Blog number 841.ಆನಂದಪುರಂ ಇತಿಹಾಸ ಭಾಗ-74, ಮಂತ್ರಿಗಳಾಗಿದ್ದ ಬದರಿನಾರಾಯಣ ಅಯ್ಯಂಗಾರರ ತಂದೆ ಕೊಡುಗೈ ದಾನಿ ಜಮೀನ್ದಾರರಾದ ರಾಮಕೃಷ್ಣ ಅಯ್ಯಂಗಾರ್ ಅವರ ಪತ್ನಿ ಸ್ಮರಣಾರ್ಥ ಕಟ್ಟಿಸಿದ ಕನಕಮ್ಮಳ್ ಆಸ್ಪತ್ರೆಯಲ್ಲಿ ಸೇವೆ ಸಲ್ಲಿಸಿದ್ದ ಡಾ. ಸಣ್ಣಪ್ಪರ ಸ್ಮರಣೆ.
#ಆನಂದಪುರಂ_ಕನಕಮ್ಮಾಳ್_ಆಸ್ಪತ್ರೆಯ_ಪ್ರಸಿದ್ಧ_ಸರ್ಜನ್_ಆಗಿದ್ದ_ಡಾಕ್ಟರ್_ಸಣ್ಣಪ್ಪನವರು.
#ಆನಂದಪುರಂ_ರೋಟರಿ_ಕ್ಲಬ್_ಮೊದಲ_ಅಧ್ಯಕ್ಷರು
#ನಿವೃತ್ತರಾದ_ಮೇಲೆ_ಕರ್ನಾಟಕ_ರಾಜ್ಯ_ಈಡಿಗರ_ಸಂಘದ_ಅಧ್ಯಕ್ಷರಾಗಿದ್ದರು.
#ಇವರ_ಪತ್ನಿ_ಶ್ರೀಮತಿನಳಿನಾಕ್ಷಿಸಣ್ಣಪ್ಪ_ಕೂಡ_ರಾಜ್ಯ_ಮಹಿಳಾ_ಈಡಿಗ_ಸಮಾಜದ_ಅಧ್ಯಕ್ಷರಾಗಿದ್ದರು.
ಇವರು ಆನಂದಪುರಂನ ಕನಕಮ್ಮಳ್ ಆಸ್ಪತ್ರೆಗೆ ವೈದ್ಯರಾಗಿ ಬಂದಾಗ ಗ್ರಾಮೀಣ ಪ್ರದೇಶದಲ್ಲಿ ವೈದ್ಯಕೀಯ ಸೇವೆ ಮಾಡಬೇಕೆಂಬ ಹುಮ್ಮಸ್ಸು ತುಂಬಿದ ಬಿಸಿ ರಕ್ತದ ಯುವಕರು.
ಆನಂದಪುರಂನ ಕೊಡುಗೈ ದಾನಿ, ಇನಾಂದಾರರೂ ಸುಮಾರು ಎರೆಡು ಸಾವಿರ ಎಕರೆ ಜಮೀನು ಹೊಂದಿದ್ದ ಜಮೀನ್ದಾರ್ ರಾಮಕೃಷ್ಣ ಅಯ್ಯಂಗಾರರ ಪತ್ನಿ ಶ್ರೀ ಮತಿ ಕನಕಮ್ಮಾಳ್ ಇಹಲೋಕ ತ್ಯಜಿಸಿದಾಗ ಅವರ ಆಭರಣಗಳನ್ನು ಮಾರಾಟ ಮಾಡಿ ಹೊಸನಗರ ತಾಲ್ಲೂಕಿನ ಹುಣಸಳ್ಳಿಯಲ್ಲಿ ಅಡಿಕೆ ತೋಟ, ಜಮೀನು ಖರೀದಿಸುತ್ತಾರೆ.
ಆದರೆ ರಾಮಕೃಷ್ಣ ಆಯ್ಯಂಗಾರರಿಗೆ ತಮ್ಮ ಪತ್ನಿಯ ಹೆಸರು ಅಜರಾಮರ ಆಗಬೇಕು ಎಂಬ ಅದಮ್ಯ ಆಸೆಯಿಂದ ಹುಣಸಳ್ಳಿಯ ತೋಟ, ಜಮೀನು ಮನೆಗಳನ್ನು ಮಾರುತ್ತಾರೆ (ಇದನ್ನು ಖರೀದಿಸಿದವರು ಹೊಸನಗರ ತಾಲ್ಲೂಕಿನ ಮಾಜಿ ತಾಲ್ಲೂಕ್ ಬೋರ್ಡ್ ಅದ್ಯಕ್ಷರಾಗಿದ್ದ ಹುಣಸಳ್ಳಿ ಚಂದ್ರಶೇಖರ ಗೌಡರ ತಂದೆ).
ಆ ಹಣದಲ್ಲಿ ಆನಂದಪುರಂ ಬಸ್ ನಿಲ್ದಾಣದ ಪಕ್ಕದಲ್ಲಿನ ಅವರು ಖರೀದಿಸಿದ ವಿಶಾಲವಾದ ಜಮೀನಿನಲ್ಲಿ ತಮ್ಮ ಪತ್ನಿ ನೆನಪಿಗಾಗಿ ಶ್ರೀಮತಿ ಕನಕಮ್ಮಾಳ್ ಆಸ್ಪತ್ರೆ ಕಟ್ಟಿ ಸಾರ್ವಜನಿಕರಿಗೆ ವಹಿಸಿಕೊಡುತ್ತಾರೆ.
ಇದೇ ರೀತಿ ಅಕಾಲ ಮೃತ್ಯು ಹೊಂದಿದ ಮಗ ಜಗನ್ನಾಥ ಅಯ್ಯಂಗಾರ್ ಹೆಸರಲ್ಲಿ ಪಶು ವೈದ್ಯ ಶಾಲೆ, ಪ್ರೌಡ ಶಾಲೆಗಳನ್ನೂ ನಿರ್ಮಿಸುತ್ತಾರೆ.
ಕೆಳದಿ ಅರಸರಾದ ರಾಜವೆಂಕಟಪ್ಪ ನಾಯಕ ಮತ್ತು ರಾಣಿ ಚಂಪಕಳ ದುರಂತ ಪ್ರೇಮ ಕಥೆ ಇದಕ್ಕಾಗಿ ಚಂಪಕಳ ಸ್ಮಾರಕವಾಗಿ ರಾಜ ಆನಂದಪುರಂನಲ್ಲಿ ಚಂಪಕ ಸರಸ್ಸು ನಿರ್ಮಿಸಿ ಈ ಪ್ರದೇಶಕ್ಕೆ ಆನಂದಪುರಂ ಅಂತ ನಾಮಕರಣ ಮಾಡಿದ 300 ವರ್ಷದ ನಂತರ ಜಮೀನ್ದಾರ್ ರಾಮಕೃಷ್ಣ ಆಯ್ಯಂಗಾರರು ತಮ್ಮ ಪತ್ನಿಯ ಹೆಸರಲ್ಲಿ ಆಸ್ಪತ್ರೆ ನಿಮಿ೯ಸಿರುವುದರಿಂದ ಆನಂದಪುರಂ ಇತಿಹಾಸದಲ್ಲಿ ಈ ಇಬ್ಬರು ಮಹಾನ್ ಸ್ತ್ರೀಯರ ಹೆಸರು ಶಾಶ್ವತವಾಗಿ ಉಳಿದಿದೆ.
ರಾಮಕೃಷ್ಣ ಅಯ್ಯಂಗಾರರ ಪುತ್ರ ಬದರಿನಾರಾಯಣ ಅಯ್ಯಂಗಾರ್ ಶಾಸಕರು, ಮಂತ್ರಿಗಳು ಮತ್ತು ಸಂಸದರೂ ಆಗಿದ್ದರು.
ದೇವರಾಜ ಅರಸರು ಮುಖ್ಯಮಂತ್ರಿ ಆದಾಗ ಬದರಿನಾರಾಯಣ ಅಯ್ಯಂಗಾರರರು ಶಿಕ್ಷಣ ಮತ್ತು ಕನ್ನಡ ಸಂಸ್ಕೃತಿ ಇಲಾಖೆಯ ಮಂತ್ರಿ ಆಗಿದ್ದರು ಆದ್ದರಿಂದ ಕರ್ನಾಟಕ ಎಂಬ ಹೆಸರು ಘೋಷಣೆಗೆ ಬದರಿನಾರಾಯಣ ಅಯ್ಯಂಗಾರರೂ ದೇವರಾಜ ಅರಸರಷ್ಟೆ ಕಾರಣ ಕತ೯ರು, ಇಬ್ಬರೂ ಜೊತೆಯಾಗಿ ಕರ್ನಾಟಕ ನಾಮಕರಣ ಮಾಡಿದ್ದು ಈಗ ಇತಿಹಾಸ.
ಬದರಿನಾರಾಯಣ ಅಯ್ಯಂಗಾರರ ಅಣ್ಣ ವೆಂಕಟಾಚಲಯ್ಯ0ಗಾರರು ದೀರ್ಘಕಾಲ ಆನಂದಪುರಂ ವಿಲೇಜ್ ಪಂಚಾಯಿತಿ ಅಧ್ಯಕ್ಷರಾಗಿರುತ್ತಾರೆ.
ಇಂತಹ ಹಿನ್ನೆಲೆಯ ಆನಂದಪುರಂ ಆಸ್ಪತ್ರೆಯಲ್ಲಿ ವೈದ್ಯರಾಗಿ ಬಂದ ಡಾಕ್ಟರ್ ಸಣ್ಣಪ್ಪನವರು ಈ ಹಿಂದುಳಿದ ಭಾಗದ ಜನರಿಗೆ ಸೂಕ್ತ ವೈದ್ಯಕೀಯ ಚಿಕಿತ್ಸೆ ನೀಡಿದವರು ಆಗ ಆನಂದಪುರಂನಲ್ಲಿ ಶಸ್ತ್ರಚಿಕಿತ್ಸೆ ಕೂಡ ನಡೆಯುತ್ತಿತ್ತು.
ಡಾ. ಸಣ್ಣಪ್ಪರಂತೆ ಅವರ ಪತ್ನಿ ನಳಿನಾಕ್ಷಿ ಕೂಡ ಸ್ಥಳಿಯ ಮಹಿಳಾ ಸಂಘಗಳಲ್ಲಿ ಜನಪರವಾಗಿ ಅನೇಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿ ಪತಿಯಂತೆಯೆ ಪ್ರಸಿದ್ದಿ ಪಡೆದಿದ್ದರು ಅವರು ಸ್ಥಾಪಿಸಿದ ಮಹಿಳಾ ಮಂಡಳಿಗೆ ಈಗ 50ನೇ ವರ್ಷಾಚಾರಣೆ.
ಈ ಕಾಲದಲ್ಲೇ ಡಾ. ಸಣ್ಣಪ್ಪನವರು ಆನಂದಪುರಂನ ಪ್ರಮುಖರನ್ನು ಸೇರಿಸಿಕೊಂಡು ಆನಂದಪುರಂ ನಲ್ಲಿ ರೋಟರಿ ಕ್ಲಬ್ ಸ್ಥಾಪಿಸುತ್ತಾರೆ, ಆನಂದಪುರಂನ ಉಪನ್ಯಾಸಕರಾಗಿದ್ದ ವೆಂಕಟೇಶ್ ಮೂರ್ತಿ, ಸನಾವುಲ್ಲಾ ಷರೀಪ್, ಸದಾನಂದ ಮೂರ್ತಿ ಮತ್ತು ಪಶುವೈದ್ಯರಾದ ಡಾಕ್ಟರ್ ಜಯರಾಂ ಇವರಿಗೆ ಕೈ ಜೋಡಿಸುತ್ತಾರೆ.
ರೋಟರಿ ಕ್ಲಬ್ ನ ಸ್ಥಾಪಕ ಅಧ್ಯಕ್ಷರಾಗಿ ಎಲ್ಲರೂ ಡಾ. ಸಣ್ಣಪ್ಪರಿಗೆ ಜವಾಬ್ದಾರಿ ವಹಿಸುತ್ತಾರೆ.
ಆನಂದಪುರಂ ನ ರೋಟರಿ ಕ್ಷಬ್ ಮೂಲಕ ಅನೇಕ ಕಾಯ೯ಕ್ರಮ ಡಾ. ಸಣ್ಣಪ್ಪ ನಡೆಸುತ್ತಾರೆ, ಸ್ಥಳಿಯ ಇತಿಹಾಸ ಪ್ರಸಿದ್ದ ಕೆಳದಿ ರಾಜ ನಿರ್ಮಿಸಿದ ರಾಣಿ ಚಂಪಕಾ ಸ್ಮಾರಕವಾದ ಚಂಪಕ ಸರಸ್ಸು ಸ್ವಚ್ಚತೆಗಾಗಿ ರೋಟರಿ ಕ್ಲಬ್ ನಿಂದ ಶ್ರಮದಾನ ಕೂಡ ಮಾಡುತ್ತಾರೆ ಆದರೆ ಇವರು ವಗಾ೯ವಣೆ ಆದ ನಂತರ ರೋಟರಿ ಕ್ಲಬ್ ಯಾರು ಮುಂದುವರಿಸುವುದಿಲ್ಲ ಆದ್ದರಿಂದ ಆನಂದಪುರಂನ ರೋಟರಿ ಕ್ಲಬ್ ನ ಮೊದಲ ಮತ್ತು ಕೊನೆಯ ಅಧ್ಯಕ್ಷರು ಡಾ. ಸಣ್ಣಪ್ಪನವರೇ ಆಗಿದ್ದರು.
ಡಾ. ಸಣ್ಣಪ್ಪನವರು ಬಿದನೂರು ನಗರ ಆಸ್ಪತ್ರೆಯಲ್ಲೂ ಕೆಲ ಕಾಲ ಸೇವೆ ಸಲ್ಲಿಸಿದ್ದರು ನಂತರ ಕಡೂರಿನ ಸರ್ಕಾರಿ ಆಸ್ಪತ್ರೆಯಲ್ಲೂ ಸೇವೆ ಸಲ್ಲಿಸಿದರು ಅವರು ಹೋದಲ್ಲೆಲ್ಲ ಜನಾನುರಾಗಿಗಳಾಗಿ ಜನ ಮೆಚ್ಚುಗೆಯ ವೈದ್ಯರಾಗಿದ್ದರು.
ನಿವೃತ್ತರಾದ ನಂತರ ರಾಜ್ಯದಲ್ಲಿ ವಿವಿದ ಜಾತಿ ಹೆಸರಲ್ಲಿದ್ದ ಈಡಿಗ ಸಮಾಜವನ್ನು ಈಡಿಗ ಎನ್ನುವ ಜಾತಿ ಸಂಘಟನೆ ಏಕ ನಾಮದಲ್ಲಿ ಇರಬೇಕೆಂದು ಸಂಘಟನೆ ಮೂಲಕ ಹೋರಾಟವೂ ಮಾಡುತ್ತಾರೆ.
ಕರ್ನಾಟಕ ರಾಜ್ಯ ಈಡಿಗ ಸಮಾಜದ ರಾಜ್ಯ ಅಧ್ಯಕ್ಷರೂ ಆಗಿದ್ದರು.
ಇವರ ಪತ್ನಿ ಕೂಡ ಕರ್ನಾಟಕ ರಾಜ್ಯ ಮಹಿಳಾ ಈಡಿಗ ಸಮಾಜದ ಅಧ್ಯಕ್ಷೆ ಆಗಿದ್ದರು ಇವರು ಉಡುಪಿ ಸಮೀಪದ ಮಣಿಪುರದವರು, ಇವರ ತಂದೆ ಮದ್ರಾಸ್ ಸರ್ಕಾರದಲ್ಲಿ ರೆವಿನ್ಯೂ ಇನ್ಸಸ್ಪೆಕ್ಟರ್ ಆಗಿದ್ದರು, ಇವರು ಸ್ಥಳಿಯವಾಗಿ ಮಣಿಪುರ ರಂಗಾ ಎಂದೆ ಪ್ರಸಿದ್ಧರು.
ಡಾಕ್ಟರ್ ಸಣ್ಣಪ್ಪ ದಂಪತಿಗಳಿಗೆ ಇಬ್ಬರು ಪುತ್ರಿಯರು ಮತ್ತು ಒಬ್ಬ ಪುತ್ರರಿದ್ದಾರೆ.
ಆನಂದಪುರಂ ಇತಿಹಾಸದಲ್ಲಿ ಡಾಕ್ಟರ್ ಸಣ್ಣಪ್ಪ ಮತ್ತು ಅವರ ಪತ್ನಿ ಶ್ರೀಮತಿ ನಳಿನಾಕ್ಷಿ ಸಣ್ಣಪ್ಪರ ಹೆಸರು ಸದಾ ಸ್ಮರಣೆಯಲ್ಲಿದೆ.
Comments
Post a Comment