3592. ಅತ್ಯಂತ ಹಿಂದುಳಿದ ಕುಣಬಿ ಸಮಾಜದ ಮೊದಲ ಡಾಕ್ಟರೇಟ್ ಪದವಿ

#ಡಾಕ್ಟರ್_ವಸುಂಧರಿ

 ಮಲೆನಾಡಿನ #ಕುಣಬಿ ಸಮುದಾಯದ ಅಧ್ಯಯನ ಎಂಬ ಮಹಾ ಪ್ರಬಂದಕ್ಕೆ ಪಿ.ಹೆಚ್.ಡಿ. ಪಡೆದ ಮಹಾನ್ ಸಾದನೆ ಮಾಡಿದ್ದಾರೆ.

   ಈ ಡಾಕ್ಟರೇಟ್ ನಮ್ಮ ರಾಜ್ಯದ ಮೊದಲ ಕುಣಬಿ ಸಮಾಜದ ಡಾಕ್ಟರೇಟ್ ಆಗಿದೆ, ಅತ್ಯಂತ ಹಿಂದುಳಿದ ಈ ಸಮಾಜದ ಮಹಿಳೆಯ ಈ ಸಾಧನೆ ವಿಶೇಷ.

    ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ಬಸವಾಪುರ ಗ್ರಾಮದ ಕಮಲಮ್ಮ ನಾರಾಯಣಪ್ಪ ದಂಪತಿಗಳ ಪುತ್ರಿ ಆದ ವಸುಂದರಿ ಕುಣಬಿ ಸಮುದಾಯದಲ್ಲಿ ಪಿಹೆಚ್‌ಡಿ ಪದವಿ ಪಡೆದ ಪ್ರಥಮ ಮಹಿಳೆ ಎಂಬ ಹೆಗ್ಗಳಿಕೆ ಪಾತ್ರರಾಗಿದ್ದಾರೆ. 

  ಸದ್ಯ ಶಿವಮೊಗ್ಗದ  #ಸಹ್ಯಾದ್ರಿ ಕಲಾ ಕಾಲೇಜಿನಲ್ಲಿ ಉಪನ್ಯಾಸಕರಾಗಿ ಇವರು ಕಾರ್ಯ ನಿರ್ವಹಿಸುತ್ತಿದ್ದಾರೆ.

  ಇವರು ಕುವೆಂಪು ವಿಶ್ವ ವಿದ್ಯಾಲಯಕ್ಕೆ ಕನ್ನಡ ವಿಷಯದಲ್ಲಿ ಸಲ್ಲಿಸಿದ #ಮಲೆನಾಡಿನ_ಕುಣಬಿ_ಸಮುದಾಯದ ಅಧ್ಯಯನ (ಶಿವಮೊಗ್ಗ ಜಿಲ್ಲೆಯಲ್ಲಿನ) ಎಂಬ ಮಹಾಪ್ರಬಂಧಕ್ಕೆ 35ನೇ ಘಟಿಕೋತ್ಸವದಲ್ಲಿ ಪಿಹೆಚ್‌ಡಿ ಪದವಿ ಲಭಿಸಿದೆ.

   ಇವರಿಗೆ ಸಹ್ಯಾದ್ರಿ ಕಲಾ ಕಾಲೇಜಿನ ಕನ್ನಡ ವಿಭಾಗದ ಮುಖ್ಯಸ್ಥರಾದ ಡಾ. ಹಾಲಮ್ಮ ಎಂ. ಮಾರ್ಗದರ್ಶನ ಮಾಡಿದ್ದರು.

 #ಕುಣಬಿ_ಸಮಾಜದ_ನನ್ನ_ಒಡನಾಟ...

   ಶಿವಮೊಗ್ಗ ಜಿಲ್ಲೆಯ ಮೊದಲ ಕುಣಬಿ ಜನಾಂಗದ ಜಿಲ್ಲಾ ಸಮಾವೇಶ ಸಾಗರ ತಾಲೂಕಿನ ಆನಂದಪುರಂನ ರಂಗನಾಥ ಸ್ವಾಮಿ ಕಲ್ಯಾಣ ಮಂದಿರದಲ್ಲಿ 1995 ರಲ್ಲಿ ನನ್ನ ನೇತೃತ್ವದಲ್ಲಿ ನಡೆದಿತ್ತು ಇದಕ್ಕೆ ಕಾರಣರಾದವರು ಕುಣಬಿ ಸಮುದಾಯದ ಈಗ ಸಾಗರ ನ್ಯಾಯಾಲಯದಲ್ಲಿ ವಕೀಲರಾಗಿರುವ #ಬಳ್ಳಿಬೈಲು_ಮಂಜಪ್ಪ, #ಯ0ಕಟಪ್ಪ ಮತ್ತು ವಾರಾಹಿ ಮುಳುಗಡೆ ಸಂತ್ರಸ್ತರಾಗಿ ನಮ್ಮಲ್ಲಿಗೆ ಬಂದು ಘಂಟಿನಕೊಪ್ಪದಲ್ಲಿ ನೆಲೆಸಿದ್ದ #ಕಂಚಿನಕಲ್ಲು_ಈರಪ್ಪಣ್ಣ. ಆಗ ನಾನು ಆನಂದಪುರಂ ಕ್ಷೇತ್ರದ ಜಿಲ್ಲಾ ಪಂಚಾಯಿತಿ ಸದಸ್ಯನಾಗಿದ್ದೆ.

   ಆಗ ಶಿವಮೊಗ್ಗ ಜಿಲ್ಲಾ ಸಹಕಾರ ಸಂಸ್ಥೆಗಳ ಜಿಲ್ಲಾ ರಿಜಿಸ್ಟ್ರಾರ್ ಆಗಿದ್ದ #ಕಾಳೇಶ್ವರ_ಧರ್ಮಪ್ಪ ಸಾಹೇಬರಿಂದ ಶಿವಮೊಗ್ಗ ಜಿಲ್ಲಾ ಮೊದಲ ಕುಣಬಿ ಸಮಾಜದ ಸಮಾವೇಶ ಉದ್ಘಾಟನೆ ಮಾಡಿಸಿದ್ದೆ.

   ಅದರ ಮರುವರ್ಷ ಸಾಗರ ತಾಲೂಕಿನ #ನಾಗವಳ್ಳಿಯ #ದೇವಗಾರು ಎಂಬ ಊರಲ್ಲಿ ಎರಡನೆ ಜಿಲ್ಲಾ ಸಮಾವೇಶ ಅದ್ದೂರಿಯಾಗಿ ನೆರವೇರಿತ್ತು ಹೀಗಾಗಿ ಶಿವಮೊಗ್ಗ ಜಿಲ್ಲೆಯ ಕುಣಬಿ ಸಮಾಜದ ಒಡನಾಟ ನನಗೆ ಹೆಚ್ಚು ಲಭಿಸಿತು.

   ಕುಂದಾಪುರದ ಕಮಲಶಿಲೆ ಸಮೀಪದ ಯಡಮೊಗೆಯ ಶ್ರೀಕ್ಷೇತ್ರ ಸಿದ್ದ ಪೀಠ ಕೊಡಚಾದ್ರಿ ಹಲವರಿ ಮಠ ಕುಣಬಿ ಸಮಾಜದವರ ಮಠವೂ ಆಗಿದೆ, ಸಾವಿರಾರು ವರ್ಷಗಳ ಇತಿಹಾಸ ಇರುವ ಈ ಹಲವರಿ ಮಠ, ಇದು ಉತ್ತರ ಪ್ರದೇಶದ ಗೋರಕ್ ಪುರದ ನಾಥ ಪಂಥದ ಶಾಖಾ ಮಠ ಆಗಿದೆ, ಇದರ ಮಹಾಂತರು ಅಲ್ಲಿನ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥರು.

   ಪ್ರತಿ 12 ವರ್ಷಕ್ಕೊಮ್ಮೆ ಮಹಾರಾಷ್ಟ್ರದ ನಾಸಿಕ್ ನಲ್ಲಿ ನಡೆಯುವ ಕುಂಬಮೇಳದ ಕೊನೆಯ ಶಾಹಿ ಸ್ಥಾನದ ಮರುದಿನ ದೇಶದಾದ್ಯಂತ ಬಂದು ಸೇರುವ ನೂರಾರು ಸಾದು ಸಂತರು ನಾಸಿಕ್ ನಿಂದ ನಮ್ಮ ರಾಜ್ಯದ ಮಂಗಳೂರಿನ ಕದ್ರಿಯ ಜೋಗಿಮಠಕ್ಕೆ ನಡೆದು ಬರುವ #ಬಾರಾಪಂಥ್ ಯಾತ್ರೆಗೆ ಕುಣಬಿ ಸಮಾಜದವರು ಕಾಯುತ್ತಾರೆ ಮತ್ತು ಭಕ್ತಿಯಿಂದ ನಡೆದುಕೊಳ್ಳುತ್ತಾರೆ.

   ಕುಣಬಿ ಸಮಾಜದವರಲ್ಲಿ ಬ್ರಹ್ಮಪೋದೇಶ ಪದ್ಧತಿ ಕಡ್ಡಾಯ ಆಚರಣೆ ಇದೆ, ಜನಿವಾರ ದಾರಣೆ ಇವರ ಜನಾಂಗದಲ್ಲಿ ಕಡ್ಡಾಯ.

    ದಕ್ಷಿಣ ಗೋವಾದ ಕಾಣ್ ಕೋಣದ #ಅಸಲಿ_ಗಾಂವ್_ಡೊಂಗ್ರಿಮ್ ನಲ್ಲಿರುವ #ಮಲ್ಲಿಕಾರ್ಜುನ ದೇವಾಲಯ ಇವರ ಮೂಲ ಆರಾದ್ಯ ಸ್ಥಾನ, ವರ್ಷದಲ್ಲಿ ಮೂರು ತಿಂಗಳು ಗರ್ಭಗುಡಿ ಒಳಗಿನ ಪೂಜೆ ಕುಣಬಿ ಸಮಾಜದವರದ್ದು ಉಳಿದ 9 ತಿಂಗಳು ಬ್ರಾಹ್ಮಣ ಅರ್ಚಕರದ್ದು.

   ಪೋರ್ಚುಗೀಸರು ಇವರನ್ನ ಮತಾಂತರ ಮಾಡಲು ಪ್ರಯತ್ನಿಸಿದಾಗ ಆ ಕಾಲದಲ್ಲಿ ಅಲ್ಲಿನ ಕುಣಬಿ ಜನಾಂಗದವರು ಗೆರಿಲ್ಲಾ ಮಾದರಿ ಹೋರಾಟ ಮಾಡಿ ಪೋರ್ಚುಗೀಸರ ರುಂಡ ಚೆಂಡಾಡಿದ ಇತಿಹಾಸ ಅಲ್ಲಿನ ಇತಿಹಾಸ ದಾಖಲೆಯಲ್ಲಿದೆ.

   ಗೋವಾ ಪ್ರಾಂತ್ಯದ ಕುಣಬಿ ಸಮಾಜದವರು ಮಾಂಸಹಾರ ಸೇವಿಸುತ್ತಾರೆ ಆದರೆ ಕೋಳಿಯನ್ನು ಯಾವ ಕಾರಣಕ್ಕೂ ಅಡಿಗೆಗೆ ಬಳಸುವುದಿಲ್ಲ.

   ಪ್ರತಿ ವರ್ಷ ಶಿವರಾತ್ರಿಯಂದು #ಕೊಡಚಾದ್ರಿ ಬೆಟ್ಟದ ತುಟ್ಟ ತುದಿಯ ಸರ್ವಜ್ಞ ಮಂಟಪದ ಎದುರು ಮೂರು ಸೀಮೆಯ ಮೂರು ಕೊಳಗದ ದೀಪಕ್ಕೆ ಮೂರು ಸೀಮೆಯಿಂದ ದೀಪದ ಎಣ್ಣೆ ಸಂಗ್ರಹಿಸಿ ತಂದು ಬೆಳಗುವ ಸಾವಿರಾರು ವರ್ಷಗಳ ಇತಿಹಾಸ ಹೊಂದಿದವರು ಇಲ್ಲಿನ ಕುಣಬಿ ಜನಾಂಗದವರು.

  ಹೋಳಿ ಹಬ್ಬದಲ್ಲಿ ಇಡೀ ಒಂದು ರಾತ್ರಿ ಪೂರ ಹಾಡುವ ಕೊಡಚ್ಚಾದ್ರಿ ಚರಿತ್ರೆಯ ಹಾಡಿನ ಸಂಶೋಧನೆ ಮತ್ತು ಸಂಗ್ರಹ ಮಾಡುವ ಕೆಲಸ ಇತಿಹಾಸ ಮತ್ತು ಜನಪದ ಸಂಶೋದಕರು ಮಾಡಬೇಕು.

   ಕುಣಬಿ ಸಮುದಾಯ #ಗೇರುಸೊಪ್ಪೆಯ ಕಾಳು ಮೆಣಸಿನ ರಾಣಿ ಬಿರುದಾಂಕಿತ ಜೈನ ರಾಣಿ #ಚೆನ್ನಬೈರಾದೇವಿ ಆಸ್ಥಾನದಲ್ಲಿ ಇದ್ದವರು.

   ರಾಣಿ ಚೆನ್ನಬೈರಾದೇವಿಯ ಆಪ್ತ ಸೈನಿಕ ಬಳಗದವರಾದ ಈ ಕುಣಬಿ ಸಮಾಜದವರು ಕೆಳದಿ ರಾಜ ವೆಂಕಟಪ್ಪ ನಾಯಕ ಮತ್ತು ಕೆಳದಿ ಸೈನ್ಯ ರಾಣಿ ಚೆನ್ನ ಬೈರಾದೇವಿಯನ್ನ ಬಂದಿಸಿ ಮೇನೆಯಲ್ಲಿ #ಆನಂದಪುರಂ ಕೋಟೆಗೆ ಕರೆದೊಯ್ಯುವಾಗ ಬಾರೀ ಪ್ರತಿರೋದ ತೋರಿ, ಗೆರಿಲ್ಲಾ ಮಾದರಿಯಲ್ಲಿ ಅಡೆ ತಡೆ ಮಾಡಿ ತಮ್ಮ ಕವಣೆಯಿಂದ ಕಲ್ಲಿನ ಸುರಿಮಳೆ ಸುರಿಸುತ್ತಾರೆ.

   ಅಂತಿಮವಾಗಿ ಕುಣಬಿ ಜನಾಂಗದ #ಕೆಂಪಿ ಎಂಬ ಮಹಿಳೆ ಕೆಳದಿ ಸೈನಿಕರ ಮಧ್ಯೆ ನುಗ್ಗಿ ಹೋಗಿ  ರಾಣಿ ಚೆನ್ನ ಬೈರಾದೇವಿ ಬಂದಿಸಿ ಕರೆದೊಯ್ಯುತ್ತಿದ್ದ ಮೇನೆಯನ್ನ ತನ್ನೆರೆಡು ಕೈಯಿಗಳಿಂದ ಭದ್ರವಾಗಿ ಹಿಡಿದು ನಿಲ್ಲಿಸಿ ತನ್ನ ಆರಾಧ್ಯ ದೇವಿ #ಅವ್ವರಸಿ ಯನ್ನು ಬಿಡುಗಡೆ ಮಾಡುವಂತೆ ಬೇಡಿಕೊಳ್ಳುತ್ತಾಳೆ ...ಆಗ್ರಹಿಸುತ್ತಾಳೆ...

   ಕೆಳದಿ ಸೈನಿಕರು ಎಷ್ಟು ಶ್ರಮಪಟ್ಟರೂ ಕುಣಬಿ ಜನಾಂಗದ ಕೆಂಪಿ ಕೈ ಮೇನೆಯಿಂದ ಬಿಡಿಸಲು ಸಾಧ್ಯವಾಗದಿದ್ದಾಗ ಕೆಳದಿ ರಾಜ ವೆಂಕಟಪ್ಪ ನಾಯಕರು ತಮ್ಮ ಖಡ್ಗದಿಂದ ಕೆಂಪಿಯ ಎರೆಡೂ ಕೈ ಕತ್ತರಿಸಿ ಮೇನೆಯನ್ನ ಆನಂದಪುರಂ ಕೊಟೆ ಕಡೆಗೆ ಸಾಗಿಸುತ್ತಾರೆ.

   ಈ ಹೋರಾಟದಲ್ಲಿ ತನ್ನ ಪತಿಯನ್ನು ಕಳೆದುಕೊಂಡು ತನ್ನ ಎರೆಡೂ ಕೈಗಳನ್ನು ಕಳೆದುಕೊಂಡ ಕುಣಬಿ ಕೆಂಪಿ ಕಥೆ ಇತಿಹಾಸದಲ್ಲಿ ದಾಖಲಾಗಲಿಲ್ಲ ಆದರೆ ಗೇರುಸೊಪ್ಪೆಯ ವ್ಯಾಪ್ತಿಯ ಪ್ರತಿ ಜೈನ ಧರ್ಮದ ಕುಟುಂಬದಲ್ಲಿ ಜನಪದ ಕಥೆ ಆಗಿ ಉಳಿದಿದೆ.

   ಆ ಸಂದರ್ಭದಲ್ಲಿ ಕೆಳದಿ ಅರಸರ ಸಂಸ್ಥಾನಕ್ಕೆ ಕುಣಬಿ ಕೆಂಪಿ ನೀಡಿದ ಶಾಪ ಸತ್ಯವಾಯಿತು ಎನ್ನುತ್ತಾರೆ, ಕೆಳದಿ ಅರಸರ ವಂಶದಲ್ಲಿ ಮುಂದೆ ದತ್ತು ಪಡೆದವರೇ ರಾಜ್ಯ ಆಳಿದರು.

    ಇಂತಹ ಸ್ವಾಮಿನಿಷ್ಟ ಕುಣಬಿ ಸಮಾಜದವರನ್ನ ಪಶ್ಚಿಮ ಘಟ್ಟದ ಅರಣ್ಯದ ಕಾವಲು ಪಡೆಯಾಗಿ ನೇಮಕ ಮಾಡಿದವರು ಮರಾಠ ಸಾಮ್ರಾಟ #ಶಿವಾಜಿ ಮಹಾರಾಜರು.

   ಈಗಲೂ ಗುಜರಾತಿನಿಂದ,ಮಹಾರಾಷ್ಟ್ರದ ರತ್ನಗಿರಿಯಿಂದ, ಗೋವಾ ರಾಜ್ಯ, ಕರ್ನಾಟಕ ಮತ್ತು ಕೇರಳದಲ್ಲಿ ಹಾದು ಹೋಗಿರುವ ಪಶ್ಚಿಮ ಘಟ್ಟದ ಅರಣ್ಯವಾಸಿಗಳು ಈ ಕುಣಬಿ ಜನಾಂಗದವರು.

    ಗೋವಾ ಮಹಾರಾಷ್ಟ್ರ ರಾಜ್ಯದಲ್ಲಿ ಪರಿಶಿಷ್ಟ ಪಂಗಡಕ್ಕೆ ಕುಣಬ ಜನಾಂಗ ಸೇರಿದೆ ಅಲ್ಲಿ ಶಾಸಕರು ಸಂಸದರು ಮಂತ್ರಿಗಳು ಆಗಿದ್ದಾರೆ ಆದರೆ ಕರ್ನಾಟಕ ರಾಜ್ಯದಲ್ಲಿ ಇವರನ್ನ ಬಿಸಿಎಂ A ಗೆ ಸೇರಿಸಿದೆ ಸರ್ಕಾರ.

    ಕರಾವಳಿ - ಗೋವಾ - ದಾಂಡೇಲಿ ಮತ್ತು ಯಲ್ಲಾಪುರದ ಕುಣಬಿ ಸಮಾಜದವರು ಅನೇಕ ಗೆಡ್ಡೆ ಗೆಣಸು ತಳಿ ಸಂರಕ್ಷಣೆ ಮಾಡಿದ್ದಾರೆ.

    ಕೆಲ ವರ್ಷಗಳ ಹಿಂದೆ ರಾಷ್ಟ್ರಮಟ್ಟದ ಕುಣಬಿ ಸಮಾಜದ ಸಮಾವೇಶ ಗೇರುಸೊಪ್ಪೆಯ ಮಾರುತಿ ಸ್ವಾಮಿಗಳ ಸಹಕಾರದಿಂದ ನಡೆದಿತ್ತು.

   ಈ ವರ್ಷದ ಕುವೆಂಪು ವಿಶ್ವ ವಿದ್ಯಾಲಯದಲ್ಲಿ ಪಿ.ಹೆಚ್.ಡಿ. ಸಂಶೋದನೆ ಮಾಡಿ ಡಾಕ್ಟರೇಟ್ ಪಡೆದ ಡಾಕ್ಟರ್ ವಸುಂದರಿ ಸಾದನೆ ಈ ಎಲ್ಲಾ ಕಾರಣಗಳಿಂದ ಸಾಮಾನ್ಯದ್ದಲ್ಲ.

  

    ಅದರಲ್ಲೂ ವಸುಂದರಿ ಅವರ ಸಂಶೋಧನೆ ಮತ್ತು ಪ್ರಬಂದದ ವಿಷಯ #ಮಲೆನಾಡಿನ_ಕುಣಬಿ_ಸಮುದಾಯದ_ಅಧ್ಯಯನ ಅಂದರೆ ಅವರ ಸಮೂದಾಯ ಕುರಿತದ್ದದ್ದೇ ಆಗಿದ್ದು ಇನ್ನೂ ವಿಶೇಷ.

    1997 ರಲ್ಲಿ ನಾನು, ಕಾಗೋಡು ಹೋರಾಟದ ನೇತಾರ ಹೆಚ್. ಗಣಪತಿಯಪ್ಪ, ವಿದಾನ ಪರಿಷತ್ ಮಾಜಿ ಸದಸ್ಯರಾಗಿದ್ದ  ಜಿ. ಮಾದಪ್ಪ, ಸಾಹಿತಿ ಕೋಣಂದೂರು ವೆಂಕಪ್ಪ ಗೌಡರು ಮತ್ತು ಹೋರಾಟಗಾರ ಕಲ್ಲೂರು ಮೇಘರಾಜ್ ಅನೇಕ ಬಾರಿ ಡಾಕ್ಟರೇಟ್ ಪಡೆದ ವಸುಂದರಿ ಊರು #ಬಸವಾಪುರಕ್ಕೆ ನಡೆದು ಹೋಗಿದ್ದೆವು.

    ಹೊಸನಗರ ತಾಲೂಕಿನ ಅರಸಾಳು ಸಮೀಪದ ಬಸವಾಪುರಕ್ಕೆ ಆಗ ರಸ್ತೆ ಇರಲಿಲ್ಲ ರೈಲು ಮಾರ್ಗದಲ್ಲೇ ನಡೆದು ಹೋಗಬೇಕು ಈಗಲೂ ಅಲ್ಲಿಗೆ ಭದ್ರಾ ಅಭಿಯಾರಣ್ಯದ ಕಾಡಾನೆಗಳು ಬರುತ್ತದೆ, ಇದು ಕಾಡಾನೆಗಳ ಕಾರಿಡಾರ್ ಆಗಿದೆ.

   ಒಮ್ಮೆ ಬಸವಾಪುರದಲ್ಲಿನ ಹುಲ್ಲಿನ ಗುಡಿಸಲಲ್ಲಿ ತಾತ್ಕಾಲಿಕ ಪ್ರಾಥಮಿಕ ಶಾಲೆಯನ್ನ ಕಾಗೋಡು ಹೋರಾಟದ ನೇತಾರ ಗಣಪತಿಯಪ್ಪರಿಂದ ಉದ್ಘಾಟನೆ ಮಾಡಿದಾಗಲೂ ನಾನು ಹೋಗಿದ್ದೆ.

    ಇಂತಹ ಕುಗ್ರಾಮ ಬಸವಾಪುರದ ಗುಡ್ಡಗಾಡು ಜನಾಂಗವಾದ ಕುಣಬಿ ಸಮಾಜದ ಶ್ರೀಮತಿ ಕಮಲಮ್ಮ ಮತ್ತು ನಾರಾಯಣಪ್ಪ ದಂಪತಿ ಪುತ್ರಿ ವಸುಂದರಿ ಪದವಿ ವಿದ್ಯಾಬ್ಯಾಸ ಮಾಡಿ ಶಿವಮೊಗ್ಗದ ಸಹ್ಯಾದ್ರಿ ಕಾಲೇಜಿನಲ್ಲಿ ಉಪನ್ಯಾಸಕರಾಗಿದ್ದು ಈಗ ಕುವೆಂಪು ವಿಶ್ವವಿದ್ಯಾಲಯದಲ್ಲಿನ 35ನೇ ಘಟಿಕೋತ್ಸವದಲ್ಲಿ ಡಾಕ್ಟರೇಟ್ ಪದವಿ ಪಡೆದದ್ದು ಮಹಾನ್ ಸಾದನೆ ಆಗಿದೆ.

    ವಸುಂದರಿ ಅವರ ತಂದೆ ತಾಯಿ ಮತ್ತು ಮಾರ್ಗದರ್ಶನ ಮಾಡಿದ ಸಹ್ಯಾದ್ರಿ ಕಲಾ ಕಾಲೇಜಿನ ಕನ್ನಡ ವಿಭಾಗದ ಮುಖ್ಯಸ್ಥೆ ಡಾಕ್ಟರ್ ಹಾಲಮ್ಮ ಎಂ. ಅವರಿಗೆ ವಿಶೇಷ ಅಭಿನಂದನೆ ಸಲ್ಲಿಸುತ್ತೇನೆ.

    ಈ ಮಹಾನ್ ಸಾಧನೆ ಮಾಡಿದ ಡಾಕ್ಟರ್ ವಸುಂದರಿ ಅವರಿಗೆ ಅಭಿನಂದಿಸುತ್ತೇನೆ.

   1995 ರಲ್ಲಿ ಮೊದಲ ಶಿವಮೊಗ್ಗ ಜಿಲ್ಲಾ ಕುಣಬಿ ಜನಾಂಗದ ಸಮಾವೇಶ ಮಾಡಿಸಿದ್ದ ನನಗೆ ಅವತ್ತಿನ ಶ್ರಮ ಸಾರ್ಥಕ ಅನ್ನಿಸಿತು.

    ನಿಜವಾದ ಗುಡ್ಡಗಾಡು ಅರಣ್ಯವಾಸಿಗಳಾದ ರಾಜ್ಯದ ಕುಣಬಿ ಜನಾಂಗವನ್ನು ಗುಜರಾತ್, ಗೋವಾ ರಾಜ್ಯದಂತೆ ನಮ್ಮ ರಾಜ್ಯದಲ್ಲೂ ಪರಿಶಿಷ್ಟ ಪಂಗಡಕ್ಕೆ ಸೇರಿಸುವ ಕೆಲಸ ಆಗಬೇಕಾಗಿದೆ.

#kunbi #SahyadriCollege #shivamogga 

#hosanagara #arasalu #forest #doctarate