ ಹೋಗುತ್ತಿದ್ದರು, ನಾನು ಸಾಗರದ ಮುನ್ಸಿಪಲ್ ಹೈಸ್ಕೂಲ್ ನಲ್ಲಿ ಇಂಗ್ಲೀಷ್ ಮೀಡಿಯOಗಾಗಿ 8ನೇ ತರಗತಿ ಸೇರಿದ್ದೆ, ಆನಂದಪುರದ ಗಣಪತಿ ಶೇಟ್ ಅವತ್ತು ಎಲ್.ಬಿ. ಕಾಲೇಜಿನ ಖ್ಯಾತ ಬ್ಯಾಡ್ಮಿಂಟನ್ ಪ್ಲೇಯರ್, ನಾಗಜು೯ನ, ಮುರುಳಿ, ಪದ್ಮನಾಭ, ರಾಮಚಂದ್ರ ಜೋಯಿಸ್, ಚಂದ್ರು, ಶ್ರೀನಿವಾಸ ಹೀಗೆ ಅನೇಕರು ನಮ್ಮ ನಿತ್ಯ ಸಂಗಾತಿಗಳು,ಅವರೆಲ್ಲ ಒಂದು ದಿನ ರೈಲಲ್ಲಿ ಸಾಗರಕ್ಕೆ ಹೋಗುವಾಗ ಅವತ್ತು ಅವರೆಲ್ಲ ಕಾಲೇಜಿಗೆ ಚಕ್ಕರ್ ಹೊಡೆದು ವರದಳ್ಳಿಗೆ ಹೋಗುವ ಕಾಯ೯ಕ್ರಮ ನಿಗದಿ ಮಾಡಿದರು ಮತ್ತು ಜ್ಯೂನಿಯರ್ ಆದ ನಮಗೆಲ್ಲ ಸೇರಿಸಿಕೊಂಡರು, ರೈಲು ಇಳಿದವರೇ ವರದಳ್ಳಿಗೆ ಚಾರಣ ಅಲ್ಲಿ ನೀರಿನ ತೀಥ೯ದಲ್ಲಿ ತಣ್ಣನೆ ಸ್ನಾನ,ಮದ್ಯಾಹ್ನಅಲ್ಲಿ ಭಕ್ತರಿಗೆ ನೀಡುವ ದಾಸೋಹದಲ್ಲಿ ನಾವೆಲ್ಲ ಊಟ ಮಾಡಿ ಸಂಜೆ ಒಳಗೆ ಸಾಗರದ ರೈಲು ನಿಲ್ದಾಣ ಸೇರುವುದು ಅಂತ.

   

ಸಾಗರದ ನಿಲ್ದಾಣದಲ್ಲಿ ಇಳಿದವರೇ ವರದಳ್ಳಿಗೆ ಚಾರಣ ಪ್ರಾರಂಭಸಿದೆವು, ಸುಮಾರು 15 ರಿಂದ 16 ಜನ ವಿದ್ಯಾಥಿ೯ ವಿದ್ಯಾಥಿ೯ನಿಯರು ಒಟ್ಟಾಗಿ ಹೊರಟೆವು, ದಾರಿ ಮಧ್ಯದಲ್ಲೇ ನಮ್ಮ ನಿತ್ಯ ಬುತ್ತಿ ಖಾಲಿ ಮಾಡಿದೆವು, ಹೇಗಿದ್ದರೂ ವರದಳ್ಳಿಯ ನಿತ್ಯ ದಾಸೋಹ ಇರುತ್ತದಲ್ಲ ಅಂತ.         ಜೊತೆಯಲ್ಲಿದ್ದ ಹುಟ್ಟಿನಲ್ಲಿ ಬ್ರಾಹ್ಮಣನಾಗಿದ್ದ ಮಿತ್ರ ನಿತ್ಯ ಪಾಯಸ ಕೂಡ ಇರುತ್ತೆ ಅಂದಿದ್ದು ಕೂಡ ನಮ್ಮ ನಡುಗೆಯಲ್ಲಿ ಉತ್ಸಾಹ ಮೂಡಿಸಿತ್ತು.

   

ಸರಿಯಾಗಿ ಮದ್ಯಾಹ್ನ ವರದಳ್ಳಿ ತಲುಪಿದೆವು, 13 ಕಿಮಿ ಬಿರು ಬೇಸಿಗೆಯ ನಡುಗೆ ನಮ್ಮ ಶಕ್ತಿ ನಿತ್ರಾಣ ಮಾಡಿತ್ತು, ಶ್ರೀಧರ ತೀಥ೯ದಲ್ಲಿನ ಮನಸೋ ಇಚ್ಚೆಯ ಅಭ್ಯOಜನ ಮತ್ತು ಅವರ ಸಮಾದಿ ಸ್ಥಳಕ್ಕೆ ಮೆಟ್ಟಲೇರಿದ ಶ್ರಮ ಅಲ್ಲಿಂದ ಮುಂದೆ ದಮ೯ ಧ್ವಜ ಸ್ಥಳ ವೀಕ್ಷಣೆ ಮಾಡಿ ಊಟದ ಮನೆ ತಲುಪುವಾಗ ನಿತ್ರಾಣರಾಗಿದ್ದೆವು.

   ಆಗ ಈಗ ಇರುವಷ್ಟು ಜನ ದಟ್ಟನೆ ಇರಲಿಲ್ಲ ನಾವೆಲ್ಲ ಸೇರಿ ಅವತ್ತು ಅಲ್ಲಿ 60 ರಿಂದ 70 ಜನ ಇರಬಹುದು, ಊಟಕ್ಕೆ ಕರೆದರು, ಅದೇ ವೇಗದಲ್ಲಿ ಹಸಿದ ನಾವೆಲ್ಲ ಹೋಗಿ ಕುಳಿತೆವು, ಅನ್ನ ದೇವರ ಮುಂದೆ ಅನ್ಯ ದೇವರಿಲ್ಲ ಅಂತ ಸವ೯ಜ್ಞ ವಚನ ನೆನಪಾಯಿತು, ಆಗಲೇ ಅಲ್ಲಿನ ಬ್ರಾಹ್ಮಣೋತ್ತಮರು ಒಂದು ಆದೇಶ ನೀಡಿದರು ಜನಿವಾರ ಇರುವವರು ಅಂಗಿ ತೆಗೆದು ಇಲ್ಲಿ ಕುಳಿತುಕೊಳ್ಳಿ, ಉಳಿದವರು ಹೊರಗಡೆ ಕುಳಿತುಕೊಳ್ಳಿ ಅಂತ.

    ನಮಗೆ ಹಸಿವಿನ ಘೋರವಾದ ಸಂಕ್ರಮಣ ಕಾಲದಲ್ಲಿ ಈ ಆದೇಶ ಪಾಲಿಸದೆ ವಿಧಿ ಇರಲಿಲ್ಲ ಆದರೆ ಹಸಿವಿಗಿಂತ ಶೂದ್ರರಾಗಿದ್ದಕ್ಕೆ ಅನುಭವಿಸ ಬೇಕಾದ ಈ ಅವಮಾನ ವಿರೋದಿಸಲೇ ಬೇಕೆಂಬ ಹಠದಿಂದ ಎದ್ದು ಪಂಕ್ತಿ ಬಿಟ್ಟು ಹೊರಟೆವು, ಜನಿವಾರ ಇದ್ದ ಗೆಳೆಯರು ಗೌರವ ಪಡೆದು ಊಟಕ್ಕೆ ಉಳಿದರು, ಹಸಿವು ತಡೆಯದ ಜನಿವಾರ ಇಲ್ಲದ ಶೂದ್ರ ಗೆಳೆಯರು ಕೆಲವರು ಅಲ್ಲೇ ಅವರಿಗೆ ಮೀಸಲಿಟ್ಟ ಪ್ರತ್ಯೇಕ ಪಂಕ್ತಿಗೆ ರಾಜಿ ಆದರು.

     ಹಠಕ್ಕೆ ಬಿದ್ದ ನನ್ನನ್ನ ಕೈ ಬೆರಳೆಣಿಕೆಯ ಗೆಳೆಯರು ಹಿಂಬಾಲಿಸಿದರು ಆದರೆ ದಾರಿಯಲ್ಲಿ ಹಸಿವೆ ತಾಳದೇ ಅವರೆಲ್ಲ ನನ್ನ ನಿಧಾ೯ರ ಸರಿ ಅಲ್ಲ ಅಂದರು.

     ಇವತ್ತೂ ವರದಳ್ಳಿಯಲ್ಲಿ ಜಾತಿ ಬೇಧದ ಊಟದ ಪಂಕ್ತಿ ಇದೆ,ಈ ಬಗ್ಗೆ ಒಮ್ಮೆ ಮ೦ಚಾಲೆಯ ಕೃಷಿ ವಿಜ್ಞಾನಿ ಡಾಕ್ಟರ್ ವಿಘ್ನೇಶ್ ಮನೆಗೆ ಹೋದಾಗ ಅವರ ತಂದೆ ಶ್ರೀಧರ ಸ್ವಾಮಿಗಳ ಒಡನಾಡಿಗಳು ಸಿಕ್ಕಿದ್ದರು, ಅವರಲ್ಲಿ ಈ ಜಾತಿ ಬೇಧದ ಬಗ್ಗೆ ತಿಳಿಸಿದಾಗ ಅವರು ಶ್ರೀಧರ ಸ್ವಾಮಿಗಳೆ ಶೂದ್ರರಿಗೆ ಬೇರೆ ಪಂಕ್ತಿ ಊಟ ಹಾಕಲು ಹೇಳಿದ್ದರು ಅದಕ್ಕೆ ವರದಳ್ಳಿಯಲ್ಲಿ ಶೂದ್ರರಿಗೆ ಬೇರೆ ಪಂಕ್ತಿ ಊಟ ಅಂದಾಗ ನನಗೆ ನಿರಾಸೆ ಆಯಿತು, ಮನುಕುಲದ ಒಳಿತಿಗಾಗಿ ತಪಸ್ಸು ಮಾಡಿದ ಶ್ರೀಧರ ಸ್ವಾಮಿಗಳು ಹೀಗೆ ಹೇಳಿದರಾ? ....ಆದರೆ ಶ್ರೀಧರ ಸ್ವಾಮಿಗಳು ಹೇಳಿದರೋ ಬಿಟ್ಟರೋ ಅನುಮಾನವಿದೆ.

     

 ಸಾಗರ ತಾಲ್ಲೂಕ್ ಮತ್ತು ಹೊಸ ನಗರ ತಾಲ್ಲಕಿನಾದ್ಯಂತ ನಾನು ಮಾಹಿತಿ ಹಕ್ಕು ಮತ್ತು ಲೋಕಾಯುಕ್ತ ಕಾನೂನು ಜನ ಜಾಗೃತಿಗಾಗಿ  ಪ್ರಚಾರಕ್ಕಾಗಿ ಎತ್ತಿನ ಗಾಡಿ ಯಾತ್ರೆ ಮಾಡಿದಾಗ (2011ರಲ್ಲಿ) ವರದಳ್ಳಿ ಶ್ರೀಧರ ಆಶ್ರಮದಲ್ಲಿ ಒಂದು ರಾತ್ರಿ ನಮ್ಮ ಯಾತ್ರೆ ತಂಗುವುದಿತ್ತು, ಸಾಗರ ಪಟ್ಟಣದಲ್ಲಿ ಸಭೆ ಮುಗಿಸಿ ವರದಳ್ಳಿ ತಲುಪುವಾಗ ರಾತ್ರಿ ಆಗಿತ್ತು, ಅಲ್ಲಿ ನನಗೆ ಆಶ್ಚಯ೯ ಆಗಿದ್ದು ನನ್ನ ಜೊತೆ 1995-2000 ಇಸವಿಯಲ್ಲಿ ಜಿಲ್ಲಾ ಪಂಚಾಯತ್ ಸದಸ್ಯರಾಗಿದ್ದ ಎಂ.ಜಿ.ಕೃಷ್ಣಮೂತಿ೯ ಮತ್ತು ಸಂಗಡಿಗರು ನಮ್ಮನ್ನ ಸ್ವಾಗತಿಸಿದ್ದು, ಆಗ ಅವರು ವರದಳ್ಳಿ ಆಶ್ರಮದ ಅಧ್ಯಕ್ಷರಾಗಿದ್ದರು ಸಣ್ಣ ಸಭೆ, ಸನ್ಮಾನದ ನಂತರ ಅವರೆಲ್ಲ ಊಟಕ್ಕೆ ಕರೆದರು, ಆಯಿತು ಲೇಟಾಗಿದೆ ನೀವು ಹೊರಡಿ ನಂತರ ನಾವು ಊಟ ಮಾಡುತ್ತೇವೆ ಅಂದೆ, ಅಧ್ಯಕ್ಷರಾಗಿದ್ದ ಮಾಜಿ ಜಿಲ್ಲಾ ಪಂಚಾಯತ ಸದಸ್ಯ, ಬೆಂಗಳೂರಿನ ಮಹಾರಾಜ ಕಾಲೇಜಲ್ಲಿ ಉನ್ನತ ವ್ಯಾಸಂಗ ಮಾಡಿದ ಸಜ್ಜನ ಬ್ರಾಹ್ಮಣ ಎಂ.ಜಿ. ಕೃಷ್ಣಮೂರ್ತಿಯವರು ಎಲ್ಲರೂ ಒಟ್ಟಾಗಿ ಊಟ ಮಾಡೋಣ ನಿಮ್ಮ ಜೊತೆ ಊಟ ಮಾಡಲು ಕಾದಿದ್ದೇವೆ ಅಂದರು, ನಾನು ಅವರಿಗೆ ನಮ್ಮ ಯಾತ್ರೆಯಲ್ಲಿ ಶೂದ್ರಾತಿ ಶೂದ್ರರಲ್ಲದೆ, ದಲಿತರು, ಮುಸ್ಲಿಂ ಕ್ರಿಶ್ಚಿಯನ್ನರಿದ್ದಾರೆ ನೀವೆಲ್ಲ ಅವರ ಜೊತೆ ಬೋಜನ ಮಾಡಲು ಸಾಧ್ಯವಿಲ್ಲವಲ್ಲ ಅಂದೆ, ಅದಕ್ಕೆ ಅವರು

ಶ್ರೀಧರ ಸ್ವಾಮಿ ಇಂತದ್ದೆಲ್ಲ ಜಾತಿಯತೆ ಬೆಂಬಲಿಸಿಲ್ಲ ಮತ್ತು ಬೋದಿಸಿಲ್ಲ ಇಡೀ ಮಾನವ ಕಲ್ಯಾಣದ ಬಗ್ಗೆ ಅವರು ತಪಸ್ಸು ಮಾಡಿದವರು, ಬನ್ನಿ ಎಲ್ಲರೂ ಒಟ್ಟಿಗೆ ಊಟ ಮಾಡೋಣ ಅಂತ ಎಲ್ಲರನ್ನ ಕರೆದೊಯ್ದ ಒಂದೇ ಪಂಕ್ತಿಯಲ್ಲಿ ನಮ್ಮ ಜೊತೆ ಕುಳಿತು ಊಟ ಮಾಡಿದ್ದು ಆಶ್ಚ೯ಯವೇ ಸರಿ.

    33 ವಷ೯ದ ಹಿಂದೆ ಪಂಕ್ತಿಬೇದ ಮಾಡಿದ ಇಲ್ಲಿನ ಆಡಳಿತ ವಗ೯ವನ್ನ ವಿರೋದಿಸಿ ಊಟ ಬಿಟ್ಟು ಬಂದಿದ್ದ ನನಗೆ 33 ವಷ೯ದ ನಂತರ ಆಶ್ರಮದ ಅಧ್ಯಕ್ಷರಾದಿಯಾಗಿ ಅನೇಕ ಬ್ರಾಹ್ಮಣ ಮುಖಂಡರು ಜಾತಿ ಭೇದ ಮರೆತು ಸಹ ಪಂಕ್ತಿ ಬೋಜನ ಮಾಡಿದ್ದು ಒಂದು ಪವಾಡ ಅನ್ನಿಸಿತು.

   ನೂತನ ಅಧ್ಯಕ್ಷರಾಗಿ ಆಯ್ಕೆ ಆಗಿರುವ ವಿದ್ಯಾವಂತರು ಆಗಿರುವ ವರದಳ್ಳಿಯ ಸಮೀಪದವರೇ ಆದ ಎಂ.ಜಿ.ಕೃಷ್ಣಮೂರ್ತಿಗಳು ವರದಳ್ಳಿಯ ಈ ಪಂಕ್ತಿಬೇದಕ್ಕೆ ಇತಿಶ್ರೀ ಹೇಳಬಹುದೇನೋ ಎಂದು ನಿರೀಕ್ಷಿಸುತ್ತೇನೆ, ಪುರೋಹಿತರಿಗೆ ಅವರ ನಿಯಮಾನುಸಾರ ಪ್ರತ್ಯೇಕ ಬೋಜನ ವ್ಯವಸ್ಥೆ ಸರಿ ಆದರೆ ಅಲ್ಲಿಗೆ ಬರುವ ಭಕ್ತರಲ್ಲಿ ಶೂದ್ರರಿಗೆ ಪ್ರತ್ಯೇಕ ಬೋಜನ ಎಂಬ ಪದ್ಧತಿ ಸರಿ ಅಲ್ಲ.

  ಶ್ರೀಧರ ಸ್ವಾಮಿಗಳು ಈ ರೀತಿ ಶೂದ್ರರನ್ನು ಕನಿಷ್ಟವಾಗಿ ನಡೆಸಿಕೊಳ್ಳುವಂತೆ ಹೇಳಲು ಸಾಧ್ಯವೇ ಇಲ್ಲ ಜಗತ್ತಿನ ಸರ್ವ ಜೀವಿಗಳಲ್ಲೂ ಅವರು ದೇವರನ್ನು ಕಂಡವರು.