Blog number 2280.#ಮಾನವನಾಗಿ_ಹುಟ್ಟಿದ_ಮೇಲೆ_ಏನೇನು_ಕಂಡೆ#ಸಾಯೋ_ತನಕ_ಸಂಸಾರದೊಳಗೆ_ಗಂಡಾ_ಗುಂಡಿ#ಹೇರಿಕೊಂಡು_ಹೋಗೋದಿಲ್ಲ_ಸತ್ತಾಗ_ಬಂಡಿ#ಇರೋದರೊಳಗೆ_ಒಮ್ಮೆ_ನೋಡು_ಜೋಗದ್_ಗುಂಡಿ#ಪ್ರಸಿದ್ಧ_ಲಾವಣಿ_ಬರೆದವರು_ಮೂಗೂರು_ಮಲ್ಲಪ್ಪನವರು

#ಮಾನವನಾಗಿ_ಹುಟ್ಟಿದ_ಮೇಲೆ_ಏನೇನು_ಕಂಡೆ

#ಸಾಯೋ_ತನಕ_ಸಂಸಾರದೊಳಗೆ_ಗಂಡಾ_ಗುಂಡಿ

#ಹೇರಿಕೊಂಡು_ಹೋಗೋದಿಲ್ಲ_ಸತ್ತಾಗ_ಬಂಡಿ

#ಇರೋದರೊಳಗೆ_ಒಮ್ಮೆ_ನೋಡು_ಜೋಗದ್_ಗುಂಡಿ

#ಪ್ರಸಿದ್ಧ_ಲಾವಣಿ_ಬರೆದವರು_ಮೂಗೂರು_ಮಲ್ಲಪ್ಪನವರು

#ಈ_ಲಾವಣಿ_ಸಂಗ್ರಹಿಸಿದವರು_ಜನಪದ_ಇತಿಹಾಸ_ತಜ್ಞ_ತರೀಕೆರೆ_ವಕೀಲರಾದ_ಕೆ_ಆರ್_ಲಿಂಗಪ್ಪನವರು.

#ಡಾ_ರಾಜಕುಮಾರ್_ಜೀವನ_ಜೈತ್ರ_ಸಿನಿಮಾದಲ್ಲಿ_ಈ_ಹಾಡು_ಸ್ವತಃ_ಹಾಡಿದ್ದಾರೆ.

https://youtu.be/QvRIOhCBWzI?si=s_kqOjjzfA2cVjTh

     ಮೂಗೂರು ಮಲ್ಲಪ್ಪನವರು ಶಿವಮೊಗ್ಗ ಜಿಲ್ಲೆಯ ಶಿಕಾರಿಪುರ ತಾಲೂಕಿನ  ಶಿರಳುಕೊಪ್ಪ ಸಮೀಪದ ಸಿರಿಯಾಳ ಕೊಪ್ಪ ಸರ್ಕಾರಿ ಮಾಧ್ಯಮಿಕ ಶಾಲೆಯ ಮುಖ್ಯೋಪಾಧ್ಯಾಯರು.

   ಚಿಕ್ಕಮಗಳೂರು ಕಡೂರು ಶಾಲೆಗಳನ್ನು ಕೂಡ ದಕ್ಷತೆಯಿಂದ ಪಾಠ ಮಾಡುತ್ತಿದ್ದಂತಹ ಮೇಷ್ಟ್ರು,ತಾನು ಪಾಠ ಮಾಡುತ್ತಿದ್ದ ಮಕ್ಕಳಿಗೆ ಸಂಗೀತ ಲಯ ಭಾಷೆಯ ಸೊಗಡು ಸೊಗಸು ಜೊತೆಗೆ ಸುಲಲಿತವಾಗಿ ಹಾಡಿನ ಮೂಲಕ ನಾಡಿನ ಹಿರಿಮೆಯನ್ನು ಮಕ್ಕಳ ಮನದಲ್ಲಿ ನೆಟ್ಟ ಮೇಷ್ಟ್ರು.

   

ಮೂಗೂರು ಮಲ್ಲಪ್ಪನವರು ತಮ್ಮ ವಿದ್ಯಾರ್ಥಿಗಳಿಗೆ ಜೋಗ ಜಲಪಾತ ತೋರಿಸಲು ಬಂದಾಗ ಅವರ ಮನದಲ್ಲಿ ಮೂಡಿದ ಈ ಸುಂದರ ಹಾಡು ಇದನ್ನು ಸಂಗ್ರಹಿಸಿ ಪ್ರಕಟಿಸಿದವರು ಜನಪದ ಇತಿಹಾಸ ತಜ್ಞ ವಕೀಲರು ಆದ ತರೀಕೆರೆಯ ಕೆಆರ್ ಲಿಂಗಪ್ಪನವರು.

  ಆಗಿನ ಮೈಸೂರು ಸರ್ಕಾರ ದಿನಾಂಕ 24 - ಜನವರಿ- 1965 ರಲ್ಲಿ ಈ ಲಾವಣಿಯನ್ನು ಕರಪತ್ರದಲ್ಲಿ ಮುದ್ರಿಸಿ, ಸಾರ್ವಜನಿಕರಿಗೆ ಹಂಚಿತ್ತು.

   ಈ ಲಾವಣಿಯ ಕೊನೆಯ ಭಾಗದಲ್ಲಿ ಶರಾವತಿ ನದಿಯನ್ನು ಕೂಡ ಉಲ್ಲೇಖಿಸುತ್ತಾರೆ...

   "ಶರಾವತಿ ಕನ್ನಡ ನಾಡ ಭಾಗಿರತಿ"

  "ಪುಣ್ಯವಂತರು ಬರ್ತಾರೆ ಇಲ್ಲಿ ದಿನಂಪ್ರತಿ"

  "ಸಾವು ನೋವು ಸುಳಿಯದಿಲ್ಲಿಯ ಕರಾಮತಿ"

  "ಮಲ್ಲೇಶನ್ನ ನೆನೆಯುತ್ತಿದ್ದರೆ ಜೀವನ್ಮುಕ್ತಿ"

ಈ ಹಾಡನ್ನು 1992 ರಲ್ಲಿ ಕನ್ನಡಿಗರ ಕಣ್ಮಣಿ ಡಾ. ರಾಜಕುಮಾರ್ ತಮ್ಮ ಜೀವನ ಚೈತ್ರ ಸಿನಿಮಾದಲ್ಲಿ ಅಳವಡಿಸಿಕೊಂಡಿದ್ದಾರೆ ಮತ್ತು ಈ ಹಾಡನ್ನು ಅವರೇ ಸ್ವತಃ ಹಾಡಿದ್ದಾರೆ.

 #ಪೂರ್ತಿ_ಲಾವಣಿ_ಇಲ್ಲಿದೆ...

ಮಾನವನಾಗಿ ಹುಟ್ಟಿದ ಮೇಲೆ ಏನೇನ್ ಕಂಡಿ

ಸಾಯೋತನಕಾ ಸಂಸಾರ್ ದೊಳಗೆ ಗಂಡಾಗುಂಡಿ

ಹೇರಿಕೊಂಡು ಹೋಗೋದಿಲ್ಲ ಸತ್ತಾಗ್ ಬಂಡಿ

ಇರೋದರೊಳಗೆ ನೋಡು ಒಮ್ಮೆ ಜೋಗದ ಗುಂಡಿ

ತಾಳಗುಪ್ಪಿ ತಾರಕಂಬ ಬೊಂಬಾಯ್ ಮಠ

ಸಾಲಗುಡ್ಡದ ಮ್ಯಾಲೆ ನೋಟಕ್ ಭಟ್ಕಳ್ ಮಠ

ದಾರಿ ಕಡಿದು ಮಾಡಿದಾರೆ ಗುಡ್ಡಾ ಬೆಟ್ಟ

ಪಶ್ಚಿಮ ಘಟ್ಟದ ಮ್ಯಾಲೆ ನೋಡು ಮೈಸೂರ್ ಬಾವುಟ

ನಾಡಿನೊಳಗೆ ನಾಡು ಚೆಲುವು ಕನ್ನಡ ನಾಡು

ಬೆಳ್ಳಿ ಬಂಗಾರ ಬೆಳಿಯುತಾವೆ ಬೆಟ್ಟ ಕಾಡು

ಭೂಮಿತಾಯಿ ಮುಡಿದು ನಿಂತ ಬಾಸಿಂಗ ಜೋಡು

ಬಾಣಾವತಿ ಬೆಡಗಿನಿಂದ ಬರ್ತಾಳೆ ನೋಡು

ಅಂಕು ಡೊಂಕು ವಂಕಿ ಮುರಿ ರಸ್ತೆ ದಾರಿ

ಹತ್ತಿ ಇಳಿದು ಸುತ್ತಿದಂಗೆ ಹಾವಿನ ಮರಿ

ತೊಟ್ಟಿಲ ಜೀಕಿ ಆಡಿದ್ಹಾಂಗೆ ಮನಸಿನ ಲಹರಿ

ನಡೆಯುತದೆ ಮೈಸೂರೊಳಗೆ ದರಂದುರಿ

ಹೆಸರು ಮರ್ತಿ ಶರಾವತಿ ಅದೇನ್ ಕಷ್ಟ

ಕಡೆದ ಕಲ್ಲ ಕಂಬದ ಮ್ಯಾಲೆ ಪೂಲಿನಕಟ್ಟ

ಎಷ್ಟು ಮಂದಿ ಎದೆಯ ಮುರ್ದು ಪಡತಾರ್ ಕಷ್ಟ

ಸಣ್ಣದರಿಂದ ದೊಡ್ಡದಾಗಿ ಕಾಣೋದ್ ಬೆಟ್ಟ

ಬುತ್ತಿ ಉಣುತಿದ್ ರುಣ್ಣು ಇಲ್ಲಿ ಸೊಂಪಾಗಿದೆ

ಸೊಂಪು ಇಂಪು ಸೇರಿ ಮನಸು ಕಂಪಾಗ್ತದೆ

ಕಂಪಿನಿಂದ ಜೀವಕ್ಕೊಂದು ತಂಪಾಗ್ತದೆ

ತಂಪಿನೊಳಗೆ ಮತ್ತೊಂದೇನೋ ಕಾಣಸ್ತದೆ

ಅಡ್ಡ ಬದಿ ಒಡ್ಡು ನಿಲ್ಲಿಸಿ ನೀರಿನ ಮಿತಿ

ಇದರ ಒಳಗೆ ಇನ್ನು ಒಂದು ಹುನಾರೈತಿ

ನೀರ ಕೆಡವಿ ರಾಟೆ ತಿರುವಿ ಮಿಂಚಿನ ಶಕ್ತಿ

ನಾಡಿಗೆಲ್ಲ ಕೊಡ್ತಾರಂತೆ ದೀಪದ ತಂತಿ

ಊಟ ಮುಗಿದಿದ್ರೇಳು ಮುಂದೆ ನೋಡೋದದೆ

ನೋಡುತಿದ್ರೆ ಬುದ್ದಿ ಕೆಟ್ಟು ಹುಚ್ಚಾಗ್ತದೆ

ಬೇಕಾದ್ರಲ್ಲಿ ಉಡುಪಿ ಮಾವನ ಮನೆಯೊಂದಿದೆ

ಉಳಿಯೋದಾದ್ರೆ ಮಹಾರಾಜ್ರ ಬಂಗ್ಲೆ ಅದೇ

ನೋಡು ಗೆಳೆಯ ಜೋಕೆ ಮಾತ್ರ ಪಾತಾಳ ಗುಂಡಿ

ಹಿಂದಕೆ ಸರಿದು ನಿಲ್ಸಿ ತುಸು ಕೈತಪ್ಕೊಂಡಿ

ಕೈಗಳಲ್ಲಿ ಕಾಣಸ್ತದೆ ಬೊಂಬಾಯ್ ದಂಡೀ

ನಮ್ಮದಂದ್ರೆ ಹೆಮ್ಮೆಯಲ್ವೆ ಜೋಗದ ಗುಂಡೀ

ಶಿಸ್ತುಗಾರ ಶಿವಪ್ಪನಾಯ್ಕ ಕೆಳದಿಯ ನಗರ

ಚಿಕ್ಕದೇವ ದೊಡ್ದದೇವ ಮೈಸೂರಿನವರ

ಹಿಂದಕ್ಕಿಲ್ಲಿ ಬಂದಿದ್ರಂತೆ ಶ್ರೀರಾಮರ

ಎಲ್ಲ ಕಥೆ ಹೇಳುತದೆ ಕಲ್ಪಾಂತರ

ರಾಜಾ ರಾಕೆಟ್ ರೋರರ್ ಲೇಡಿ ಚತುರ್ಮುಖ

ಜೋಡಿಗೂಡಿ ಹಾಡುತಾವೆ ಹಿಂದಿನ ಸುಖ

ತಾನು ಬಿದ್ರೆ ಆದಿತೇಳು ತಾಯಿಗೆ ಬೆಳಕ

ಮುಂದಿನವರು ಕಂಡ್ರೆ ಸಾಕು ಸ್ವಂತ ಸುಖ

ಒಂದು ಎರಡು ಮೂರು ನಾಲ್ಕು ಆದಾವ್ ಮತ

ಹಿಂದಿನಿಂದ ಹರಿದು ಬಂದದ್ದೊಂದೇ ಮತ

ಗುಂಡಿ ಬಿದ್ದು ಹಾಳಾಗಲಿಕ್ಕೆ ಸಾವಿರ ಮತ

ಮುಂದೆ ಹೋಗಿ ಸೇರುವಲ್ಲಿಗೊಂದೇ ಮತ

ಶಹಾಜಹಾನ ತಾಜಮಹಲು ಕೊಹಿನೂರ್ ಮಣಿ

ಸಾವಿರಿದ್ರು ಸಲ್ಲವಿದಕೆ ಚೆಲುವಿನ ಕಣಿ

ಜೀವವಂತ ಶರಾವತಿಗಿನ್ನಾವ್ ದೆಣಿ

ಹೊಟ್ಟೆಕಿಚ್ಚಿಗಾಡಿಕೊಂಡ್ರೆ ಅದಕಾರ್ ಹೊಣಿ

ಶರಾವತಿ ಕನ್ನಡ ನಾಡ ಭಾಗೀರಥಿ

ಪುಣ್ಯವಂತ್ರು ಬರ್ತಾರಿಲ್ಲಿ ದಿನಂಪ್ರತೀ

ಸಾವು ನೋವು ಸುಳಿಯದಿಲ್ಲಿಯ ಕರಾಮತಿ

ಮಲ್ಲೇಶನ ನೆನೆಯುತಿದ್ರೆ ಜೀವನ್ಮುಕ್ತಿ.

#ಮೂಗೂರು_ಮಲ್ಲಪ್ಪ