Blog number 1874. ಕಾಗೋಡು ರೈತ ಹೋರಾಟದ ರೂವಾರಿ ಹೆಚ್. ಗಣಪತಿಯಪ್ಪರ ಆತ್ಮಚರಿತ್ರೆ ಬರೆದವರು ಶಾಂತವೇರಿ ಗೋಪಾಲಗೌಡರ ಆತ್ಮ ಚರಿತ್ರೆ ಜೀವ೦ತ ಜ್ವಾಲೆ ಬರೆದ ಕೋಣಂದೂರು ವೆಂಕಪ್ಪಗೌಡರು ಈ ಪುಸ್ತಕದಿಂದ ಅನೇಕ ಪರಿಣಾಮಗಳಾಯಿತು.

#ಕಾಗೋಡು_ರೈತಹೋರಾಟದ_ರೂವಾರಿ

#ಹೆಚ್_ಗಣಪತಿಯಪ್ಪ_ಜೀವನ_ಚರಿತ್ರೆ

#ಬರೆದವರು_ಖ್ಯಾತ_ಲೇಖಕ_ಕೋಣಂದೂರು_ವೆಂಕಪ್ಪಗೌಡರು 

#ಗಣಪತಿಯಪ್ಪರ_ಆತ್ಮಚರಿತ್ರೆ_ಪ್ರಕಟವಾಗದಂತೆ_ತಡೆಯುವ_ಅನೇಕ_ವಿಪಲ_ಪ್ರಯತ್ನಗಳಾಗಿತ್ತು.

#ಸಾಗರ_ವಿಧಾನಸಭಾ_ಕ್ಷೇತ್ರದಲ್ಲಿ_1999ರಲ್ಲಿ_ಪಕ್ಷೇತರನಾಗಿ_ಸ್ವರ್ದಿಸಲು_ಗಣಪತಿಯಪ್ಪ_ಕಾರಣರು

#ಅವರ_ಸ್ವಾತಂತ್ರ್ಯಹೋರಾಟದ_ಪಿಂಚಣಿ_ನನ್ನ_ಚುನಾವಣಾ_ಠೇವಣಿ.

   ನಾನು ಗಣಪತಿಯಪ್ಪರನ್ನು ಮೊದಲು ನೋಡಿದ್ದು 1975ರಲ್ಲಿ ಅವರು ಆಗ ವಿದ್ಯಾರ್ಥಿಗಳಾಗಿದ್ದ ತೀ.ನಾ.ಶ್ರೀನಿವಾಸ್ ಮತ್ತು ಹಿರಿಯಣ್ಣರ ಜೊತೆ ನಮ್ಮ ತಂದೆ ಬೇಟಿ ಮಾಡಿ ಅವತ್ತು ಗಣಪತಿಯಪ್ಪರ ಸಂಪಾದಕತ್ವದಲ್ಲಿ ಪ್ರಕಟವಾಗುತ್ತಿದ್ದ ದಿನ ಪತ್ರಿಕೆ #ನ್ಯಾಯದ_ತಕ್ಕಡಿ ಚಂದಾದಾರನ್ನಾಗಿ ಮಾಡಲು ಬಂದಾಗ, ಅವತ್ತೇ ನಾನು ತೀನಾ ಶ್ರೀನಿವಾಸರನ್ನು ನೋಡಿದ್ದು ಅದೇ ಮೊದಲು, ಆಗ ನನ್ನ ವಯಸ್ಸು 10 ವರ್ಷ.

   ಅವರು ಪತ್ರಿಕೆಯ ವಾರ್ಷಿಕ ಚಂದಾ ಹಣ ಪಡೆದು  ಹೋದ ನಂತರ ನಮ್ಮ ತಂದೆ ಅವರ ಗೆಳೆಯರಿಗೆ ಗಣಪತಿಯಪ್ಪ ಸ್ವಾತಂತ್ರ್ಯ ಹೋರಾಟಗಾರರು, ಕಾಗೋಡು ಸತ್ಯಾಗ್ರಹದ ನೇತಾರರು ನಮ್ಮ ಮನೆ ಸಮೀಪದ ಕೆಂಜಿಗಾಪುರದ ತಿಮ್ಮಣ್ಣರ ತಮ್ಮ ಅಂತೆಲ್ಲ ಹೇಳುವುದು ಕೇಳಿಸಿಕೊಂಡಿದ್ದೆ

    1977ರ ನಂತರ ಸಾಗರದಲ್ಲಿ ಪ್ರೌಢ ಶಿಕ್ಷಣಕ್ಕೆ ಸೇರಿದಾಗ ಸಾಗರದ ಠಾಣೆಯಲ್ಲಿ ರಾಮನ ಲಾಕಪ್ ಡೆತ್ ಪ್ರಕರಣದಲ್ಲಿ ಸಾಗರದ ಆಸ್ಪತ್ರೆ ಎದರು ಲಾಠಿ ಛಾರ್ಜ್ ನಲ್ಲಿ, ರೈತ ಸಂಘದಿಂದ ಅವರು ಲೋಕಸಭೆಗೆ ಸ್ಪರ್ದಿಸಿದಾಗ, ಅನೇಕ ಜನಪರ ಹೋರಾಟಗಳ ಕರಪತ್ರ ಮುದ್ರಿಸಿ ಹಂಚುವಾಗ, ಸೈಕಲ್ ನಲ್ಲೇ ಗಾಂಧೀ ಟೋಪಿ, ಖಾದಿ ಜುಬ್ಬಾ, ವಾಷ್ ಕೋಟ್, ಕಚ್ಚೆ ಪಂಚೆ, ಚರ್ಮದ ಚಪ್ಪಲಿ, ಬಗಲು ಚೀಲ, ಕನ್ನಡಕದಾರಿ ಗಣಪತಿಯಪ್ಪರನ್ನು ಸಾಗರದ ಪೇಟೆಯಲ್ಲಿ ನೋಡುತ್ತಿದ್ದೆ.

  1995 ರಲ್ಲಿ ನಾನು ಜಿಲ್ಲಾ ಪಂಚಾಯತ್ ಸದಸ್ಯನಾದ ನಂತರ ಗಣಪತಿಯಪ್ಪರ ಒಡನಾಟ ಜಾಸ್ತಿ ಆಯಿತು ಅವರ ಬಗ್ಗೆ ಅವರ ಹೋರಾಟದ ಬಗ್ಗೆ ಹೆಚ್ಚು ಓದಿ ತಿಳಿದೆ,ಅವರು ನೀಡುತ್ತಿದ್ದ ದಾಖಲೆಗಳು, ಪತ್ರಗಳು, ಆ ಕಾಲದ ಪತ್ರಿಕಾ ಪ್ರಕಟಣೆಗಳು ನೋಡಿ ಇಡೀ ಭಾರತ ದೇಶದ ಗಮನ ಸೆಳೆದ ಕಾಗೋಡು ಭೂಮಿ ಹೋರಾಟದ ನೇತಾರರಾದ ಗಣಪತಿಯಪ್ಪರ ಮಾಹಿತಿ ಮುಂದಿನ ತಲೆಮಾರಿಗೆ ತಿಳಿಸ ಬೇಕಾದ ಸಾಹಿತ್ಯದ ಕೊರತೆ ಮನಗಂಡಿದ್ದೆ.

   1999 ರಲ್ಲಿ ವಿಧಾನಸಭಾ ಚುನಾವಣೆಯಲ್ಲಿ ಸಾಗರ ಕ್ಷೇತ್ರದಿಂದ ಜಾತಿ -ಹಣ - ಅಧಿಕಾರ ಎಂತದೂ ಇಲ್ಲದ ನನ್ನಂತಹ ಹೋರಾಟಗಾರನೊಬ್ಬನನ್ನು ಇವರದೇ ಜಾತಿಯ ಪ್ರಭಾವಿ ಮಂತ್ರಿ ಹಾಗೂ ಜಾತಿ - ಹಣ - ಅಧಿಕಾರ ಇರುವಂತವರ ವಿರುದ್ಧ ತಮ್ಮ ಸ್ವಾತಂತ್ರ್ಯ ಹೋರಾಟಗಾರರಿಗೆ ನೀಡುವ ಪಿಂಚಣಿ ಹಣ ಠೇವಣಿ ಪಾವತಿ ಮಾಡಿ ಸ್ಪರ್ದೆಗೆ ಇಳಿಸುತ್ತಾರೆಂದರೆ?... ಅಷ್ಟೇ ಅಲ್ಲ ಚುನಾವಣೆ ಪ್ರಾರಂಭದಿಂದ ಅಂತ್ಯದವರೆಗೆ ಪ್ರಚಾರದ ನೇತೃತ್ವ ವಹಿಸಿದ್ದಾರೆಂದರೆ !!...

 

 ಜಾತಿ-ಹಣ - ಅಧಿಕಾರ - ತೋಳ್ಬಲದ ವಿರುದ್ಧ ಇವು ಯಾವುದೂ ಇಲ್ಲದ ಜಾತ್ಯಾತೀತನ ಸ್ಪರ್ದೆ ಎಲ್ಲರಿಗೂ ಕುತೂಹಲ "ನೂರು ಓಟು ಬರುವುದಿಲ್ಲ" ಎಂಬ ಜಡ್ಜ್ಮೆಂಟ್ ಗಳು ಮತ್ತು ಚುನಾವಣಾ ನೇತೃತ್ವ ವಹಿಸಿದ್ದರಿಂದ ಹಿರಿಯರಾದ ಗಣಪತಿಯಪ್ಪರನ್ನು ಗೇಲಿ ಮಾಡುವುದೂ ಮಾಡುತ್ತಿದ್ದರು ಆದರೆ ಸ್ವಾತಂತ್ರ್ಯ ಹೋರಾಟಗಾರರ ಪಿಂಚಣಿ ಹಣ ಠೇವಣಿ ಮಾಡಿದ್ದು ಮೋಸ ಆಗಲಿಲ್ಲ, ಚಲಾವಣೆಯಾದ ಮತಗಳಲ್ಲಿ ಶೇಕಡಾ 10% ಮತಗಳು ಜಾತಿ ಇಲ್ಲದ, ಹಣ ಇಲ್ಲದ ಪಕ್ಷೇತರ ಅಭ್ಯರ್ಥಿಗೆ ಸಿಗಬೇಕೆಂದರೆ ಅದು ಸುಲಭವಲ್ಲ.

  ಅವಾಗಲೇ ನನ್ನ ಮನಸ್ಸಲ್ಲಿ ಮೂಡಿದ್ದು #ಕಾಗೋಡು_ರೈತ_ಹೋರಾಟದ_ರೂವಾರಿ ಹೆಚ್.ಗಣಪತಿಯಪ್ಪರ ಆತ್ಮ ಚರಿತ್ರೆ... ಇದಕ್ಕಾಗಿ ಅನೇಕ ಪುಟಗಳ ಅಧ್ಯಾಯಗಳನ್ನು ಟಿಪ್ಪಣಿ ಮಾಡಿಕೊಂಡು ಬರೆಯುತ್ತಾ ಬಂದೆ, ಮೊನ್ನೆ ಪೋಸ್ಟಲ್ಲಿ ಹಾಕಿದ್ದು ರೈಲಿನಲ್ಲಿ ಗಣಪತಿಯಪ್ಪರ ಜೊತೆ ಅವರ ಜೀವನದ ನೆನಪುಗಳ ದಾಖಲಿಸುವಾಗ ಗೆಳೆಯರೋರ್ವರು ತೆಗೆದ ಪೋಟೊ.

  ನಂತರ ಈ ಆತ್ಮ ಚರಿತ್ರೆ ಬರೆದು ಪ್ರಕಟಿಸುವ ಜವಾಬ್ದಾರಿ ನಮ್ಮ ಜಿಲ್ಲೆಯವರೇ ಆದ ಸಮಾಜವಾದಿ ಲೇಖಕರಾದ ಕೋಣಂದೂರು ವೆಂಕಪ್ಪ ಗೌಡರಿಗೆ ವಹಿಸಿದ್ದೆವು ಯಾಕೆಂದರೆ  ಕೋಣಂದೂರು ವೆಂಕಪ್ಪ ಗೌಡರು ಆತ್ಮಚರಿತ್ರೆಗಳನ್ನು ಬರೆಯುವುದರಲ್ಲಿ  ಎಕ್ಸಪರ್ಟ್, ಅವರು ಕೆಂಗಲ್ ಹನುಮಂತಯ್ಯ, ಹುಚ್ಚು ಮಾಸ್ತಿ ಗೌಡ, ಶಾಂತವೇರಿ ಗೋಪಾಲ ಗೌಡರ ಆತ್ಮಚರಿತ್ರೆ ಜೀವಂತ ಜ್ವಾಲೆ,ದೇವರಾಜ ಅರಸು, ಜೆ.ಹೆಚ್.ಪಟೇಲ್, ಭಾರತದ ಪ್ರಧಾನಿ ದೇವೇಗೌಡರ ಆತ್ಮಚರಿತ್ರೆ ಬರೆದವರು.

ಅವರಿಗೆ ಈ ಬಗ್ಗೆ ವಿನಂತಿಸಿದಾಗ ಮೊದಲಿಗೆ ಅವರು ಒಪ್ಪಲಿಲ್ಲ , ನನ್ನ ಎಲ್ಲಾ ಟಿಪ್ಪಣಿ ಅವರಿಗೆ ನೀಡಿದ್ದು ಓದಿದ ಮೇಲೆ ಅವರನ್ನು ಕಾಗೋಡಿಗೆ ಕರೆದೊಯ್ದಿದ್ದೆ. ಗೆಳೆಯ ನಾಗೇಂದ್ರ ಸಾಗರರ ಜೀಪಿನಲ್ಲಿ ಅಲ್ಲಿಗೆ ಹೋದಾಗ ಸ್ಥಳಿಯರು ವೆಂಕಪ್ಪ ಗೌಡರ ಮೇಲೆ ಹೊಡೆದಾಡಲು ಮುಂದಾಗಿದ್ದರು, ನಂತರ ಅವರು ಕೇಳಿದ ದಾಖಲೆಗಳು ಒದಗಿಸಿದೆ ನಂತರ ಗಣಪತಿಯಪ್ಪರ ಜೊತೆ ಅನೇಕ ದಿನಗಳು ಚರ್ಚಿಸಿದರು ಆಗ ಕೋಣಂದೂರು ವೆಂಕಪ್ಪ ಗೌಡರ ವಾಸ್ತವ್ಯ ನನ್ನ ಮನೆಯೇ ಆಗಿತ್ತು.

 

 ಪುಸ್ತಕ ಮುದ್ರಣಕ್ಕೆ ಗುತ್ತಿಗೆದಾರರಾದ ಉಪ್ಪಾರ ಕಂಪನಿಯ ಜಿ.ಶಂಕರ್ ರಿಂದ ಹದಿನೈದು ಸಾವಿರ ಮತ್ತು ನಮ್ಮ ಊರಿನ ಮುರುಘಾ ಮಠದ ಸ್ವಾಮೀಜಿಗಳಿಂದ ಹತ್ತು ಸಾವಿರ ಹಣ ದೇಣಿಗೆ ಸಂಗ್ರಹ ಮಾಡಿ ಕೊಟ್ಟಿದ್ದೆ.

   ಗಣಪತಿಯಪ್ಪರ ಆತ್ಮಚರಿತ್ರೆ ಪ್ರಕಟವಾದರೆ.... ಅವರನ್ನು ಐತಿಹಾಸಿಕ ಕಾಗೋಡು ಸತ್ಯಾಗ್ರಹದ ಚರಿತ್ರೆಯಲ್ಲಿ ಶಾಶ್ವತವಾಗಿ ಅಳಿಸಿ ಹಾಕಲು ಯಶಸ್ವೀ ಆದ ಕಾಣದ ಕೈಗಳಿಗೆ ಈ ಗಣಪತಿಯಪ್ಪನವರು ಪುನಃ ಲೈಮ್ ಲೈಟ್ ಗೆ ಬಂದರೆ... ತಮ್ಮ ಇನ್ನೊಂದು ಮುಖ ಅನಾವರಣ ಆದರೆ ... ಎಂಬ ಭಯದಿಂದ ಅನೇಕ ರೀತಿಯ ತೊಂದರೆಗಳು ನೀಡಿದರು.

 

 ಪುಸ್ತಕ ಬಿಡುಗಡೆಗೆ ಗಣಪತಿಯಪ್ಪರ ಜಾತಿಯವರೇ ಗೈರಾದರು ಆದರೆ ಶಿವಮೊಗ್ಗ ಜಿಲ್ಲೆಯ ಆಗಿನ ಎಲ್ಲಾ ಪತ್ರಕರ್ತರು ಗಣಪತಿಯಪ್ಪರಿಗೆ ಸಿಗಬೇಕಾದ ಗೌರವ ಸಿಗುವಂತೆ ಮಾಡಿದರು,ಗಣಪತಿಯಪ್ಪರ ಜೀವನ ಚರಿತ್ರೆ ಹೊಸ ಚರಿತ್ರೆಯನ್ನೇ ಸೃಷ್ಟಿಸಿತು, ಆತ್ಮಚರಿತ್ರೆ ಹೊರ ಬರದಂತೆ ತಡೆದವರೇ ಕದ್ದು ಮುಚ್ಚಿ ಗಣಪತಿಯಪ್ಪರ ಆತ್ಮಚರಿತ್ರೆ ಓದಿದರು.

 

 ಗಣಪತಿಯಪ್ಪನವರು ಹೇಳಿ ಬರೆಸಿದ ಆತ್ಮ ಚರಿತ್ರೆ ಅದರಲ್ಲಿ ಅವರು ಹೇಳಿದ ಸತ್ಯ ಘಟನೆಗಳು ಸಂಬಂದ ಪಟ್ಟವರಿಗೆ ಕಹಿಯಾದ ಕಾಕೋ೯ಟಕ ವಿಷವೇ ಆಗಿದೆ ಅರಗಿಸಿಕೊಳ್ಳಲು ಕಷ್ಟವೇ.

  1950 ರ ದಶಕದಲ್ಲಿ ಗಣಪತಿಯಪ್ಪರ ಗೇಣಿ ರೈತರ ಸಂಘಟನೆಯ #ಉಳುವವನೆ_ಹೊಲದೊಡೆಯ ಎಂಬ ಘೋಷಣೆಯಲ್ಲಿ ಪ್ರಾರಂಭವಾದ #ಕಾಗೋಡು_ರೈತ_ಹೋರಾಟ ಇದರಲ್ಲಿ ಭಾಗವಹಿಸಿ ಬಂದನಕ್ಕೊಳಗಾದ ರಾಮಮನೋಹರ ಲೋಹಿಯಾ, ಜೈಲಲ್ಲಿದ್ದ ಗಣಪತಿಯಪ್ಪರನ್ನು ನೋಡಲು ಬಂದ ಜಯಪ್ರಕಾಶ್ ನಾರಾಯಣ್, ಜಾರ್ಜ್, ಮದುಲಿಮೆ ಇವರನ್ನೆಲ್ಲ ಕರೆತರಲು ಮತ್ತು ಕಾಗೋಡು ರೈತ ಹೋರಾಟಕ್ಕೆ ಹೊಸ ದಿಕ್ಕು ತೋರಿದ ಶಾಂತವೇರಿ ಗೋಪಾಲಗೌಡರು, ಸಾಗರ ಪ್ರಾಂತ್ಯ ರೈತ ಸಂಘದ ಸಂಘಟನೆಗೆ ನೆರವಾದ ಕಡಿದಾಳು ಮಂಜಪ್ಪನವರು ಇವರೆಲ್ಲರ ಒಡನಾಡಿ ಕಾಗೋಡು ರೈತ  ಹೋರಾಟದ ರೂವಾರಿ ಹೆಚ್.ಗಣಪತಿಯಪ್ಪ ಬದುಕಿದ್ದಾರೆ ಎಂಬುದೇ ದೊಡ್ಡ ಸುದ್ದಿ ಆಯಿತು ಈ ಆತ್ಮಚರಿತ್ರೆ ಬಿಡುಗಡೆಯಿಂದ.

    ನಂತರ ಕಾಗೋಡು ಚಳವಳಿಯ ಸುವರ್ಣ ಮಹೋತ್ಸವದ ಅಂಗವಾಗಿ ಕಾಗೋಡಿನಲ್ಲಿ ಲೋಹಿಯ ಭಾಷಣ ಮಾಡಿದ ಅರಳಿ ಮರದ ಕಟ್ಟೆಯಿಂದ ತೀರ್ಥಹಳ್ಳಿಯ ಕಡಿದಾಳರ ಸಮಾದಿಗೆ ಕಾಗೋಡು ಸುವರ್ಣ ಜ್ಯೋತಿ ಒಯ್ಯುವ ಕಾರ್ಯಕ್ರಮ ನಡೆಯದಂತೆ ಬೆದರಿಸುವ ಕೆಲಸ ನಡೆಯಿತು, ಆಗ ಕೋಣಂದೂರು ವೆಂಕಪ್ಪ ಗೌಡರ ಶಿಷ್ಯ ಶಿವಮೊಗ್ಗ ಜಿಲ್ಲೆಯ ಪ್ರಜಾವಾಣಿ ಮುಖ್ಯ ವರದಿಗಾರ ಇ.ಸತ್ಯನಾರಾಯಣ್ ಜಿಲ್ಲಾ ರಕ್ಷಣಾಧಿಕಾರಿಗಳಿಗೆ ಹೇಳಿ ಕಾಗೋಡಿಗೆ ರಿಸರ್ವ್ ವ್ಯಾನ್ ಕಳಿಸಿ ರಕ್ಷಣೆ ನೀಡಿದ್ದರು.

  ಗೇಣಿ ರೈತರ ಸಂಘಟಿಸಿ ಎಲ್ಲಿ ಸತ್ಯಾಗ್ರಹ ಗಣಪತಿಯಪ್ಪನವರು ಪ್ರಾರಂಬಿಸಿ ಜೈಲು ಸೇರಿದ್ದರೋ ಆ ಕಾಗೋಡು ಎಂಬ ಊರಲ್ಲಿ 50 ವರ್ಷದ ನಂತರ ಗಣಪತಿಯಪ್ಪನವರನ್ನೇ ತಡೆಯುವ ಅವಮಾನ ಮಾಡುವ ಪ್ರಯತ್ನ ಮತ್ತು ರಿಸರ್ವ ಪೋಲಿಸರ ರಕ್ಷಣೆಯಲ್ಲಿ ಸುವರ್ಣ ಕಾಗೋಡು ಹೋರಾಟದ ಜ್ಯೋತಿ ಬೆಳಗಬೇಕಾದದ್ದು ವಿಪರ್ಯಾಸವೇ ಆಯಿತು.

  ಅವತ್ತು ಜ್ಯೋತಿ ಆನಂದಪುರಂನ ಕೆಂಜಿಗಾಪುರದ ವೀರಭದ್ರ ದೇವಸ್ಥಾನದಲ್ಲಿ ತಂಗಿತು ಗಣಪತಿಯಪ್ಪ, ಕೋಣಂದೂರು ವೆಂಕಪ್ಪ ಗೌಡರು ಮತ್ತು ಪ್ರಮುಖರ ವಾಸ್ತವ್ಯ ಮತ್ತು ಅತಿಥ್ಯ ನಮ್ಮ ಮನೆಯಲ್ಲಿ ಮಾಡುವ ಭಾಗ್ಯ ನನಗೆ ದೊರಕಿತ್ತು.

   ಮರುದಿನ ತೀರ್ಥಹಳ್ಳಿಯ ವಿಚಾರವಂತ ಸಹೃದಯಿಗಳು ಮಧ್ಯರಾತ್ರಿ ಕಡಿದಾಳಿನ ಮಂಜಪ್ಪ ಗೌಡರ (ಮಾಜಿ ಮುಖ್ಯಮಂತ್ರಿ) ಸಮಾದಿ ಎದರು ಸಭೆ ನಡೆಸಿದರು ಅಲ್ಲಿ ಕಡಿದಾಳು ಶಾಮಣ್ಣ ಕುವೆಂಪು ಗೀತೆ ಹಾಡಿದರು ಇವೆಲ್ಲ ಮರೆಯಲಾರದ ನೆನಪುಗಳು..

 

ಬೆಂಗಳೂರಲ್ಲಿ ಆಗಿನ ಅರಣ್ಯ ಮಂತ್ರಿ ಕೆ.ಹೆಚ್.ರಂಗನಾಥ ಆರ್ಥಿಕ ತಜ್ಞ ವೆಂಕಟಗಿರಿ ಗೌಡರು,ಪ್ರೋಪೆಸರ್ ನಂಜುಂಡಸ್ವಾಮಿ, ಕೋಣಂದೂರು ವೆಂಕಪ್ಪ ಗೌಡರ ಉಪಸ್ಥಿತಿಯಲ್ಲಿ ನೇತಾರ ಗಣಪತಿಯಪ್ಪರನ್ನು ಸನ್ಮಾನಿಸಿ ಕಾಗೋಡು ರೈತ ಹೋರಾಟದ ವಿಚಾರ ಸಂಕಿರಣ ನಡೆಸಿದೆವು ಅವತ್ತು ಕಾರ್ಯಕ್ರಮದ ನಿರೂಪಣೆ ನನ್ನದೆ.

   ನಂತರ ಮಂತ್ರಿ ಕೆ.ಹೆಚ್.ರಂಗನಾಥರ ಒತ್ತಾಯದಿಂದ ಮುಖ್ಯಮಂತ್ರಿ ಎಸ್. ಎ೦.ಕೃಷ್ಣ ಸಾಗರದಲ್ಲಿ ಅವರ ಸರ್ಕಾರದ ವತಿಯಿಂದ ಐತಿಹಾಸಿಕ ಕಾಗೋಡು ರೈತ ಹೋರಾಟದ ಸುವರ್ಣ ಮಹೋತ್ಸವ ಆಚರಿಸುವಂತಾಯಿತು.

  ನಂತರ ಗಣಪತಿಯಪ್ಪರಿಗೆ ದೇವರಾಜ ಅರಸು ಪ್ರಶಸ್ತಿ ಬಂದಿತಾದರೂ ಅದನ್ನು ಸಂಭ್ರಮಿಸಲು ಯಾರೂ ಮುಂದೆ ಬರಲಿಲ್ಲ.

   ನಾನು ಗಣಪತಿಯಪ್ಪರನ್ನು ಗುರು ಎಂದು ಸ್ವೀಕರಿಸಿ ಅವರು ಎದುರಾದಾಗ ಅವರ ಕಾಲಿಗೆರಗಿ ಅಶ್ರೀವಾದ ಪಡೆಯುತ್ತಿದ್ದೆ, ದೆಹಲಿಯಲ್ಲಿ ಲಾಲ್ ಬಹದ್ದೂರ್ ಶಾಸ್ತ್ರಿ ಮೊಮ್ಮಗಳು ಗಣಪತಿಯಪ್ಪರ ಪಾದ ಮುಟ್ಟಿ ನಮಸ್ಕರಿಸಿದ ಚಿತ್ರ ನನ್ನ ಕಣ್ಣಿನ ಎದುರೇ ಇದೆ.

    ಅವತ್ತು ಸಂಜೆ ಬೆಂಗಳೂರಿಗೆ ಹೊರಟು ನಿಂತಾಗ ಗಣಪತಿಯಪ್ಪರು ಇಹ ಲೋಕ ತ್ಯಜಿಸಿದರೆಂದು ಸುದ್ದಿ ತಿಳಿಸಿದ ಮಹೇಶ್ ಎಲಿಗಾರ್ (ಯಡೇಹಳ್ಳಿಯಲ್ಲಿ ಕಾಗೋಡು ರೈತ ಹೋರಾಟದ ನೇತಾರ ಹೆಚ್.ಗಣಪತಿಯಪ್ಪ ರಂಗಮಂದಿರ ನಿರ್ಮಿಸಿದ ಶಾಲಾ ಮುಖ್ಯೋಪಾಧ್ಯಾಯರು) ಜೊತೆ ಗಣಪತಿಯಪ್ಪರ ಸಾಗರ ಸಮೀಪದ ವಡನಾಳ ತಲುಪಿ ಇಹಲೋಕ ತ್ಯಜಿಸಿದ ಮಹಾನ್ ಹೋರಾಟಗಾರರ ಪಾದಕ್ಕೆ ನಮಸ್ಕರಿಸಿದ್ದೆ.