Blog number 2138. ಚಿಂತಕ ಅರವಿಂದ ಚೊಕ್ಕಾಡಿ ಜೊತೆ ಹೊಸ ಸಾಹಿತಿಗಳ ಪುಸ್ತಕ ಪ್ರಕಾಶನ ಇತ್ಯಾದಿ ಬಗ್ಗೆ ಸಣ್ಣ ಪೇಸ್ ಬುಕ್ ಸಂವಾದ

#ಸಾಹಿತ್ಯದ_ಆಸಕ್ತರಿಗೆ_ಪುಸ್ತಕ_ಪ್ರಕಾಶಕರಿಗೆ_ಲೇಖಕರಿಗೆ_ಮಾತ್ರ

#ಇಷ್ಟ_ಆಗ_ಬಹುದಾದ_ಪೇಸ್_ಬುಕ್_ಸಂಭಾಷಣೆ

#ಖ್ಯಾತ_ಲೇಖಕ_ಶಿಕ್ಷಣ_ತಜ್ಞ_ತರ್ಕಜ್ಞಾನಿ_ಅರವಿಂದಚೊಕ್ಕಾಡಿ_ಜೊತೆ

#ಹೊಸ_ಲೇಖಕರಿಗೆ_ಪ್ರೋತ್ಸಾಹದ_ಕುರಿತು_ಚರ್ಚೆ

ನಾನು ಅರವಿಂದ ಚೊಕ್ಕಾಡಿ ಅವರ ಪೇಸ್ ಬುಕ್ ಪೋಸ್ಟ್ ಒಂದಕ್ಕೆ  ಈ ಕೆಳಕಂಡಂತೆ ಪ್ರತಿಕ್ರಿಯಿಸಿದ್ದೆ. . . . .

#ಬರೆದದ್ದೆಲ್ಲ_ಅಚ್ಚಾಗಬೇಕು...

ಅಚ್ಚಾಗಿದ್ದೆಲ್ಲ ಮಾರಾಟ ಆಗಬೇಕು.....

 ಅನ್ನುವುದಕ್ಕಿಂತ .... 

ಬರೆಯುವ ಹವ್ಯಾಸ ನಿರಂತರವಾಗಿರಬೇಕು......

 ಅದು ಬೇಕಾದಾ ಆಸಕ್ತರಿಗೆ ಯಾವತ್ತಾದರೂ ತಲುಪ ಬಹುದು ಅಥವ ತಲುಪದೇ ಇರಬಹುದು.

ಈ ಪ್ರತಿಕ್ರಿಯೆಗೆ #ಅರವಿಂದಚೊಕ್ಕಾಡಿ ಅವರು ಬರೆದದ್ದು

#ಅರುಣ್_ಪ್ರಸಾದ್,

    ನೀವನ್ನುವುದು ಸರಿ. ಬರೆದದ್ದೆಲ್ಲ ಅಚ್ಚಾಗಬೇಕು, ಎಲ್ಲರೂ ಕೊಂಡುಕೊಳ್ಳಬೇಕು, ಎಲ್ಲರೂ ಹಾಡಿಹೊಗಳಬೇಕು ಎಂಬ ನಿಲುಮೆ ಸರಿಯಲ್ಲ. ಇದು ಸಾಹಿತ್ಯಕ್ಕೆ ಮಾತ್ರ ಸಂಬಂಧಿಸಿದ್ದಲ್ಲ ಎಂದು ನಾನು ಹೇಳುತ್ತಿರುವುದು. 

    ತಾನು ಚುನಾವಣೆಯಲ್ಲಿ ಸ್ಪರ್ಧಿಸಿದ ಕೂಡಲೇ ಮುಖ್ಯಮಂತ್ರಿ ಆಗ್ತೇನೆ ಎಂದುಕೊಂಡು ರಾಜಕೀಯಕ್ಕೆ ಹೋಗ್ಲಿಕಾಗ್ತದಾ?ಮುಖ್ಯವಾಗಿ ಕನ್ನಡದಲ್ಲಿ ಬರೆದೇ ಬದುಕಬಲ್ಲೆ ಎನ್ನಲು ಸಾಧ್ಯ ಇಲ್ಲ ಎನ್ನುವುದು ನಿಜ.‌

   ಇದು ಹೊಸಬರಿಗೆ ಮಾತ್ರ ಇರುವ ಸಮಸ್ಯೆಯಲ್ಲ‌. ಯಾವ ಹೆಸರಾಂತ ಲೇಖಕರು ಬರೆದೇ ಬದುಕುತ್ತಿದ್ದಾರೆ? ಯಾರೂ ಇಲ್ಲ. ಅಥವಾ ಯಾವ ಹೊಸಬರಿಗೆ ಹಳಬರು,"ಬರೆದೇ ಬದುಕು ಬಾ" ಎಂದು ಕರೀತಾರೆ? ಯಾರೂ ಇಲ್ಲ.

    ಇದರರ್ಥ ಸಾಹಿತ್ಯ ಕ್ಷೇತ್ರ ಎಂದರೆ ಹೆಲ್ಪಿಂಗ್ ನೇಚರೇ ಇಲ್ಲದ ಪಾತಕಿಗಳ ಲೋಕ ಎನ್ನುವ ಹಾಗೆ ಸಮಾಜಕ್ಕೆ ಕಾಣಿಸುವುದಾಗಬಾರದು.

    ನಾನು ಕಾರ್ಯಕ್ರಮ ಮಾಡಿದಾಗ ಕೊಟ್ಟ ಪ್ರಯಾಣ ಭತ್ತೆ, ಗೌರವ ಧನವನ್ನು ವಾಪಸ್ ಕೊಟ್ಟು ಹೋದ ಸಾಹಿತಿಗಳಿದ್ದಾರೆ. ಸರ್ಕಾರಿ ಕಾರ್ಯಕ್ರಮವೊ, ಉದ್ಯಮಿಗಳ ಕಾರ್ಯಕ್ರಮವೊ ಆದರೆ ಬಿಡ್ತಿರಲಿಲ್ಲ ಅವರು. 

   ಬಿಟ್ಟದ್ದು ಒಬ್ಬ ಹೊಸಬನಿಗೆ ಪ್ರೋತ್ಸಾಹ ಕೊಡಬೇಕೆಂದಲ್ಲದೆ ಬೇರೇನು? ನನ್ನಿಂದ ಅವರಿಗೆ ಲಾಭ ಏನಾದರೂ ಇತ್ತಾ? ಹೊಸಬರಿಗೆ ಮುನ್ನುಡಿ ಬರೆಯುವುದಿಲ್ಲ ಎಂದು ಸಾಮಾನ್ಯವಾಗಿ ಯಾವ ಸಾಹಿತಿಯೂ ಹೇಳುವುದಿಲ್ಲ. ಅದು ಪ್ರೋತ್ಸಾಹ ಅಲ್ಲವಾ? ಯಾವುದೊ ಪೇಪರ್‌ನವರು ಈ ವಿಷಯದ ಬಗ್ಗೆ ಯಾರ ಬಳಿ ಬರೆಸಬಹುದು ಎಂದು ಕೇಳಿದಾಗ ಹೊಸಬರನ್ನು ರೆಫರ್ ಮಾಡುವವರಿದ್ದಾರೆ. ಪ್ರಕಾಶಕರಿಗೆ ರೆಫರ್ ಮಾಡ್ತಾರೆ. 

     ಇನ್ನು, ಯುವಕರಿಗೆ ಉದ್ಯೋಗಕ್ಕೆ ಸಹಾಯ ಮಾಡುವುದಿಲ್ಲ ಅಂತ. ಇದೂ ಕೂಡ ಸುಳ್ಳು ಆರೋಪ. ನಾವು ಬಿ.ಎಡ್. ಮುಗಿಸಿದ ಮರುದಿನ ಸ್ವಾತಂತ್ರ್ಯ ದಿನಾಚರಣೆಗೆ ಕನಿಷ್ಠ ಇಪ್ಪತ್ತು ವಿದ್ಯಾರ್ಥಿಗಳು ಧ್ವಜಾರೋಹಣಕ್ಕೆ ಶಿಕ್ಷಕರಾಗಿ ಜಾಯಿನ್ ಆಗಿದ್ದೆವು. ಜಾಯಿನ್ ಮಾಡಿಸಿದ್ದು ಯಾರು? ನಾವೇ ಹುಡುಕಿಕೊಂಡದ್ದಲ್ಲ. ನಮ್ಮ ಲೆಕ್ಚರರ್ಸ್ ಖಾಸಗಿ ಶಾಲೆಗಳಲ್ಲಿ ಮಾತಾಡಿ ಕಳಿಸಿದ್ದು.

    ಸಾಹಿತಿಗಳು ಹೆಲ್ಪ್ ಮಾಡುವುದಿಲ್ಲಾಂತಲೂ ಅಲ್ಲ. ಯು. ಆರ್. ಅನಂತಮೂರ್ತಿಯವರು ನನ್ನ ಬಳಿ,"ನೀನು ಬೆಂಗಳೂರಿಗೆ ಬಂದ್ಬಿಡು. ಇಲ್ಲಿ ಯಾವುದಾದರೂ ಕಾಲೇಜಲ್ಲಿ ಹೇಳಿರ್ತೀನಿ. ಸೇರ್ಕೊಂಡ್ಬಿಡು" ಎಂದಿದ್ದರು. ಆಮೇಲೆ ಸುಬ್ರಾಯ ಚೊಕ್ಕಾಡಿಯವರು," ಇಲ್ಲ ಅವನು ಬಡವರ ಶಾಲೆಯಲ್ಲೆ ಇರಬೇಕು ಎಂದು ನಿರ್ಧರಿಸಿದ್ದಾನೆ" ಎಂದು ಅವರಿಗೆ ತಿಳಿಸಿದ ಮೇಲೆ ಅನಂತಮೂರ್ತಿಯವರು ಸುಮ್ಮನಾದರು. 

   ಎಮ್. ಎ ಮಾಡಿದವನಿಗೆ ಕಾಲೇಜಲ್ಲಿ ಕೆಲಸ ಕೊಡಿಸಬಹುದು. ಅದು ಬಿಟ್ಟು ಡಿ. ಸಿ. ಆಗಿ ಅಪಾಯಿಂಟ್ ಮಾಡಿಸ್ಲಿಕಾಗ್ತದಾ? ನಾನೀಗ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆಲ್ಲ ತರಬೇತಿ ಕೊಡುತ್ತೇನೆ, ಬೇಡಿಕೆಯೂ ಉಂಟು. ಇದು ನಾನೇ ಮಾಡಿಕೊಂಡದ್ದಲ್ಲ. ಬಿಜಾಪುರದ ಎನ್.ಎಮ್. ಬಿರಾದಾರ ಅವರು ಪಾರ್ವತೀಶ ಅವರಿಗೆ ಕೇಳಿದಾಗ ಅವರು ನನ್ನ ಹೆಸರು ಹೇಳಿದ್ದು. ಆಮೇಲೆ ಬಿರಾದಾರರಿಗೂ ನಾನು ಹಿಡಿಸಿದೆ. ಮುಂದುವರಿಯುತ್ತಾ ಆ ಕ್ಷೇತ್ರದಲ್ಲೂ ಎಸ್ಟಾಬ್ಲಿಷ್ ಆಗಲು ಸಾಧ್ಯವಾಯಿತು. 

    ಯಾವುದೊ ನ್ಯಾಷನಲ್ ಪ್ರಾಜೆಕ್ಟ್ ಮಾಡಿಕೊಡುವವರು ಬೇಕು ಎಂದಾಗ ಪುರುಷೋತ್ತಮ ಬಿಳಿಮಲೆಯವರು ನನ್ನ ಹೆಸರು ಹೇಳಿದರು. ಮಾಡಿದೆ. 

   ನಾನು ಯಾವ ಸಿದ್ಧಾಂತದೊಂದಿಗೂ ಟೈ ಅಪ್ ಆಗದವನು. ನನಗೇ ಸಪೋರ್ಟ್ ಮಾಡಿರುವಾಗ ಅವರವರ ಸಿದ್ಧಾಂತದ್ದೇ ಹುಡುಗರಿಗೆ ಸಪೋರ್ಟ್ ಮಾಡದೆ ಇರ್ತಾರಾ? ಮಾಡಿರ್ತಾರೆ. ಅನೇಕರಿಗೆ ಅನೇಕರು ಹೇಗೆಲ್ಲ ಸಪೋರ್ಟ್ ಮಾಡಿದ್ದಾರೆಂದು ನನಗೆ ಗೊತ್ತಿದೆ. ಅದನ್ನು ಅವರವರೇ ಹೇಳಬೇಕಷ್ಟೆ. ನಾನು ಹೇಳುವುದು ಸರಿಯಾಗುವುದಿಲ್ಲ.

    ಹೊಸ ಲೇಖಕರಿಗೆ ರಿಯಾಲಿಟಿಯನ್ನು ಅರ್ಥ ಮಾಡಿಸುವುದು ಎಂದರೆ ಸಾಹಿತ್ಯ ಎನ್ನುವುದು ಭಯೋತ್ಪಾದಕರೇ ತುಂಬಿರುವ ಕ್ಷೇತ್ರ ಎಂಬರ್ಥದಲ್ಲಿ ಕಾಣಿಸುವುದಲ್ಲ. ಭ್ರಮೆಯಿಂದ ಬಿಡಿಸಿ. ಆದರೆ ನಿರಾಶಾವಾದಿಗಳನ್ನಾಗಿಸಬೇಡಿ.

ಈ ಮೇಲಿನ ಪೋಸ್ಟ್ ಗೆ ನನ್ನ ಅಭಿಪ್ರಾಯ ಬಯಸಿದ್ದರು ಆದ್ದರಿಂದ ಬರೆದೆ ನಾನು ಅವರಂತ ಜ್ಞಾನಿಗಳ ಜೊತೆ ಸಂವಾದ ಮಾಡುವುದು ಅಸಾಧ್ಯ ಆದರೂ ನನ್ನ ಇತಿ ಮಿತಿಯಲ್ಲಿ ಮುಂದಿನ ಸಾಹಿತ್ಯ ಪ್ರಕಾಶನದ ಸಾಧ್ಯ ಸಾಧ್ಯತೆ ಹೊಸ ಬರಹಗಾರರಿಗೆ ಅವರ ಪುಸ್ತಕ ಪ್ರಕಟನೆಗೆ ಇರುವ ಅವಕಾಶದ ಬಗ್ಗೆ ಈ ಕೆಳಕಂಡಂತೆ ದಾಖಲಿಸಿದ್ದೇನೆ.

#ಅರವಿಂದಚೊಕ್ಕಾಡಿ ಅವರೆ.....

    ಇಲ್ಲಿ ನಮ್ಮ ಅನುಭವ ನಮ್ಮ ಕನಸಿನ ಬರವಣಿಗೆ ಒಂದು ವಿಷಯ ಎನ್ನುವುದಾದರೆ, ಕಥೆ ಕವನಗಳು ಇವುಗಳ ಪ್ರಕಟನೆ -ಮಾರಾಟ- ವಿಮರ್ಷೆ ಇದ್ದಿದ್ದೆ.

 ಪ್ರಕಾಶನದವರಿಗೆ ಇದು ಎಲ್ಲರೂ ಓದಲೇ ಬೇಕಂತ ಉದ್ದೇಶಕ್ಕಿಂತ ಮಾರಾಟ ಅವರ ಉದ್ದೇಶ ಯಾಕೆಂದರೆ ಆವರ ಬಂಡವಾಳ ವಾಪಾಸು ಬರಬೇಕು, ಆದ್ದರಿಂದ ಅವರು ಸರ್ಕಾರದ ಗ್ರಂಥಾಲಯಗಳಿಗೆ ವಾಮ ಮಾರ್ಗದಲ್ಲಿ ಮಾರಾಟ ಮಾಡಬೇಕು ಲೇಖಕಕನಿಗೆ 100 ಪ್ರತಿ ಗೌರವ ಸಂಭಾವನೆ ರೂಪದಲ್ಲಿ ನೀಡುತ್ತಾರೆ.

  ಜನಜಾಗೃತಿಗಾಗಿ ಬರೆಯುವ, ಶೈಕ್ಷಣಿಕವಾಗಿ ಬರೆಯುವುದು, ಪ್ರಕಟನೆ ಮಾಡುವುದು ಇನ್ನೊಂದು ರೀತಿಯದ್ದು ಆಯಾ ಕಾಲಕ್ಕೆ ತಕ್ಕಂತೆ ಬೇಡಿಕೆ ಆದರಿಸಿ ಬಿಸಿ ಕಜ್ಜಾಯದಂತೆ ಮಾರಾಟ ಆಗಲೂ ಬಹುದು.

  ರೋಚಕತೆ - ಸೆಕ್ಸ್ ಮಿಕ್ಸ್ ಮಾಡಿ ಇವತ್ತಿನ ಕಾಲಕ್ಕೆ ತಕ್ಕಂತ ಪುಸ್ತಕ ಬರೆದು ಪ್ರಕಟಿಸಿದವರ ಪುಸ್ತಕ ಪ್ರಾರಂಭದಲ್ಲಿ ಒಂದೆರೆಡು ಮುದ್ರಣ ಆಗಿ ಯಶಸ್ವಿ ಸ್ಟಾರ್ ಲೇಖಕರೂ ಆಗಬಹುದು ಅಂತಹ ಪುಸ್ತಕಕಕ್ಕೆ ಅನೇಕ ಪ್ರಕಾಶನಗಳು ಆದ್ಯತೆ ನೀಡುತ್ತದೆ ಕಾರಣ ಅವರ ಬಂಡವಾಳ ತಿರುಗಿ ಬರುವ ಲಾಭ ದೃಷ್ಟಿಯಿಂದ.

     ಈಗೆಲ್ಲ ಕಿಂಡಲ್ ಮುಖಾಂತರ ಓದುವ ವರ್ಗ ಹೆಚ್ಚಾಗುತ್ತಿದೆ ಈ ಮಾಧ್ಯಮದ ಮೂಲಕ ವಿಶ್ವದಾದ್ಯಂತ ಇರುವ ಕನ್ನಡಿಗರ ಬೆರಳ ತುದಿಗೆ ಕನ್ನಡ ಸಾಹಿತ್ಯ ಸುಲಭವಾಗಿ ತಲುಪುತ್ತದೆ ಮತ್ತು ಇದರಿಂದ ಲೇಖಕರಿಗೆ ಆದಾಯವೂ ಇದೆ.

  ಇದು ಹೊಸ ತಲೆಮಾರಿನ ಪುಸ್ತಕ ಪ್ರಕಟನೆ ಆದ್ದರಿಂದ ಮುಂದಿನ ದಿನಗಳಲ್ಲಿ ಪುಸ್ತಕರೂಪದಲ್ಲಿ ಪ್ರಕಟನೆ ಕಡಿಮೆ ಆಗಬಹುದು. ಇದು ಹೊಸ ಬರಹಗಾರರು ಪ್ರಕಾಶನದವರ ಹಾದಿ ಕಾಯದೆ ಸಾಹಿತ್ಯ ಪ್ರಕಟನೆ ಸಾಧ್ಯವಿರುವ ಹೊಸ ಮಾರ್ಗ.

  ಕೆ.ವಿ.ಸುಬ್ಬಣ್ಣ ಮೈಸೂರಿನಲ್ಲಿ ವ್ಯಾಸಂಗ ಮಾಡುತ್ತಿದ್ದ ಸಂದರ್ಭದಲ್ಲಿ ಪ್ರಾರಂಬಿಸಿದ ಅಕ್ಷರ ಪ್ರಕಾಶನ ನಡೆಸಲು ಪಟ್ಟ ಕಷ್ಟಗಳು ದಾಖಲಾಗಿದೆ.

  ನಮ್ಮ ನಮ್ಮ ಪರಿಸರದ ಇತಿಹಾಸ, ಸತ್ಯ ಕತೆ, ಜನಪದ ಕಥೆ ಬರೆದು ಪ್ರಕಟಿಸಿದರೆ ಸ್ಥಳೀಯ ಓದುಗರು ಆಸಕ್ತಿಯಿಂದ ಪುಸ್ತಕ ಖರೀದಿಸುತ್ತಾರೆ ಇದಕ್ಕೆ ಉದಾಹರಣೆ ನಮ್ಮ ಊರಿನ ಕೆಳದಿ ರಾಜ ವೆಂಕಟಪ್ಪ ನಾಯಕ ಮತ್ತು ರಾಣಿ ಚಂಪಕಾಳ ದುರಂತ ಕಥೆ ನಾನು ಬರೆದು ಎರಡು ಸಾವಿರ ಪುಸ್ತಕ ಸ್ಥಳಿಯ ಓದುಗರಿಗೆ ತಲುಪಿತು.

  ನನ್ನ ಮುಂದಿನ ಆನಂದಪುರಂ ಇತಿಹಾಸ ಪುಸ್ತಕ ಕೂಡ ನಮ್ಮ ಆನಂದಪುರಂನವರಿಗೆ ತಲುಪ ಬೇಕು, ಬೇರೆ ಊರವರಿಗೆ ಅವರ ಊರಿನ ಇತಿಹಾಸ ಇರುತ್ತದೆ.

  ಬರಹಗಾರ ಹವ್ಯಾಸಿ ಆಗಿ ಬರವಣಿಗೆ ಮಾಡಬೇಕು ಅದು ನಿತ್ಯ ಆದಾಯ ತರುವ ಉದ್ಯೋಗ ಆಗುವುದು ಬೆರಳೆಣಿಕೆ ಸಾಹಿತಿಗಳಿಗೆ ಮಾತ್ರ, ರಾಜರ ಕಾಲದಲ್ಲಿ ಕವಿಗಳು ರಾಜಾಶ್ರಯದಿಂದಲೇ ಬದುಕಿದ್ದರು.

  ಹಣದ ಹಿಂದೆ ಪ್ರಶಸ್ತಿ ಹಿಂದೆ ಓಡಿದರೆ ಅದು ನಮ್ಮ ಮುಂದಕ್ಕೆ ಓಡುತ್ತಿರುತ್ತದೆ.

  ಹೆಸರು ಖ್ಯಾತಿ ಯಾವುದನ್ನೂ ನಿರೀಕ್ಷೆ ಮಾಡದ ಮುದ್ದಣ್ಣ ಕವಿ ಮಹಾನ್ ಕವಿ ಆಗಿ ಸ್ಮಾರಕದಲ್ಲಿ ನಿಮ್ಮ ಊರ ಸಮೀಪದಲ್ಲಿದ್ದಾರೆ.